Rayonlardakı narazılığı müxalifətə bağlamaq cəhdi etiraz doğurdu |
Müəllif: Admin | Bölmə: Xəbərlər | Vaxt: 15-01-2016, 10:18 | Şərh sayı: (0) | Baxılıb: 318
Rayonlardakı narazılığı müxalifətə bağlamaq cəhdi etiraz doğurdu
Deputat antiböhran tədbirlərinin anonsunu verdi; İqbal Ağazadə: “Burada müxalifət izi axtarmağın, vətəndaşın etirazına siyasi çalarlar verməyin heç bir mənası yoxdur”Lənkəranda, Siyəzəndə, Füzulidə, Biləsuvarda, Ağcabədidə və Ağsuda vətəndaşların küçələrə çıxaraq hökumətdən çörək və iş tələb etməsi ölkənin çox ciddi iqtisadi böhranın astanasında olmasından xəbər verir. Belə bir vəziyyətdə 55 aksiyaçının həbsi, aksiyaların güc tətbiq etməklə dağıdılması, tutulanların ən müxtəlif qruplara qaynaq edilməsi cəhdləri böhranın aradan qaldırılmasına yardımçı ola bilərmi?
Çörək istəyənə “niyə çörəksizsən” sualını vermək əvəzinə bibər qazına “qonaq” etmək, rezin güllə qarşısında qoymaq nə dərəcədə adekvat addımdır?
Parlamentin İqtisadi siyasət, sənaye və sahibkarlıq komitəsinin üzvü, deputat Vahid Əhmədov deyir ki, xalqla danışıq aparmağın tərəfdarıdır: “Mən onun tərəfdarıyam ki, vətəndaşla danışmaq lazımdır. Yerli icra hakimiyyəti orqanları insanlarla işləməli, onlara kömək etməlidirlər. Bunun əvəzində gedib başqa işlərlə məşğul olmamalıdırlar. Küçəyə çıxan vətəndaşla danışıq aparmaq lazımdır. Onları başa düşürük, bilirik ki, çətin durumdadırlar. Adamlar ailələrini dolandırmalıdırlar. İcra hakimiyyətləri kabinetlərdən çıxmalı, xalqın arasında olub əhali ilə işləməlidirlər. İş yerlərinin olmamasının günahkarları ilk növbədə icra başçılarıdır. Rayona təyinat alan kimi ilk işləri köhnə başçının tikib qoyduqlarını söküb yenidən tikməkdir. Bunun əvəzinə əhalinin məşğulluğunu təmin etmək üçün istehsal sahəsi, sex açmalıdırlar. Bəzi icra başçıları var ki, əhali ilə görüşlər təşkil edir, vətəndaşın dərd-səri ilə maraqlanır, problemlərinin həllində yardımçı olmağa çalışırlar. Daimi təmas var. İnsanları həbs etməklə böhran aradan qalxan deyil”.
V.Əhmədov deyir ki, problemlərin aradan qaldırılması üçün hökumətə təkliflər veriblər: “Banklara borclu olan vətəndaşlarla bağlı təkliflərimiz olub. Bu gün Neft Fondu banklarda problem yaranmasın deyə 200 milyon dollar ayırdı. Cənab prezidentin göstərişinə əsasən, hökumət addımlar atır və yaxın zamanlarda bəhrəsi yəqin ki, respublikanın həyatında görünəcək. Biz millət vəkili olaraq Azərbaycan hökuməti ilə, Mərkəzi Bankla müəyyən danışıqlar aparırıq ki, iqtisadi böhran respublikada yüngül keçsin. Devalvasiyanın nəticələrinin aradan qaldırılması üçün təkliflər vermişik.
Hökumət bizim əhalinin banklara olan 10 min dollara qədər kreditlərini 1 manat 5 qəpik məzənnə götürülməklə ödəməsinə şərait yaradılması təklifimizə artıq baxıb, məlumat verdilər ki, yanvarın 20-dən sonra bu proses həyata keçiriləcək. Unun, çörəyin, dərmanın qiyməti ilə əlaqədar müzakirələr aparırıq".
V.Əhmədov bildirdi ki, rayonlar mərkəzləşdirilmiş qaydada ayırmalar dayandırılacaq: “Növbəti illərdə mərkəzi büdcədən rayonlara dotasiyaların tədricən azaldılması, ümumiyyətlə kəsilməsini planlaşdırırıq. Rayon icra başçıları rayonlarda iş yerlərinin yaradılması ilə məşğul olmalıdırlar. Hökumət bu məsələləri nəzərdən keçirir. Biz bu tədbirlərin mümkün qədər tez bir zamanda gerçəkləşməsini də demişik. Əhali görməlidir ki, onun minimal da olsa, qida ehtiyaclarını ödəmək üçün addımlar atılır. Əhalini başa düşmək lazımdır. Həbslər çıxış yolu deyil. Amma asayişin pozulması da çıxış yolu deyil. Sabitliyin qorunması vacib məsələdir”.
Sabiq deputat İqbal Ağazadə deyir ki, hökumətə ölkədə yaşanan böhranın aradan qaldırılması üçün proqram təqdim ediblər: “Hökumətin aclıqdan əziyyət çəkən əhaliyə qarşı yanaşması kökündən yanlışdır. Lənkəranda, Siyəzəndə, Füzulidə, Biləsuvarda, Ağcabədidə və Ağsuda yaşananlarla bağlı verilən bəyanat yanlışdır. Əslində etiraz edən xalqın emosiyalarının bir qədər də coşdurulmasıdır. Adam çörək istəyir, başqa şey istəmir ki? Adam çörəyi ala bilməsi üçün iş istəyir, başqa şey istəmir ki? Adamların siyasi tələbləri yoxdur! Şüarı ortada yoxdur! Heç bir siyasi tələbi olmayan vətəndaşla bu şəkildə davranmaq çox yanlışdır və hökumətin bu istiqamətdə ardıcıl səhvləri oldu”.
İ.Ağazadə bildirib ki, hökumətə böhrandan çıxmaq üçün proqram təqdim ediblər: “Hökumət təqdim etdiyimiz proqramla hərəkət etsə, ölkədə heç bir qarşıdurma olmayacaq, iqtisadi böhranın aradan qaldırılması ləng də olsa baş tutacaq. Ən başlıcası iqtisadi böhranla siyasi böhran birləşməyəcək. Bu gün Azərbaycanda iqtisadi böhran var. Xarici münasibətlərdə isə çox ciddi siyasi böhran yaşanır. Bunu hər kəs bilməlidir. İqtisadi böhran bir qayda olaraq son nəticədə sosial-siyasi böhrana çevrilir. Bunun baş verməməsi üçün dialoqa ehtiyac var. Rayonlarda camaatı küçəyə çıxaran aclıq, səfalət, işsizlikdir. Əvvəllər rayonlarda yaşayan ailə başçılarının böyük əksəriyyəti Bakı şəhərində tikinti sektorunda çalışırdı. Statistika Komitəsinin rəsmi məlumatına görə, layihələrdə 911 minə yaxın insan çalışırdı. Bu insanların 541-i tikinti sektorunun payına düşürdü. Tikinti sektoru iflic vəziyyətindədir. Bu sektorda çalışanların təxminən 80 faizi rayonlardan Bakıya gələn vətəndaşlarımız idi. Gündəlik qazandıqları vəsaitin böyük hissəsini rayona göndərir, burada kirayə haqqı ödəyib birtəhər yaşayırdılar. Tikinti sektorunda iş dayanıbsa, deməli, həmin adamların böyük bir hissəsi rayonlara qayıdıb. Rayonlarda isə iş yeri yoxdur. Həmin adamların gündəlik ərzaq məhsullarını almağa da imkanları yoxdur. Təbii ki, bununla da aclıq başlayır”.
İ.Ağazadə müxalifətçiləri prosesə qatma cəhdlərinin səbəbini belə izah etdi: “Hakimiyyət prosesləri ənənəvi qaydada yatırtmaq, durdurmaq niyyətindədir. Amma bu ənənənin özündə törəmə səbəbləri fərqlidir. Törəmə səbəbləri fərqli olduğuna görə bu yanaşma doğru deyil. Törəmə səbəbləri başqa olduğuna görə burada müxalifət izi axtarmaq, vətəndaşın etirazına siyasi çalarlar verməyin heç bir mənası yoxdur. Adamlar nə müxalifətə, nə hakimiyyətə, nə də bir başqa qüvvəyə görə küçəyə çıxıb. Adamlar çörək istəyir. Çörək olmayacaqsa, adamlar yenə də küçəyə, meydana çıxacaq. Heç kim balasını zülmün, zillətin, aclığın içində qoyub evdə oturmayacaq, küçəyə çıxacaqlar. Bunu həll etmək lazımdır. Bura müxalifəti zorla qaynaq etmək, xaotik etirazları müxalifətin təşkil etdiyini söyləmək düzgün deyil. Adamlar çörək istəyirlər. Hakimiyyətin içində olan millət vəkilləri belə hökuməti, ayrı-ayrı inhisarçıları tənqid edirlər. Bu tərəfdən də aclığın küçəyə çıxardığı 55 nəfəri güc strukturları həbs edib adlarını müxalifətçi qoyur. Bu ziddiyyətlər ondan xəbər verir ki, prosesin özünə sistemli və ardıcıl, həm də tənqidi yanaşmaları yoxdur”.
İ.Ağazadə deyir ki, hakimiyyət proseslərə adekvat yanaşmır: “Əvvəla, böhranın olduğunu etiraf etmək lazımdır. Böhranı etiraf etmədən çıxış yollarını müəyyən etmək mümkün deyil. Hakimiyyət böhran anlayışını yaxın buraxmaq istəmir. Deyirlər ki, dünyanın hər yerində belədir. Nəzərə almırlar ki, dünyanın heç bir yerində vəziyyət Azərbaycandakı qədər deyil. Çünki dünyanın heç bir yerində neftdən bu qədər asılılıq yoxdur. Azərbaycan dövlətində ixracat potensialının 95 faizi karbohidrogen ehtiyatlarının fonunda həyata keçirilib! Bu o deməkdir ki, ölkə bir sektorun üzərində oturmuşdu. O sektor bizdən asılı olmayan, özü də bizim qarşısını ala bilməyəcəyimiz səbəbdən çökdü. Demək, biz idarəetmədə və iqtisadiyyatda fərqli modellər tətbiq etməliyik. Bu işlər gələn neft pullarının hesabına edilməli idi. Amma biz bunu etmədik və bu nəticə alındı. İndi də fəsadları aradan qaldırmaq üçün yenə də yanlış yollara baş vururuq. İqtisadi böhranın aradan qaldırılması üçün sistemli və ardıcıl addımlar atılmasa, sosial-siyasi böhran qaçılmaz olacaq, ölkə çox ciddi kataklizmlərlə üz-üzə qalacaq”.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər