Müxalifət toparlana biləcəkmi... |
Müəllif: Admin | Bölmə: Xəbərlər | Vaxt: 26-01-2016, 22:05 | Şərh sayı: (0) | Baxılıb: 202
Müxalifət toparlana biləcəkmi...
Siyasi liderlər daha geniş birliyə can atırlar, müzakirələr davam etdirilir... İki gün əvvəl ölkə müxalifətinin böyük bir kəsiminin bir araya gələrək toplantı keçirməsi maraqla qarşılanıb. Toplantının nəticəsində yaradılan İşçi Qrupa ümidlər böyükdür. Toplantı iştirakçısı olan ondan artıq partiya və təşkilatın ölkənin böhrandan çıxarmaq üçün təkliflər hazırladığı vurğulanır. Toplantıda iştirak edən müxalifət liderləri musavat.com-a gələcək planlarından danışıblar.
Ümid Partiyasının sədri İqbal Ağazadə bildirib ki, böhranla bağlı keçirilən tədbirin nəticəsi olaraq ilkin mərhələdə İşçi Qrupu yaradılıb: “İşçi Qrupu yanvarın 27-də Ümid Partiyasının qərargahında toplanacaq. İlk iclasa bir sıra məsələlər çıxarılacaq. Həm hər təşkilat formasında proseslərə dəstək imkanlarından danışılacaq. Növbəti mərhələdə hansı təşkilat formasında işi davam etdirmək müzakirə ediləcək. Razılığa gəlinsə, böhranla bağlı plan üzərində işləniləcək. Hesab edirəm birinci mərhələ üçün normal yanaşmadır. Normal təkliflərdir. Biz ölkənin böhrandan çıxarılmasını istəyirik. Ona görə də böhrandan çıxma yollarına azacıq töhfə vermək istəyən hər kəsi prosesə dəvət edəcəyik”.
“AĞ blok”un təsisçilərindən olan Tural Abbaslı isə qeyd edib ki, toplantıdan sonra təşkilat və partiya rəhbərləri bir araya gələrək müzakirə aparıblar: “Görüşdə ondan artıq partiya iştirak edirdi. Ümumi məsləhətləşmələr aparıldı. Belə qərara gəlindi ki, işçi qrup yaradılsın və növbəti iclas təyin olunsun. Təkliflərin dəyərləndirilməsi və bundan irəli gələn növbəti addımların atılması ilə bağlı qərarlar oldu. Növbəti iclasda daha konkret təkliflər üzərində dayanılacaq. Daha konkret addımlar atılacaq. Hansısa bir siyasi qrupun burada ağırlığı yoxdur. Ümumi bir müxalifət üçün danışıqlar aparılır. Həssas yanaşılır ki, hər kəsin təklifləri diqqətə alınsın, bundan irəli gələrək proses başladılsın. Ümid edirik ki, növbəti addımlarda daha çox heyət iştirak edəcək. Bu toplantı böhranlı vəziyyətdən çıxış yolunun tapılması üçün müxalifət tərəfindən atılan və atılmalı olan real, lazımlı addım idi. Qalır sadəcə olaraq digər partiyaların, siyasətçilərin siyasi ambisiyalarını kənara qoyub ümumi maraq naminə bu prosesdə iştirak etmələri. Heç kim düşünməsin ki, prosesdə artıq formalaşıb və yaxud qonaq qismində iştirak etməklə məsələ bitir”.
ADP sədri Sərdar Cəlaloğlu isə qeyd edib ki, tədbirdə növbəti addım kimi bu prosesi davamlı etmək nəzərdə tutulub: “Müxalifət liderləri bir araya gəlib bu yığıncaqda səslənən fikirləri bir qərar halına salmaq üçün yenə toplanacağıq. Fikirlərimizi, təkliflərimizi aidiyyəti ünvanlara təqdim edəcəyik. Bunun üçün müəyyən addımlar atacağıq. Əsas məqsədimiz hakimiyyətə böhrandan çıxmaqla bağlı düzgün hesab etdiyimiz yolları, addımları çatdırmaqdır. Bu istiqamətdə işimizi davam etdirəcəyik”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər