Dövlət Plan Komitəsi |
Müəllif: Admin | Bölmə: Xəbərlər | Vaxt: 18-01-2016, 09:17 | Şərh sayı: (0) | Baxılıb: 299
Dövlət Plan Komitəsi
Satınalmalar üzrə Dövlət Agentliyinin ləğv olunması çox yaxşı islahat idi. Prinsipcə, hazırda satın almağa bir zad qalmamışdır. Hardadır o neft pulları? Saxta tenderlər, kağız üzərində keçirilən müsabiqələr... Heyf deyildi, yazırdın ki, guya tender olub, Üstüaçıq-Dəymədağıldı-Qazlıbulaq yolunun 14,6 kilometrlik hissəsinin çəkilişi üzrə “Fırtışqulu ənd Ko” şirkəti qalib gəlmişdir, hər kilometr isə 1 milyard dollara başa gələcəkdir. Basıb yeyirdin, üstündən damla-damla toplanan şirələrdən içirdin.Özü də dərd böyükdür, indi satın almağa normal adam da qalmamışdır, nəinki yol-mol olsun. Hamı ağzını sərçə balası kimi açıb dən istəyir. O üzdən, ortaya anomal nəticələr çıxır. Misal üçün, vaxtilə Surət kimi bir yoluqla (onun yoluq olmasını dahi rəhbər cəmi 6 ayda isbat elədi və yolub qazamata basdı) bacarmayıb əsir düşən çekist idarəsinin böyüyü indi Füzulidə acından küçəyə çıxanları Ermənistanla bağlayır.
Yaxud görürsən sol əliylə sağ əlini qarışdıran birisi etirazlarda kapitalizmin böhran əlamətlərini tapır. Vay-vay... Sən demə, bizdəki hərəkətlər ümumdünya sosialist inqilabının bir parçası imiş, qubalı Məşədi Bala isə ÜİLKGİ yerli şöbəsinin üzvüdür, hər gün Qəçrəş yolundakı kababxanada “İskra” qəzetinin gizli nüsxələrini qayırırmış. İmperializm çürüməkdə olan kapitalizmdir, deputat Aqil Abbasın üsyana qalxan qulları əkməyə çağırdığı soğanlar da çoxdan çürümüşdür. Qalx, ey lənətlə damğalanan aclar və qullar dünyası! Nə təhər deyərlər, bir xalq tarixi başa düşməsə onu təzədən yaşamağa məcburdur. Vallah. Şair bu münasibətlə yaxşı demişdir: “Özünə qayıdır, özünə hər şey”.
Bu baxımdan, İqtisadiyyat və Sənaye Nazirliyinin adının dəyişdirilib İqtisadiyyat Nazirliyi qoyulması növbəti inqilabi addımdır. Yaşlı adamların yadına gələr, 90-cı illərdə bu nazirliyin adı elə İqtisadiyyat Nazirliyi idi. Sonra İqtisadi İnkişaf Nazirliyi oldu. Sonra Heydər Babayev ümumi kassadan bəzi kisələri dala atanda nazirliyin adını da dəyişib İqtisadiyyat və Sənaye Nazirliyi qoydular. İndi isə sənaye yoxa çıxıbdır. Devalvasiyadan sonra Azərbaycanın aftafa da istehsal etmədiyi ortadadır. Ancaq hər halda iqtisadiyyat qalır - bəzi dükanlara yumurta və toyuq budu göndərilir. Allah qoymasa, toyuqlar da dünya inqilabına qoşulub indiki mənhus ştreykbrexerlikdən əl çəkəndə məcburuq nazirliyə təzə ad tapaq. Mən təklif edərdim Dövlət Plan Komitəsi olsun. Ən yaxşı addır, dövlətçiliyiyə də uyğundur. Sovet vaxtı bu komitə işləyəndə dövlət hər şeyi planlaşdırırdı, narazılıq da olmurdu. Hamı bilirdi ki, dükanda paltar yoxdur, yağı isə Ermənistandan gətirmək olar. İndi bircə ay millət yağsız qalsa, elan olunsa ki, yağ İrəvan bazarında var, hücum edib torpaqlarımızı azad edərik. Gör nə qədər uzaqgörən plandır. Təklif edirəm, bu plana görə mənə “Şöhrət” ordeni verilsin. “İgidliyə görə 3-cü dərəcəli vətənə xidmətin tərəqqisinin istiqlalı” medalına da etiraz etmirəm.
Həmçinin, Dövlət Bayrağı Meydanı idarəsinin ləğv edilib Bulvar Nazirliyinə birləşdirilməsi çox yaxşı addımdır. Onsuz külək əsəndə o bayraq idarəsi işsiz qalırdı, Bakıda isə ildə 360 gün külək əsir. Həmçinin, idarənin müdirləri satqın çıxırdılar.
İdarəçiliyin bu cür səmərəli qurulması başqa nazirlik və komitələr üzərində davam etdiriləcəkdir - mən bunu intuisiya ilə duyuram. Neftin qiyməti düşməzdən qabaq mənim sümüklərim sızıldayır. Deyilənə görə, bunun adı neft revmatizmidir.
Uzun sözün qısası, yaxın vaxtlarda Müdafiə Nazirliyi ilə Kənd Təsərrüfatı Nazirliyi birləşdiriləcək, Kənd Təsərrüfatını Müdafiə Nazirliyi olacaq. Soğan əkənləri qorumaq lazımdır. Mədəniyyət Nazirliyi isə Xarici İşlər Nazirliyinə birləşməlidir, çünki ikincinin bəzi işçiləri çox ağını çıxarıblar, hətta Latviyada səfir işləyən adamımızın xanımı yerli yol polisindən “prava” almaq üçün rüşvət ödəyibdir, Azərbaycan həqiqətlərini dünyada tanıdıbdır. Bu nazirlikdə ciddi mədəniyyət çatışmazlığı sindromu vardır.
Başqa təkliflərim də var idi, heyf yer qalmadı.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər