Müxalifət partiyasının sədri fermer təsərrüfatını arıçılıqla əvəz edib |
Müəllif: Admin | Bölmə: Xəbərlər | Vaxt: 29-01-2016, 20:34 | Şərh sayı: (0) | Baxılıb: 239
Müxalifət partiyasının sədri fermer təsərrüfatını arıçılıqla əvəz edib
“Maddi imkanım olsa, dövlət dəstək versə, bu imkanı və dəstəyi turizm sektoruna yönəldərəm”Azərbaycan iqtidarı neftin ucuzlaşmasından Azərbaycanın gəlirlərinin aşağı düşməsini qeyri-neft sektorunun, o cümlədən aqrar sahənin sürətli inkişaf etdirilməsi və yeni özəlləşmənin həyata keçirilməsi ilə kompensasiya etmək istəyir. Artıq bəyan edilib ki, kənd təsərrüfatının inkişafı üçün yerlərdə fermerlərə, bu işdə təcrübəsi olan insanlara hökumət hər cür dəstək verəcək. İqtisadçılar bunu çoxdan edilməli olan doğru taktika hesab edirlər.
Azərbaycan siyasətçiləri arasında fermer təsərrüfatı ilə məşğul olan yeganə siyasətçi Azadlıq Partiyasının sədri Əhməd Orucla söhbətimizdə təsərrüfatını genişləndirmək üçün bu imkandan yararlanmaq fikrində olub-olmadığını soruşduq.
Əhməd Oruc öncə bildirdi ki, aqrar sektorun inkişafı, kənd təsərrüfatına xüsusi diqqət ayrılacağı ilə bağlı bəyanatlar səslənsə də hələ ki ortada əməli addımlar yoxdur. Ölkənin kənd təsərrüfatını, iqtisadiyyatını hazırkı hökumətlə, talançı icra başçıları ilə inkişaf etdirmək mümkün olmayacaq. Kənd təsərrüfatının inkişafı üçün dövlət vəsaitlər ayırsa belə, korrupsiyaya öyrəşmiş məmurlar təbəqəsi yenə həmin vəsaitləri müxtəlif yollarla mənimsəyəcəklər: “Hazırkı hökumət, illərdir rayonlarda əhalini boğaza yığan icra başçıları heç bir islahata imkan verən deyil. Onlar bütün vasitələrlə ancaq və ancaq özlərinin qazanması haqda fikirləşirlər. Son vaxtlar aparılan həbslər, ortaya çıxan informasiyalar da göstərir ki, bu məmur ordusu milyardların üstündə oturub”.
Əhməd Oruc məlumat verdi ki, üç ildir mal-qara saxlamır, təsərrüfatın profilini dəyişib: “Üç ildir arıçılığa keçmişəm. Bu da professional səviyyədə deyil. Əsl arıçı olmaq, bu sahədən ciddi qazanc əldə etmək üçün illər sərf olunmalıdır. Əvvəl təsərrüfatım maldarlıq idi. Ona görə bu işə son qoydum ki, Bakı şəraitində səmərəsi olmadı. Otlaq sahəsi qıtlığı, otun, yemin bahalığı, dava-dərmanın bahalığı, işçilərin əmək haqları mal-qara saxlamaqdan gəlir əldə etməyi mümkünsüz edirdi. Mənim böyük bir büdcəm yoxdur ki, o xərcləri ödəyə bilim. Ona görə də profili dəyişdim. Bir işçi kifayət edir ki, yüzlərlə yeşik arıya qulluq eləyə bilsin. Dövlətin kənd təsərrüfatının inkişafı üçün ayırdığı vəsaitlər isə təəssüf ki, mənim kimi sadə adamların təsərrüfat sahəsinin inkişafına yox, ayrı-ayrı nazirlərin, komitə sədrlərinin, generalların fermalarının, fermer təsərrüfatlarının genişlənməsinə sərf edilib. Azərbaycanda arxasında hansısa böyük məmur dayanmayan, əldə edəcəyi kreditin bir hissəsini rüşvət kimi verməyən adi fermerin öz təsərrüfatını genişləndirmək üçün kredit əldə etməsi indiyə qədər mümkün olmayıb. Bu təcrübədən çıxış edərək düşünürəm ki, əgər bundan sonra da eyni qaydalar qalacaqsa, mənim və mənim kimi adamların kredit üçün müraciət etməsinin mənası olmayacaq. Şəxsən mən düşünürəm ki, maddi imkanım olsa, dövlət dəstək versə, bu imkanı və dəstəyi turizm sektoruna yönəldərəm. Azərbaycana turizmdən böyük gəlirlər gətirmək mümkündür”.
Partiya sədri onu da vurğuladı ki, Azərbaycanda kənd təsərrüfatının inkişafı potensialı var. Sadəcə, bundan normal yararlanmaq lazımdır: “Azərbaycanın əkinə yararlı olan, suvarılması mümkün olan ərazisinin böyük bir qismi istifadəsiz vəziyyətdədir. Bu da sistemsiz yanaşmanın, yuxarıda sadaladığım vəziyyətin nəticəsidir. Azərbaycanın bütün ərazisini suvarılan, əkinə yararlı torpaqlara çevirmək imkanları var. Azərbaycanın iqlimi elədir ki, il boyu, ildə iki dəfə məhsul götürmək mümkündür. Yerlərdə fermerlərə real şərait yaradılsa, onlardan rüşvət tələb edilməsə, dərman, toxum, yem monopoliyada olmasa, fermerlərin əldə etdikləri məhsulların normal qiymətə satılması üçün dövlət şərait yaratsa, inanın ki, Azərbaycan özünü kənd təsərrüfatı məhsulları ilə yüz faiz təmin edə bilər və ucuzluq yaranar. Eyni zamanda illər uzunu kəndlərdən işsizlik ucbatından Bakıya axın etmiş əhali geri qayıdar”.
Əhməd Oruc özünün və digər bir qrup partiya sədrinin birləşib ortaya pul qoymaqla özəlləşməyə çıxarılacaq hansısa böyük obyektlərin özəlləşdirilməsi və nümunə olaraq işlətməsinin mümkün olub-olmadığı barədə sualımıza cavabında isə dedi ki, əvvəla, müxalifətin maddi imkanı, ikincisi, iqtidarın müxalifətə münasibəti buna imkan vermir: “Sizin verdiyiniz sualda nəzərdə tutulan hal Azərbaycan kimi ölkə üçün deyil. Burda müxalifətin heç böhrandan çıxmaq üçün normal təklifləri belə hakimiyyət tərəfindən qəbul edilmir. Müxalifətçilərə uzaqdan-uzağa qohumluğu çatan iş adamları bu illər ərzində sıradan çıxarılıb. İndi siz düşünürsünüz ki, müxalifət liderlərinə hansısa böyük obyekti özəlləşdirməyə imkan verəcəklər?
Özəlləşməyə gedilməsi də korrupsiyaya bulaşmış oliqarxların əmlaklarının bir qədər də artmasına gətirib çıxaracaq. Oliqarxlar indiyə qədər özəlləşdirə bilmədikləri böyük ərazisi olan müəssisələri ucuz qiymətə özününküləşdirəcəklər, büdcəyə az vəsait daxil olacaq, oliqarxlar isə əmlaklarının sayını bir az da artırmış olacaqlar. Ona görə də hansı yöndən baxsaq görərik ki, hazırkı hökumət buraxılmayınca, indiki icra başçıları korrupsiyaya bulaşmamış şəxslərlə əvəz olunmayınca, hökumət müasir iqtisadiyyatı, kənd təsərrüfatını bilən şəxslərdən təşkil olunmayınca, islahatlar, ayrılacaq vəsaitlər, dövlət dəstəyi müsbət nəticə verməyəcək.
İndiki vəziyyətdə isə belə görünür ki, Azərbaycan iqtidarı Pakistan yolunu tutur".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər