Vahid Əhmədov: “Prezidentin təqdim etdiyi 7 qanun layihəsi inqilabi dəyişikliklərdir” |
Müəllif: Admin | Bölmə: Xəbərlər | Vaxt: 19-01-2016, 19:06 | Şərh sayı: (0) | Baxılıb: 178
Vahid Əhmədov: “Prezidentin təqdim etdiyi 7 qanun layihəsi inqilabi dəyişikliklərdir”
Mərkəzi Bankın İdarə Heyətinin sədri Elman Rüstəmovun və iqtisadi inkişaf naziri Şahin Mustafayevin də qatıldığı Milli Məclisin növbədənkənar sessiyasında müzakirələr davam edir. İclasda çıxış edən deputat Elmira Axundova kiçik məbləğdə olan bank kreditlərinin və bağlanan banklardakı kreditlərin taleyinin necə olacağı barədə Mərkəzi Bankın İdarə Heyətinin sədri Elman Rüstəmova suallar ünvanladı. O, dedi ki, Rusiyada anoloji vəziyyət yarananda əhalinin durumu nəzərə alındı və qərar verildi.
Spiker Oqtay Əsədov isə dedi ki, Rusiyada ilyarım əvvəl qərar qəbul olunsa da, indiyədək əhaliyə bir rubl da ödənməyib: “İcra olunmayan qərar nəyə lazımdır? Ona görə də, mən bu fikirdəyəm ki, hər şey birdən həll oluna bilməz”.
Deputat Vahid Əhmədov prezidentin təqdim etdiyi 7 qanun layihəsini “inqilabi dəyişikliklər” adlandırdı: “Düzdür, Azərbaycanın 40 milyarda yaxın maliyyə ehtiyatları var. Amma Azərbaycan bu vəsaitlərin gələcək nəsillərə saxlanması üçün müvafiq addımları həyata keçirməlidir”.
V.Əhmədov Azərbaycana gətirilən avadanlıqların 7 il müddətinə vergidən azad olunması barədə təşəbbüsü yüksək qiymətləndirdi.
O, dedi ki, bu, ölkədə sənaye müəssisələrinin qurulması və yerli istehsalın inkişafı üçün bu, çox düzgün addımdır: “Biz bütün bu qanun layihələrini yüksək qiymətləndiririk və təbii ki, qəbul edəcəyik. Ancaq əsas məsələ bu qanunların icrasıdır”.
Deputat gömrükdəki ASAN-laşmanı, inhisarçılığın aradan qaldırılması ilə bağlı tapşırıqları da müsbət qiymətləndirdi: “Azərbaycanda 43 bank var və bu bankların sayı həddən artıq çoxdur. Mən bankların bağlanmasının tərəfdarı deyiləm, amma bankların birləşməsi prosesi həyata keçirilməlidir”.
Özəlləşdirmə ilə bağlı prezidentin verdiyi qərarlara diqqət çəkən V.Əhmədov dedi ki, illər öncə özəlləşdirilən bir sıra obyektlər fəaliyyətini dayandırıb və onların təkrar özəlləşdirməyə çıxarılması məsələsini də qaldırmaq lazımdır: “Mən əminəm ki, cənab prezidentin tapşırıqları yerinə yetirilsə, Azərbaycan iqtisadiyyatının heç bir ciddi problemi olmayacaq”.
Deputat Fəzail Ağamalı dedi ki, ölkədə dollar-manat münasibətləri ilə bağlı “panika” yaranıb, ancaq buna ehtiyac yoxdur: “2003-cü ildə də neftin qiyməti 19 dollara düşmüşdü və manatımız elə də möhkəm deyildi. Onda nə oldu, yaşamırdıq? Bu gün Azərbaycanın böyük potensialı var. Kənd təsərrüfatını inkişaf etdirib, özümüzü tam təmin edə bilərik, xaricdən taxıl, ya quş yemi almarıq”.
“Azərbaycanda nəyə görə kreditlər manatla deyil, dollarla verilir” - deyə, sual edən deputat bunun Konstitusiyaya zidd olduğunu vurğuladı və bunun qadağan olunmasını təklif etdi: “Hansı bank kreditləri dollarla verirsə, cinayət məsuliyyətinə cəlb olunmalıdır. Həmçinin 10 min dollaradək krediti olan şəxslərlə bağlı müsbət qərar verilməlidir”.
Spiker Oqtay Əsədov cavabında “dollarla kredit məcburi verilmir. Mebel almaq istəyən nəyə görə krediti dollarla götürür. Bank heç vaxt məcbur eləmir ki, sən krediti dollarla götür”, - deyə bildirdi.
Deputat Zahid Oruc öncə xatırlatdı ki, parlamentin iclası ölkə başçısının iradəsi ilə çağırılıb. Həmçinin o, spikerə də müzakirələrə şərait yaratdığına görə təşəkkür etdi.
Deputat bildirdi ki, hökumət üzvləri öz aralarında telefonla danışandan sonra danışdıqlarını ictimailəşdirməlidir, əhalini məlumatlandırmalıdırlar: “Hökumətin fəal şəkildə əhalinin qaarşısına çıxması çox önəmlidir”.
Z.Oruc dedi ki, Azərbaycan neftdən maksimum istifadə etməyə çalışdı: “Müharibənin vurduğu zərbələri aradan qaldırmaqla bağlı neftdən başqa ehtyatımız yox idi, bunu açıq deməliyik”.
Z.Oruc dedi ki, yüz minlərlə insan gəlib, Bakıda məskunlaşıb, kirayəni də zorla verir: “Ancaq ekoloji təmiz kəndlərimizdə yaşamaq istəmirik. Bizim kəndlərimiz boşalır. Aqil müəllim əslində, kəndə qayıdış proqramını təqdim etdi. Bu gün bizdə “çomağı çobandan alacaq” növbəti oğul yoxdur, o oğul da Bakıya gəlmək istəyir”.
Deputat məmurların sayının azalması şəraitində iş yerlərinin sayının artdığı barədə yanaşmanı bölüşərək, bildirdi ki, bir adama görə nazirlik yaratmışıq.
Spiker deputatın kənd təsərrüfatının inkişafı ilə bağlı maraqlı və konkret təkliflərini məmnunluqla qarşılayaraq, “sənin gələcək yerin yavaş-yavaş görünür” - deyə, replika verdi.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər