Moskva Moldova hadisələrini Azərbaycana keçirə bilərmi? |
Müəllif: Admin | Bölmə: Xəbərlər | Vaxt: 2-02-2016, 12:49 | Şərh sayı: (0) | Baxılıb: 251
Moskva Moldova hadisələrini Azərbaycana keçirə bilərmi?
Ekspert: “Bizim kommunistləri də Moskvada tez-tez görmək mümkündür...” Moldovada siyasi vəziyyət getdikcə gərginləşir. Kommunistlərin təşkil etdiyi antihakimiyyət mitinqləri böyüməkdədir. Ruspərəst müxalifət Pavla Filipin formalaşdırdığı qərbpərəst hökumətə etiraz edərək parlamentin buraxılaraq növbədənkənar seçkilərin keçirilməsini tələb edir.
Moldovanı Moskvanın qarışdırdığı getdikcə daha aydın şəkildə görünməkdədir. Rusiya telekanalları antihökumət mitinqlərini həvəslə təbliğ edir. Rusiyanın Moldova sosialistləri və kommunistlərini müdafiə etdiyi sezilir.
Belə görünür ki, Moskva keçmiş SSRİ respublikalarında revanşa Moldovada hakimiyyət dəyişikliyinə nail olmaqla başlamaq istəyir. Bəs Rusiya Moldovadakı prosesin Azərbaycana da keçməsinə çalışa bilərmi?
Politoloq Qabil Hüseynli öncə bildirdi ki, Moldova hadisələrini təhlil etdikdə Rusiyanın hədəfində özünün sərhədi boyunca avtoritar rejimlərin sayını çoxaltmaq, onların ittifaqını yaratmaq planının durduğu ortaya çıxır: “Moldova son zamanlar Avropa Birliyi ilə assosiativ üzvlük barədə Ukrayna kimi müqavilə imzalamış dövlətlərdən biridir və qərbyönümlü siyasəti özünün əsas hədəfi kimi seçmişdi. Amma Moldovada keçmiş üçün xiffət keçirən və bu keçmişi Kommunist Partiyasının timsalında geriyə qaytarmağa çalışan qüvvələr var. Həmin qüvvələr kifayət qədər aktivdir, maliyyə, insan resurslarına malikdir. Onlar üçün bu aktivliyi, sərbəstliyi yaradan Moldovada uzun müddətdir mövcud olan demokratik siyasi mühitdir. Onlar bu mühitdən istifadə edərək ayaqlanıblar. Amma eyni prosesləri Azərbaycanda həyata keçirmək, demək olar, mümkünsüzdür. Əvvəla, Rusiya üçün bu arzuedilən deyil. Yəni Azərbaycandakı hazırkı siyasi hakimiyyət Rusiya ilə yaxın dostluq əlaqələrindədir, ona görə də Moskva Moldovadakı prosesin buraya da transfer olmasında maraqlı görünə bilməz. Bu nöqteyi-nəzərdən Rusiyanın Azərbaycanda təkcə milli azlıqlardan başqa hansısa siyasi qüvvəyə istinad edib ölkədə hakimiyyəti dəyişmək fikrinə düşməsi inandırıcı deyil. Üstəlik də Azərbaycandakı kommunist partiyalarının vəziyyətinin necə olduğunu hamı yaxşı bilir. Azərbaycanda bir neçə kommunist partiyası var. Ən azından üçünü biz tanıyırıq. Onların heç biri o birisi ilə yol getmir. Ən qəribəsi odur ki, bu kompartiyalar öz istiqamətlərini daha çox Rusiya Kommunist Partiyasına tərəf yönləndirirlər. Yəni milli dəyərlərə deyil, Züqanovun gizli millətçi rus baxışlarını özündə ehtiva edən baxışlara daha çox meyllənirlər. Ona görə də bizim kommunistləri Moskvada öz həmkarlarının məclislərində tez-tez görmək mümkündür”.
Politoloq vurğuladı ki, bu gün xalq arasında kommunistlərin ciddi sosial dayaqları yoxdur. İnsanlar kommunistlərin vəd etdikləri sosialist gələcəyinə inanmırlar və onun arxasınca getmək fikrində deyillər. Ona görə də Rusiya Azərbaycanda qarışıqlıq yaratmaq fikrinə düşərsə, çox zəif ehtimalla bəzi milli azlıqların nümayəndələrinə istinad edə bilər: “Lakin o milli azlıqlar da tamamilə Azərbaycan xalqı ilə qaynayıb qarışıb və demək olar ki, onlar da vahid Azərbaycan xalqının tərkib hissəsinə çevriliblər. Odur ki, Azərbaycanla Moldova arasında hər hansı bir paralel aparmaq çox çətindir”.
Q.Hüseynli Moldovadakı hadisələrin xarakterinin də Azərbaycandakı situasiyanın və hadisələrin xarakteri ilə o qədər də üst-üstə düşmədiyini düşünür: “Moldovada pis-yaxşı oturuşmuş bir demokratiya var. Bu demokratiya əhalinin etiraz hüquqlarından istifadə etməsinə, ayağa qalxmasına, hakimiyyətlə qarşı-qarşıya gəlməsinə şərait yaradır. Azərbaycanda isə əhali Moldovadakı kimi aktiv deyil, passivdir. Siyasi partiyalar da Azərbaycanda passivdir. Hakimiyyətin mövqeyi isə güclüdür. Bir də ki, Azərbaycanda maddi durum Moldovadakından yaxşıdır. Son vaxtlar müəyyən islahatlara başlanması da əhali arasında müsbət rezonans doğurmaqdadır. Düzdür, ayrı-ayrı bölgələrdə əhalinin etirazları ara-sıra baş versə də həmin etirazları lokallaşdırmaq və aradan qaldırmaq çətin olmur. Ona görə də hələ ki Azərbaycanda Moldova tipli qarşıdurma üçün ciddi imkan və şərait görünmür”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər