Yaxın Şərqin “sabitlik qalası”na qarşı təhdid |
Müəllif: Admin | Bölmə: Xəbərlər | Vaxt: 13-01-2016, 14:11 | Şərh sayı: (0) | Baxılıb: 264
Yaxın Şərqin “sabitlik qalası”na qarşı təhdid
Türkiyə terror olayları və regional münaqişənin tərəfi olmağa sürüklənir... Britaniyanın, ümumən Qərb dünyasının Yaxın Şərq üzrə ən təcrübəli yazarlarından olan Robert Fisk mətbuata müsahibəsində “Türkiyə, Suriya savaşı tərəfindən işğal edildi” cümləsini işlədib. Əslində bir qədər qaba çıxsa da, bir şey də var ki, təhlükə hər zaman qaba şəkildə ifadə olunur.
Yanvarın 12-də İstanbulun mərkəzində, əhalinin, xüsusən də turistlərin çox getdiyi Sultanahmet meydanında terrorçunun özünü partlatması nəticəsində 10 nəfər öldü, 15 nəfər yaralandı. Ötən il oktyabrın 10-da Ankarada baş verən terror aktından sonra bu, ən qanlı hadisə idi. Artıq terrorçunun ərəb əsilli (bəzi mənbələrdə suriyalı, bəzilərində səudiyyəli olduğu keçir) İŞİD üzvü olduğu dəqiqləşib.
Məsələnin ən qorxunc tərəfi belə terror olaylarının artmasıdır. Ötən ilin yayında Surda, payızda Ankarada, indi isə İstanbulda baş verən terror aktları Türkiyənin Yaxın Şərqdə uzun illərdir mövcud olan “sabitlik qalası” imicini zədələyir. Son terror aktı zamanı ölənlərin hamısı əcnəbi turistlərdən ibarət olması Türkiyə iqtisadiyyatının böyük bir bölümünü əhatə edən turizmə mənfi təsir göstərə bilər.
Əsas zərbə isə qeyd etdiyim kimi, Türkiyənin sabit ölkə imicinə vurulur. Artıq Almaniya turizm şirkətləri bu həftə sonuna qədər İstanbula olan turist səfərlərini ləğv edir və ya başqa vaxta dəyişdirirlər. Eyni zamanda Türkiyə məqsədli şəkildə sanki daxili problemlərlə üz-üzə buraxılır.
Qərb ölkələri və Rusiya da daxil olmaqla, dünyanın əksər dövlətləri terrorla bağlı Türkiyə dövlətinə başsağlığı, dəstək mesajları göndəriblər. İstanbul terrorunda ölənlərdən 9-nun vətəndaşı olduğu Almaniya hökuməti isə Türkiyəyə terrorla mübarizədə dəstək ifadə edib. Kansler Merkel yaydığı bəyanatda terrorla mübarizədə Türk xalqı ilə yan-yana olduqlarını deyib.
Ağ Ev də oxşar bəyanat verib. ABŞ Milli Təhlükəsizlik Şurasının nümayəndəsi Ned Prays deyib ki, ABŞ terror hücumları qarşısında Türkiyənin yanındadır və terrorla mübarizədə Ankaranı dəstəkləməkdə davam edir.
Amma doğrudanmı, bu dəstəklər indi nəyisə ifadə edir?
Son 6 ayda Yaxın Şərqin ən güclü ordusu, kəşfiyyat xidmətinə sahib Türkiyə dövləti ən qanlı terror hücumlarına məruz qalıb. Bu gün də terrorla savaşır, özü də öz sərhədləri daxilində. Doğrudur, indiki dünyada heç bir dövlət terrordan sığortalana bilmir, hətta uzaq Paris və ya Nyu-York belə. Amma bir fərq var ki, o şəhərlər “qaynar bölgələrdən” çox uzaqdırlar, Türkiyə isə alovun düz kənarındadır.
Əlbəttə, bu mövzuda dərin nəzəriyyələr irəli sürmək, işin arxasında “dərin güclər” olması haqda iddiaları da xatırlatmaq olar. Amma buna indi gərək varmı? Türkiyə ağır-ağır Yaxın Şərqdə davam edən savaşa bir parçası olmağa doğru sürüklənir. Cənub-şərq vilayətlərində PKK terror qrupları ilə toqquşmaların davam etməsi, az qala hər ev uğurunda savaş, terrorçuların müqaviməti, üstəlik İŞİD təhdidinin artması Türkiyənin içərisində ciddi təhdidə çevrilib. Bir ay əvvəl İŞİD bəyanat yayaraq İstanbulu ələ keçirəcəyini bildirdi. İndi isə İstanbulun mərkəz yerində terror törədir.
Türkiyə dövləti içdən İŞİD və PKK terroru təhdidi ilə üz-üzə qaldığı bir vaxtda, sərhədlərində - Suriyanın şimalında faktiki olaraq PKK ilə eyni ideologiyaya sahib PYD-nin nəzarəti ələ keçirməsi təhlükəsi ilə üz-üzədir. İraqın Şimalında isə özünü Ankaraya dost kimi göstərən Barzani artıq qurmağa hazırlaşdığı “dövlətin” “sərhədləri” ətrafında xəndək qazır.
Türkiyəyə terror qarşı mübarizədə ən böyük dəstəyi verəcəyini deyən Qərb ölkələri isə faktiki olaraq Ankaranın Suriyanın şimalında “tampon bölgə” yaratmasına imkan vermədi, yarı-aşkar, yarı-gizli şəkildə PKK-nı dəstəkləməkdə davam edir. Biz hələ İŞİD-ə Qərbin dəstək verməsi ilə bağlı iddiaları demirik.
Hazırda qardaş ölkə öz sərhədlərində real təhlükəyə qarşı səfərbər ola bilmir, bunun əvəzinə ölkə içində terrora qarşı mübarizəyə məcbur olur. R.Fiskin ifadəsi bir qədər kəskin olsa da, təhlükənin mənzərəsini anlamaq üçün xeyli dərəcədə dəqiq ifadə sayıla bilər. 2 milyon suriyalı qaçqın, İŞİD və indi də sərhəddə kürd hakimiyyətinin qurulması Türkiyənin Suriya savaşına çəkilməsidir...
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər