Müxalifət inqilab istəmir |
Müəllif: Admin | Bölmə: Xəbərlər | Vaxt: 26-01-2016, 22:11 | Şərh sayı: (0) | Baxılıb: 252
Müxalifət inqilab istəmir
“Müxalifət liderlərinin borcu, vəzifəsi, məsuliyyəti ondan ibarətdir ki...” Ölkədə iqtisadi böhran dərinləşdikcə narazı əhalinin sayının çoxalması bir sıra siyasi dairələrdə prosesin gec-tez inqilabi situasiyanın yaranması ilə nəticələnəcəyi fikrini yaradıb. Bəs müxalifət partiyaları bu barədə hansı fikirdədir? İddiaları doğru sayırlarsa, inqilaba hazırlaşırlarmı və hazırdırlarmı?
Azərbaycan Xalq Partiyasının sədri Pənah Hüseyn bildirdi ki, Azərbaycanda xaos və bu tipli inqilabın olması labüd deyil. Amma ölkədə inqilabi dəyişikliklərə zərurət var: “Ölkənin düşdüyü böhrandan və daha ağır situasiyalardan çıxması üçün inqilabi islahatlara ehtiyac var. Müxalifət də əvvəla, bu dəyişikliklərin baş verməsi üçün çalışmalıdır və onun missiyası da bundan ibarətdir. İkincisi isə müxalifətin təkcə vəziyyətin idarə olunan proses yox, idarəolunmaz şəkildə davam edəcəyi hallara da müəyyən hazırlıqları olmalıdır. Əslində proses özü bunu hazırlayır. Bu baxımdan şübhəsiz ki, hadisələrin bir neçə variantına hazır olmaq lazımdır. Amma yalnız o halı nəzərdə tutmaq lazım deyil ki, inqilabi xaos olacaq. Sadəcə, inqilabi dəyişikliklərə nail olmaq lazımdır”.
P.Hüseyn vurğuladı ki, indiki böhrana qarşı cəmiyyətin potensialının səfərbər olunması, ümummilli həmrəyliyin ortaya qoyulmasına ehtiyac var: “Əgər müxalifət buna nail ola bilərsə və iqtidardakı müəyyən dairələri də buna inandıra, yaxud vadar eləyə bilərsə, bu, ciddi addım olar. Əslində ölkənin böhrandan çıxmasının əsas mənbələrindən biri müxalifətin güclənməsindən keçir. Bu güclənmə də cəmiyyətə yansıyaraq şüurlu proseslərin getməsinə imkan yaradar. O baxımdan hazırda müxalifətin və onun liderlərinin borcu, vəzifəsi, məsuliyyəti ondan ibarətdir ki, bu böhranı dərinləşdirmək əvəzinə böhrandan çıxmaq üçün səy göstərsinlər, əsas da odur özlərini gücləndirsinlər. Özlərini gücləndirmək üçün də xalqla əlaqələrini intensivləşdirsinlər. Məsələn, son dövrlər belə fikirlər səslənir ki, bir ümumxalq hərəkatına ehtiyac var. Hərəkat tipli təşkilatlanmaya ehtiyac var. Bunu edə bilərsə, məncə, müxalifət indiki situasiyada xalqa və dövlətə özünün ən böyük töhfəsini verə bilər”.
Vətəndaş və İnkişaf Partiyasının sədri Əli Əliyev bildirdi ki, içində olduğumuz şəraitin böhran olması bəllidir. Odur ki, hələlik iqtisadi və maliyyə sektorunu bürümüş, artıq sosial sferaya sıçramış və yaxın gələcəkdə siyasi mühiti ağuşuna alacaq reallıq özündə inqilab potensialı da daşıyır: “Nə qədər ağır olsa da, etiraf etməliyik ki, bu günə qədər iqtidar vəziyyətə adekvat davranmır. Özünü siyasi baxımdan ”tox" göstərməyə cəhd edən hakimiyyət yaxın gələcəkdə böhran reallığını etiraf etmək məcburiyyətində qalacaq. Çünki hakimiyyətdaxili münasibətlər də gərginləşməkdədir, hakimiyyət mənsubları B, C və digər ssenarilərə hazırlıqlara başlayıblar. ANS-dəki “Hesabat” olayı bu korlanan münasibətlərin aşkar təzahürüdür. Hakimiyyətdaxili münasibətlər sisteminin durumu, oradakı qrupların qarşılıqlı münasibətləri ölkə siyasətinin tablosuna həlledici təsir gücünə malik əsas amildir. Mənə görə inqilab dövləti çıxarlarımız üçün ziyanlı trayektoriyadır. Ölkənin dayanıqlılığı üçün təkamül ssenarisinə hazırlaşmaq daha məqbul sayılmalıdır. Təbii ki, təkamül ilk növbədə hakimiyyətin vəziyyətə adekvat münasibətindən-güzəştli mövqedən keçir. Unutmaq lazım deyil ki, dövlət müharibə şəraitində, şimal və cənub qonşularımızın imperiya iddiaları, dünya qlobal güclərinin iqtisadi ekspansiyası, ideoloji mərkəzlərin beyin işğalı reallığında yaşayır. Ən azı dövlətçiliyi hifz etmək baxımından emosiyadan kənar mövqe tutulmalı, axarı təkamülə yönəltmək lazımdır".
Ə.Əliyevin sözlərinə görə, situasiya nəzarətdən çıxacağı təqdirdə, dövlətin dəngəsini qoruyacaq instutisional infrastruktur, o cümlədən siyasi infrastruktur mövcud deyil. Ən azı bu səbəbdən inqilab eksperimenti yolverilməzdir. Dövləti laboratoriyaya, insanlarımızı sınaq subyektinə çevirmək qətiyyən olmaz.
Müsavat başqanının müavini Elman Fəttah isə bildirdi ki, partiya 2016-cı il üçün fəaliyyət planını açıqlayıb. Həmin planda Müsavatın qarşıdakı aylarda həyata keçirməyi nəzərdə tutduğu işlər qeyd olunub: “Təhlillər göstərir ki, hakimiyyət idarəetmə imkanlarını günü-gündən itirir. Müsavat ölkənin, vətənin taleyinə məsuliyyət daşıdığının fərqindədir. Bu baxımdan Müsavat Partiyası ölkəni gözləyən müsbət və mənfi bütün situasiyalarda hər şeyin xalqın və vətənin xeyrinə yekunlaşması üçün mümkün hazırlıqlarını görür”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər