İqtisadi möcüzənin ən sadə resepti |
Müəllif: Admin | Bölmə: Xəbərlər | Vaxt: 3-02-2016, 02:07 | Şərh sayı: (0) | Baxılıb: 267
İqtisadi möcüzənin ən sadə resepti
ABŞ-dan xeyli müddətdir Azərbaycanla bağlı ancaq neqativ xəbərlər eşidirik. Amma dünən tilsim bir azca qırıldı, budəfəki xəbər ürəkaçan oldu. Məğzi də belə idi ki, Pensilvaniya Universitetinin dünyanın aparıcı beyin mərkəzlərinin reytinqi ilə bağlı beynəlxalq hesabat hazırlayıb və orada azərbaycanlı iqtisadçı alim Vüqar Bayramovun rəhbəri olduğu İqtisadi və Sosial İnkişaf Mərkəzi (CESD) Güney Qafqaz və Orta Asiyanın ən güclü “beyin mərkəzi” elan edilib.Sözsüz ki, Azərbaycanda iqtisadiyyat üzrə dünyada rəyi mötəbər sayılan başqa savadlı, görkəmli iqtisadçılar da var. Biri elə Vüqar bəyin doğma qardaşı Qubad İbadoğlu. İl yarım öncə, o, hətta Qırğızıstan hökuməti tərəfindən iqtisadi müşavir kimi işləmək dəvəti almışdı. O zaman fəxarət hissi keçirmişdik ki, bizim iqtisadçı kadrlarımızın potensialı xaricdə nəinki qiymətləndirilir, üstəlik, onlara hökumətdə işləmək dəvətləri gəlir. Təbii ki, bu kimi xəbərlər ölkənin beynəlxalq imicinə də pozitiv xallar gətirməkdədir.
Bu günlərdə isə Qubad İbadoğlu Azərbaycanı indiki ağır böhrandan qısa zamanda çıxarmaq və köklü islahatlara keçidi təmin eləmək üçün aydın bir proqram ortaya qoymuş, optimal model təklif eləmişdi. Həmçinin də bizim sabiq maliyyə naziri Saleh Məmmədov kimi digər təcrübəli iqtisadçılarımız var və vaxtaşırı onlar da hökumətə dəyərli təkliflərini ünvanlayırlar.
Amma çifayda? Əfsuslar olsun ki, ölkənin bunca nüfuzlu, dünyada qiymətləndirilən iqtisadçı alimi və kadrı ola-ola, onların bacarıq və zəkasından Azərbaycanın özündə faktiki surətdə istifadə olunmur, xaricdən onlara işləmək dəvəti gəldiyi halda, öz quru qürurunun əsirinə çevrilən yerli hökumətdən, özümüzdən gəlmir. Guya böhran adında Azərbaycanda bir şey yoxmuş.
Amma ölkə iqtisadi böhran məngənəsində çapalamaqda davam edir. Altını isə zəngin və hər cür iqtisadi uğura, iqtisadi möcüzəyə asanca nail olmaq imkanında olan bir məmləkətin xalqı çəkir. Sizli-bizli hamımız çəkirik. Çünki Azərbaycanda manatın ikinci çöküşündən sonda da islahatların özü deyil, görüntüsü var məmləkətdə, ağılı iqtisadçıların təklifləri hələ də bu məmləkətdə ciddiyə alınmır, qəribçiliyə salınır, bəzən sadəcə, qısqanclıqla qarşılanaraq rədd edilir.
Əvəzində korrupsiyanın, monopoliyanın, qeyri-şəffaflığın saxlanması şərtilə iqtisadi möcüzəyə ümid edilir. Belə bir şey isə heç vaxt dünya praktikasında olmayıb, gözlənilmir də. Ona görə ki, azad bazar iqtisadiyyatı ilə, azad biznes qanunları ilə sadalananlar daban-dabana ziddiyyətdədir.
Vaxt isə gözləmir. Bu gün Azərbaycanın itirdiyi hər gün bəlkə də az sonra ona illərə başa gələcək – mübaliğəsiz. Bunu indi təkcə biz demirik, biz yazmırıq; ölkədəki mövcud iqtisadi-sosial durumu dərindən təhlil edib nəticələr çıxaran yerli və əcnəbi ağıllı başların hamısı bəyan edir.
Çıxış yolu isə sadədən sadədir: ləngimədən bacarıqlı və savadlı kardlardan ibarət islahatçı komanda formalaşdırıb yaxın-uzaq iqtisadi hədəfləri dəqiqləşdirmək və qolları çirmələyib işə başlamaq. Nəmxuda, hamısı Azərbaycanda var, artıqlaması ilə. Çatışmayan bircə şey varsa o da kardinal dəyişikliyə qərar vermək üçün siyasi qətiyyətdir.
Bizim Ukrayna kimi başqa ölkələrdən, hətta qardaş Türkiyədən mütəxəssis cəlb eləməyə də ehtiyacımız yox. Deyildiyi kimi, gərəkənlər bizdə var: baş - bizdə, beyin - bizdə, “beyin mərkəzləri” - bizdə, iqtisadi möcüzənin ən sadə resepti – o da bizdə!
Qalır “həkimin” havayı və təmənnasız yazdığı “resepti” götürüb hərəkətə keçmək.
Musavat
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər