Qiymətin əmələ gəlməsi |
Müəllif: Admin | Bölmə: Xəbərlər | Vaxt: 28-12-2015, 09:55 | Şərh sayı: (0) | Baxılıb: 537
Qiymətin əmələ gəlməsi
Ermənilər işğal elədikləri Qarabağ ərazisində mis zavodu açdılar. Bizim uca millət isə dollarla aldığı kreditləri necə qaytaracağını düşünüb intihar edir. İşıq gələn yer də var: Naxçıvan. Orda yerli xan Vasif müəllim dollar kreditlərinin qabaqkı 1 dollar - 1 manat 5 qəpik məzənnəsində saxlanması haqda göstəriş vermişdir. Bunu eşidən şuşalı dostlarım soruşurlar ki, Naxçıvanda Azərbaycan qanunları işləmirmi, niyə ordakı kurs, maliyyə siyasəti bütün ölkə ərazisinə tətbiq edilmir? Mənim belə təxribatçı siyasi suallara cavab verməyə həvəsim yoxdur. Üstəlik, Vasif müəllim niyə belə xırdaçılıq eləyib o 5 qəpiyi manatın üstündə saxlayıb, anlamadım. Bir az da qibtə elədim.
Hərçənd, Naxçıvanda köhnə kursla qaytarılacaq kreditlərin məbləği elə çox deyilmiş. Cəmi 1 milyon dollar. Adam başına yox, ümumiyyətlə. Qorxasan o kreditin də hamısı elə Vasif müəllimin öz adına olsun. Niyə də olmasın? Vasif müəllim bizim “milli Ramzan”dır, istəsə şəxsi zoopark da saxlayar. Hətta mən istərdim o gəlib bizi bu böhrandan xilas eləsin. Ərazi həmin ərazidir, missiya da həminkidir. Bir növ, amerikanların “Apollon” missiyası kimi. 11 dəfə uçdular, axırda Aya endilər. İndi biz də, kim bilir, bəlkə ikinci uçuşdan sonra xilas ediləcəyik? Yoxsa 11-ə qədər canımız qalmaz. Baxmayaraq ki, “on birinci birincidir!”
Şair Elçin Əliyev isə problemlərimizi poetik dillə əks etdirmişdir:
“Az qala çörək də olsun bir manat,
Yağ, pendir qiyməti açıb qol-qanad.
Üç manat siqaret, dörd manat tomat,
Ay manat, çökürsən, camaat köçür.
Ay şair, maşın da kreditdədir,
Ayağım-başım da kreditdədir.
Gələcək yaşım da kreditdədir,
Fikirli gəzməkdən insan tər tökür,
Ay manat, çökürsən, camaat köçür".
Uzun şeir idi, yarıdan çoxunu devalvasiya elədim getdi. Şair hələ şeirin üstündə bir izahlı lüğət də göndərmişdi, örnək üçün, deyir beytin axırındakı “camaat köçür” ifadəsi bizim bu dünyadan köçməyimizi bildirir. Yaşamaq lazımdır, çox nahaq yerə şairlər ölümü-itimi təbliğ edir. Ancaq Nəsimi demişkən, şeir zamanı deyil...
Köhnə dostumuz Hüseynbala Səlimovun “Böhrandan qurtuluş varmı” adlı yazısını isə kədərlə oxudum. Bəy orda sual verir ki, bizim bu kəlləçarxa vuran qiymətlər necə formalaşır, niyə belə bahalıq yaranır, qiymətlərin yaranma trayektoriyasını izləyən varmı və sairə. Mən “Narxoz”da - indiki çölü bəzəkli, içi təzəkli adla desək İqtisadiyyat Universitetində məhz elə bu “Qiymətin əmələ gəlməsi” elmini oxumuşam. Bundan imtahan vermişəm. Sizcə bu fənni kim öyrədirdi? Azərbaycan xalqının iqtisadiyyat mütəxəssislərinin bütöv bir nəslini bədbəxt edən həmin adam kim idi? Xanhüseyn Kazımlı! Neçə illərdir deputatxanada kreslo tutan, elmi bilikləri iki eşşəyin arpasını bölməyə də imkan verməyən birisi. Adam hətta “Qiymətin əmələ gəlməsi” kafedrasının müdiri qoyulmuşdu. İndi bilmirəm o fənn hansı adla qalır, Kazımlı yenə dərs deyirmi. Böyük ehtimalla yenə dərs deyir. Kimdən əskikdir ki? Azərbaycanda hansı müəllimdən böyük örnək gördük, Xanhüseyn müəllim qıraqda qaldı?
Mən oxuyanda 90-cı illərin əvvəli idi. İndi deyəsən yenə o dövrün inflyasiya vaxtlarına qayıdırıq. Yenə insanlar “dollar, avro, rus pulu” deyib “Molokan” bağına toplaşacaqlar. Bunun zərəri olsa da, xeyri də var, çünki iqtidar 20 il idi yalançı təbliğatla baş-beynimizi aparırdı ki, guya 90-cı illər dəhşətli ağır olub. (Əslində ağırlıq və inflyasiyanın böyüyü elə yapistlər gələndən sonra başlamışdı, ancaq bunu çox uzatmaq istəmirəm). Doğrudur, çətinliklər, faciələr vardı, ancaq gələcəyimizə ümidlər də vardı. İndi isə faciələr var, ümid yoxdur. Burnu fırtıqlı, 1994-cü ildə doğulan balaca yaltaqlar yaranmışdı son illər, AXC dövrünü söyürdülər. Deyirdilər çox çətinlik çəkirdik, mayalana bilmirdik. Bax, həmin kateqoriya da qoy gerçəkliyin necə olduğunu canlı görsün.
Çörək olmaz, pirojna yeyərik, çox dərd eləməyin.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər