Nazlı milli istehsal |
Müəllif: Admin | Bölmə: Xəbərlər | Vaxt: 28-01-2016, 16:19 | Şərh sayı: (0) | Baxılıb: 277
Nazlı milli istehsal
Əgər fikir verdinizsə, dövlət başçısının məmurları Naxçıvan avtomobili almağa çağırması əslində məcburi bir şey deyildi, cümlə də “tövsiyə edirəm” şəklində qoyulmuşdu. Məmurun şəxsi avtomobili ilə işimiz yoxdur, ancaq hər halda yerli istehsalın dəstəklənməsi aksiyası səmimidirsə, həmin tövsiyə əmr, sərəncam şəklində ola bilərdi və məmurların xidməti avtomobillərinə tətbiq edilməli idi. Qoy əmr verilsin, bütün icra hakimləri, nazirlər, prokurorlar, rəislər öz bahalı xarici xidməti maşınlarını satsınlar, həmin pulu dövlət büdcəsinə keçirsinlər və “NAZ-Lifan” alsınlar. Almırlar axı. Deməli, bu da növbəti populizmdən başqa bir şey deyil, ömrü heç bir həftə çəkməyəcəkdir. Adətən neft pulu çox olanda belə populizmləri bir neçə ay gündəmdə fırlatmaq mümkün olurdu. İndi çətindir. Telekanalizasiya zəhmətkeşləri, “ictimaiyyət nümayəndələri”, “paytaxt sakinləri” ağızlarını açıb dayanıblar. Özü də aclığa-susuzluğa öyrəncəli müxalifətə ağlınız getməsin, bunlar çox namərd tayfadır, “qa” deyəndə ağızlarına ət atmasan, “qu” deyəndə qablarına su tökməsən adamı parçalayarlar.
Ümumiyyətlə, bu məsələyə ən düzgün münasibət Vaqif Mustafayevin “Fransız” kinosunda qoyulubdur. Orda zorla sünnət edilən qəhrəman deyirdi: “Öz millətimə qurban olum. Amma siz də millət olun da!”. Biz Azərbaycan məhsulu, yerli istehsalı almağa dünəndən hazırıq, ancaq bu istehsal da gərək olsun. Olmayan bir şeyi almaq çox çətindir. Elə bil milli istehsal özünü o maşının adı kimi nazlı aparır, hardasa gizlənir, yaşmaqlanır, biz görə bilmirik.
Bahalaşma təzə başlayanda “Çiko” tumları satışdan yoxa çıxdı. Niyə? Çünki bunun xammalını - günəbaxan toxumunu tamamilə Rusiyadan alıb gətirirlər, yeni qiymətə uyğunlaşdırmaq lazım gəlmişdi. Adi corab tikə bilməyən, aftafa buraxmayan dövləti necə “yerli məhsula” öyrəşdirmək olar?
Hətta o Çindən bütün hissələri gətirib boş ərazidə yığılan “NAZ-Lifan” karikatur maşınları da bizim tələbata cavab vermir. Çox az sayda imiş. Bəs qalanlarını hansı “yerdən” çıxaraq?
Bunlar darıxdırıcı söhbətlərdir. Mən başqa məsələdən yazım. Telekanalizasiyalarımızdan birində nəsə moda verilişi qayırırlar, mən internetdə o verilişin tənqidinə baxdım. Süjet qoyublar, Türkiyədə aktrisalıqla məşğul olmuş bir həmyerlimiz millətə ağıl öyrədirdi. Özü də Türkiyə ləhcəsində. Maraqlıdır ki, bəzi ziyalılarımız buna “türkcə danışmaq yaxşıdır, rus beyinlilər buna etiraz edir” tipində don geyindirir. Mənasız yanaşmadır. Birincisi, o aparıcı türkçüdürsə, o zaman İbrahim Məmmədovu Almaniya kansleri adlandıra bilərik. İkincisi, şəxsən mən Türkiyə türkcəsindən dilimizə söz gətirməyə pis baxmıram, ancaq bunun qarşılığı yoxdursa, dilimizdəki söz ərəb-fars mənşəlidirsə! Əks halda Azərbaycanda efirdə “mən” yerinə “bən” demək düşüklük, bambılılıqdır - yumşaq yazsam. Üçüncüsü, dahi yazıçımız Mirzə Cəlilin bu mövzuda “Anamın kitabı” adlı möhtəşəm tragikomediya əsəri var, yaxşı olar həmin saxta türkçü ziyalılar bu əsəri oxusunlar. Həmin əsərdən yerinə düşən parçanı burda dərc etməkdən məmnun olduğumu bildirirəm:
“Səməd Vahid. Çocuq ağlamasın, bən şer yazıyorum (gəlib oturur yerində və Rüstəm bəyə). Dadaş, ədəbiyyatdan lazımsa, nümunə olaraq bir şer deyim, yaz lüğətə.
Rüstəm bəy. Nə eybi var. Amma bu şərt ilə açıq olsun. Yoxsa, doğrusu, mən sənin dilini qanmıram.
Səməd Vahid (kağızlarını əlləşdirir və bir yerdən şairanə oxuyur):
ənzari-şəbabımda pədidar olan, ey zill!
Ey zilli-tüluat, oluyorsun yenə peyda!
Rüstəm bəy (“eh” eləyib, çönüb gedir öz stoluna tərəf). O dili mən özüm qanıram ki, lüğətə də yazam?
Səməd Vahid (durur ayağa və kağızlarını yığışdırır ki, getsin). Dadaş, mən söylədiyim “Faust”dan türk dilinə tərcümədir. Bizim müəllimlər bunu indi bu saat məktəblərimizdə balaca çocuqlara öyrədiyorlar. Sən ki, bunu qanmıyorsan, sənayei-nəfisədən bibəhrə olmağını müşahidə ediyorsın, zənnindəyim, əfəndim. (Səməd Vahid acıqlı, kağızı qəfəsənin içinə atıb, durur gedir)".
Dili qorumaq da, sanıram yerli istehsala bir dəstək örnəyidir. Ancaq öz xalqının dilində danışa bilməyən baş nazirin ölkəsində necə yerli istehsal qurulacaq, məlum deyil.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər