“Azərbaycan Amerikanın ”qara siyahısı |
Müəllif: Admin | Bölmə: Xəbərlər | Vaxt: 20-01-2016, 18:47 | Şərh sayı: (0) | Baxılıb: 244
“Azərbaycan Amerikanın ”qara siyahısı
Sərdar Cəlaloğlu: “ABŞ-ın Azərbaycana kömək etmək fikri yoxdur, əksinə, böhran vasitəsilə iqtidarın əl-qolunu bağlamaq fikri var...”“Siyasətdə ciddi, radikal addım atmadan iqtisadi vəziyyəti normallaşdırmaq mümkün deyil. Görülən işlər də ölkəni düşdüyü dərin böhrandan çıxarmayacaq. Bu nöqteyi-nəzərdən mütləq radikal addımlar atılmalıdır ki, ABŞ-ın kömək etmək istəmədiyi dövlətlər siyahısında olmayaq”.
Bu barədə ADP sədri Sərdar Cəlaloğlu ABŞ prezidenti Barak Obamanın demokratiyanın boğulduğu və böhranla üzləşən ölkələrə kömək edilməyəcəyi barədə bir neçə gün öncə verdiyi bəyanatın Azərbaycana da aid olub-olmadığı barədə suala cavabında bildirdi. S.Cəlaloğlu qeyd etdi ki, ABŞ prezidenti bununla bir çox ölkələrə “iqtisadiyyatınızda böhranın aradan qalxmasını istəyirsinizsə, öncə siyasi islahatları həyata keçirməlisiniz” mesajını vermiş olub: “Obama bildirir ki, böhranla üzləşən antidemokratik ölkələrə kömək etmək lazım deyil. Yəni ABŞ net formada bütün dünyaya mesaj verdi ki, total böhrana düşən bu ölkələrə Birləşmiş Ştatlar və müttəfiqləri vəziyyətdən çıxmaq üçün kömək etməyəcək. Bu, o deməkdir ki, həmin dövlətlər ya siyasi sistemini dəyişməlidir, ya da qlobal iqtisadi böhran onları məhv edib tarix səhnəsindən çıxarmalıdır. Bu nöqteyi-nəzərdən Azərbaycanda da mütləq radikal addımlar atılmalıdır ki, ABŞ-ın kömək etmək istəmədiyi dövlətlər siyahısında olmayaq. Lakin bu gün təəssüf ki, Azərbaycan həmin siyahıdadır. Amerikalı senator Smitin hazırladığı sanksiya sənədi, paralel olaraq bu qəbildən başqa sanksiya sənədlərinin hazırlanması göstərir ki, Azərbaycan Amerikanın ”qara siyahısı"nda birinci yerdədir. ABŞ-ın Azərbaycana heç bir kömək etmək fikri yoxdur, əksinə, bu böhran vasitəsilə iqtidarın əl-qolunu bağlamaq fikri var".
ADP sədrinin fikrincə, buna görə də radikal siyasi, iqtisadi addımlar atmadan ölkəni indiki vəziyyətdən çıxarmaq olmaz: “Hakimiyyət radikal siyasi-iqtisadi islahatlara getmədən, kənardan Azərbaycana heç bir kömək olmayacaq. Bunu gözləməyə dəyməz. Avropa Oyunlarından əvvəl başlanan dialoq o səviyyədə davam etsəydi, bu gün Azərbaycan bu vəziyyətə düşməyəcəkdi. İndi Azərbaycanı bu böhrandan çıxarmaq üçün əlimizdə hazır planlar var. Təəssüf ki, hansısa qüvvələr həmin dialoqun gedişatına müəyyən mərhələdən sonra müdaxilə etdilər, münasibətləri əvvəlki nöqtəsinə qaytardılar. Faktiki surətdə dialoqun əhəmiyyəti itib. İndiki mərhələdə isə bu problemlərin dialoqla həll ediləcəyinə, yaxud bunun respublikadakı vəziyyətə müsbət təsir edəcəyinin mümkünlüyünə inanmıram. Dialoq elə bir siyasi prosesdir ki, bu, yalnız kiçik nöqsanların həllinə yaraya bilər. Radikal pisləşmə şəraitində dialoq kimi həddən artıq qeyri-müəyyən proseslərlə bu vəziyyətdən çıxmaq olmaz. Şəxsən indi dialoqun ölkəyə nə isə gətirəcəyinə inanmıram. Amma ölkə prezidenti ilə müxalifət rəhbərlərinin görüşünü təklif edirəm. Ölkədə hansı radikal siyasi dəyişikliklər edilməlidir ki, iqtisadiyyatda müəyyən müsbət dəyişikliklər olsun - bunu prezidentə çatdırmaq istəyirik. Dövlət başçısı bu təklifləri qəbul edər - edər, etməz də xalq orada, hakimiyyət orada, baş verənlərə görə müxalifət məsuliyyət daşımır. Lakin biz düzgün yolu həm xalqa, həm də hakimiyyətə göstərməliyik. Bizim bundan başqa heç bir gücümüz, imkanımız, hüququmuz yoxdur. Hakimiyyət qulaq asmaq istəyər, lap yaxşı, asmaq istəməz, ondan da yaxşı, çünki baş verənlərin məsuliyyəti iqtidarın üzərindədir, bunun müxalifətə aidiyyətı yoxdur. Sadəcə olaraq, biz xalqımızın və dövlətimizin taleyini düşündüyümüzə görə Azərbaycan ərazilərinin işğal edilməməsi üçün, gələcəkdə xarici borcları ödəmək mümkün olmayanda Azərbaycan defolt səviyyəsinə düşəndə milli sərvətlərimizin hərraca çıxarılmaması, iqtidarın daha acınacaqlı aqibətlə üzləşməməsi üçün bu hakimiyyətin özünə təkliflər veririk”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər