ABŞ-ın Azərbaycana işi düşüb |
Müəllif: Admin | Bölmə: Xəbərlər | Vaxt: 15-01-2016, 10:14 | Şərh sayı: (0) | Baxılıb: 241
ABŞ-ın Azərbaycana işi düşüb
Ekspertlər Bakı-Vaşinqton münasibətlərindəki son durumla bağlı gözləntiləri dəyərləndirir... ABŞ prezidenti Barak Obamanın Azərbaycan prezidenti İlham Əliyevi aprel ayında Vaşinqtonda keçiriləcək 4-cü Nüvə Təhlükəsizliyi Sammitinə dəvət etməsi hadisəsindən sonra iki ölkə arasındakı siyasi münasibətlərdə yumşalma hiss olunur. Belə ki, dəvət xəbərinin ardınca yanvarın 13-də prezident İlham Əliyev ABŞ-ın Milli Təhlükəsizlik Şurasının Avropa üzrə baş direktoru Çarlz Kapçanı qəbul edib.
Yayılan rəsmi xəbərdə bildirilir ki, görüşdə Azərbaycan-ABŞ ikitərəfli münasibətlərinin müxtəlif istiqamətlərdə inkişafından danışılıb, ölkələrimiz arasında bir çox sahələrdə tərəfdaşlıq münasibətlərinin qurulmasından məmnunluq ifadə olunub. Həmçinin beynəlxalq terrorizmə qarşı mübarizə, təhlükəsizlik sahəsində əməkdaşlıq məsələlərinə toxunularaq Azərbaycan hərbçilərinin Əfqanıstandakı sülhməramlı missiyanın tərkibində uğurlu fəaliyyətinin əhəmiyyəti vurğulanıb.
Ekspertlər hesab edirlər ki, ABŞ üçün dost yox, sadəcə, dövlət maraqları var. Bu baxımdan hesab olunur ki, ABŞ-ın Qafqazda və xüsusilə də Azərbaycanda yeni maraqları yaranıb. Bu səbəbdən iki ölkə arasında münasibətlər yenidən yumşalan xətt üzrə inkişaf edir. Bəs ABŞ-ın Azərbaycandan bu dəfə istəyi nədir?
Politoloq Fərhad Mehdiyev “Yeni Müsavat”a bildirib ki, Amerikanın Azərbaycandan istəkləri dəyişməyib: “Əvvəllər nə istəyirdisə, indi də elə onu istəyir. Dəyişiklik yoxdur. Amerika Azərbaycanda şəffaf cəmiyyət istəyir. Bura isə başlıca olaraq açıq sərhədlər və monopoliyasız iqtisadiyyat daxildir. Eyni zamanda məsələ Rusiyanın Qafqazda güclənməsinə imkan verməməkdir. Belə ki, SSRİ-nin dağılmasından sonra ABŞ davamlı və sabit olaraq yeni respublikaların müstəqilliyini dəstəkləyib və onları Rusiyanın təsir dairəsindən uzaqlaşdırmağa çalışıb. İndi də məsələ eynidir”.
Politoloq Mübariz Əhmədoğlu isə hesab edir ki, bundan sonra ABŞ və Azərbaycan arasında münasibətlərin daha da yumşalması gözlənilir: “Öncəliklə Obamanın Azərbaycan prezidentini Nüvə Təhlükəsizliyi Sammitinə dəvət etməsinə diqqət edək. Bu dəvət Amerikanın daxilində Azərbaycana qarşı münasibətlərdə birmənalı neqativliyin olmadığını göstərdi. Obama administrasiyasının Azərbaycana dəvəti siyasiləşmiş məsələdir. Bununla da ABŞ prezidenti dövlət daxilində bəzi nümayəndələrə öz mesajını verdi ki, Azərbaycan bizə müttəfiq dövlətdir. Ola bilər ki, Nüvə Sammitində Dağlıq Qarabağ məsələsi ciddi şəkildə müzakirə ediləcək. Bunu ATƏT-in amerikalı həmsədri Ceyms Uorlikin davranışlarından da müşahidə etmək olar. Baxın, əvvəllər Uorlik qoşunların təmas xəttində vəziyyətin gərginləşməsini təbliğ edirdisə, indi iki tezisin də ətrafında fikir yürüdür. Bunlardan biri hərtərəfli sülh sənədinin hazırlanması, ikincisi isə Dağlıq Qarabağın azərbaycanlı və erməni icmalarının dialoqudur. Bu tezislərin ikisi də Azərbaycanın Dağlıq Qarabağ siyasətinin əsas sütunlarıdır. Biz də deyirik ki, hərtərəfli sülh sazişi imzalamalıyıq və icmaların danışığının tərəfdarıyıq. Bütün bunlar isə ermənilərin marağına ziddir. Amerikadan Azərbaycana qarşı söylənilən insan hüquqları ilə bağlı fikirlərin hamısı ermənilərin maraqlarının müdafiəsinə xidmət edir. Hesab edirəm ki, Amerika bu kimi məsələləri anlayıb. Çarlz Kapçanın da Bakıya gəlişi bunun göstəricisidir”.
Politoloq bildirib ki, ABŞ Azərbaycana Səudiyyə Ərəbistanı və İran münasibətləri ilə bağlı hansısa təklif verməz: “ABŞ-ın İslam dünyası ilə bağlı təxminən on il öncə qəbul etdiyi konsepsiyasında qeyd olunur ki, Türkiyə sünni, Azərbaycan isə şiə cəmiyyətləri üçün nümunəvi dövlət olmalıdır. Bu baxımdan hesab etmirəm ki, ABŞ Azərbaycanı anti-İran, yaxud Səudiyyə Ərəbistanının xeyrinə hansısa aksiyada iştiraka dəvət etsin. Lakin başqa bir məqam var. Amerika Azərbaycanda inam yaratmaqla, Rusiyanın Qafqazda inkişafına mane ola, ortaya öz məqsədlərini qoya bilər. Amerikanın Azərbaycandan hazırkı dövrdə istəyi bu ola bilər. Azərbaycan da öz maraqlarına uyğun layihələri müzakirə edib qərar qəbul edəcək. Son zamanlar Amerikadan Azərbaycana qarşı təzyiqlər o qədər artıb ki, bu səbəbdən Rusiyadan gələn geosiyasi dəstəkləri çox həvəslə qəbul edirik. ATƏT-lə Azərbaycan arasındakı ədavətə dair Rusiya Xarici İşlər Nazirliyinin bir neçə bəyanatı, mövqeyi var. Ancaq ABŞ-dan bunu görmədik”.
Politoloq hesab edir ki, son zamanlar müzakirə edilən ABŞ-dan Azərbaycana qarşı sanksiya məsələsi irəliləməyəcək: “ABŞ və Azərbaycan arasında hər zaman gərginliyi yaradan birinci tərəf olub. Ümid edirik ki, bu son gərginlik olacaq və iki ölkə arasında münasibətlər bundan sonra daha da inkişaf edəcək”.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər