Prezidentin tənqidinə reaksiyaların ortaya çıxardığı həqiqət |
Müəllif: Admin | Bölmə: Xəbərlər | Vaxt: 2-02-2016, 12:45 | Şərh sayı: (0) | Baxılıb: 262
Prezidentin tənqidinə reaksiyaların ortaya çıxardığı həqiqət
Elxan Şahinoğlu: “Müxalifət liderləri davranışları və aralarındakı ixtilaflarla dövlət başçısını haqlı çıxarırlar”Prezident İlham Əliyevin ötən həftə Azərbaycan Gənclərinin Birinci Forumunun 20 illiyi münasibətilə ölkə gənclərinin bir qrupu ilə görüşündə diqqətçəkən məqamlardan biri hazırkı müxalifət liderlərinin ünvanına tənqidi fikirlər səsləndirməsi oldu.
İlham Əliyev bildirib ki, Xalq Cəbhəsi-Müsavat hakimiyyəti böyük bəla idi: “Birincisi, 1992-ci ildə onlar hakimiyyəti qanunsuz yollarla zəbt etmişdilər. O vaxt Dağlıq Qarabağda qanlı döyüşlər gedirdi. Ancaq onların əsas məqsədi nəyin bahasına olursa-olsun hakimiyyətə gəlmək idi. Hətta bəziləri sevinirdilər ki, Şuşa, Laçın işğal altına düşüb və bu, tezliklə əvvəlki hakimiyyətin yıxılmasına gətirib çıxaracaqdır. Hakimiyyəti zəbt edəndən sonra onlar Azərbaycanı faktiki olaraq uçurum kənarına qoymuşdular.
İkincisi, əgər o vaxt Azərbaycana rəhbərlik edənlərin şəxsiyyətlərinə nəzər salsaq, heç bir şərhsiz görərik ki, bu adamlar nəinki ölkəni, bir kolxozu da idarə edə bilməzlər. İndi gənclər təbii ki, bu tarixi, əlbəttə, bilə bilməzlər. Amma baxın, kimlər Azərbaycanı idarə etmişlər. Parlamentin sədri kiçik elmi işçi idi, 11 il ərzində kiçik bir dissertasiyanı müdafiə edə bilməmişdir. Baş nazir, yumşaq desək, ticarətlə məşğul idi, kiçik ticarətlə, özü də o ticarət mövsümi xarakter daşıyır. Dövlət katibi komsomolçu idi - sonradan flyuger kimi əqidəsini dəyişmiş və xalq hərəkatına qoşulmuş birisi. Ondan sonrakı dövrdə də bir neçə dəfə əqidəsini dəyişmişdi. Hətta 1990-cı illərin ortalarında hakimiyyətlə sıx əlaqədə olaraq parlamentdə də təmsil olunurdu. Ancaq silahdaşları, yoldaşları onu yaxşı tanıyırlar. Ağır vaxtda öz liderinə xəyanət etmiş insan əlbəttə ki, yüksək keyfiyyətlərə malik ola bilməz.
Yəni, budur, Azərbaycan Xalq Cəbhəsi-Müsavat hakimiyyətinin öndə gedənləri. Bu adamlar ölkəni necə idarə edə bilərdilər?! Hakimiyyətə gələndən sonra dərhal onlar bir-biri ilə mübarizəyə başlamışlar. Bu mübarizə və eyni zamanda, xalq tərəfindən onlara olan inamsızlıq, mənfi münasibət nəticəsində cəmi 1 il hakimiyyətdə qala bilmişlər. Ondan sonra onlar üçün vəziyyət gərginləşəndə-1993-cü ilin yaz-yay aylarında onlar bütün vəzifələrdən gedərək bəziləri ölkəni tərk etmişlər, qaçıb gizlənmişlər və onların dırnaqarası cəsarəti artıq aradan getmişdir".
Məlum olduğu kimi, AXC-Müsavat iqtidarının Milli Məclis sədri İsa Qəmbər, baş naziri Pənah Hüseyn, dövlət katibi Əli Kərimli olub. Ölkə başçısının ad çəkməsə də, onları nəzərdə tutduğu aydındır. Qeyd olunan siyasətçilər və onlara yaxın şəxslər mediada, sosial şəbəkədə prezidentin bir neçə cümləlik fikirlərinə ard-arda, hətta iri həcmli yazılarla cavab veriblər.
Pənah Hüseyn qeyd edib ki, əgər 2016-cı ildə prezident İlham Əliyev 23 il əvvəl, 1992-93-cü illər iqtidarına qarşı əks-təbliğata ehtiyac duyub onu şəxsən özü başladırsa, deməli, iqtidarın vəziyyəti düşünüldüyündən də ağırdır.
P.Hüseyn bildirib ki, AXC-Müsavat iqtidarı tarixi fenomen olaraq ona münasibətdə ən çətin, subyektiv, tənqidi dövrü arxada qoyub və hər yeni gün tarix baxımından onun xeyrinə işləməkdədir: “Mövcud iqtidar belə bir sınaqdan necə çıxacaqdır, ümumiyyətlə, çıxa biləcəkmi? Bu məsələni yenə tarixin öhdəsinə buraxaq...Ticarət ümumiyyətlə peyğəmbərimizin savab saydığı peşələrdəndir və ölkədə yüz minlərlə adam bu işlə məşğul olub ailəsinə halal çörək qazanır. Ancaq tutaq ki, qarpız satmışam, nə olsun? Mən tam səmimi deyirəm, hətta sovet dövrünün son illərindəki qıtlıq dövründə belə mən nə iri, nə xırda ticarətlə, o cümlədən qarpız alveri ilə məşğul olmamışam, bunu etməyə ehtiyacım olmayıb. Yenə tam səmimi deyirəm ki, yaşadığımız bu böhranda ailəmi, nəvələrimi halal çörəklə təmin etmək naminə, ehtiyac yaransa, başqa bir şey əlimdən gəlməsə onu da edərəm və bundan utanc yox, şərəf duyaram”.
İsa Qəmbər isə özünün facebook səhifəsində yazıb: “Bu gün biz-Milli Strateji Düşüncə Mərkəzi gələcəyə-2018-ci ilə baxdıq, İlham Əliyev keçmişə-1992-ci ilə baxdı. Olsun. Keçmiş də, gələcək də bizimdir!”
Əli Kərimliyə yaxın media orqanlarında isə ölkə prezidentinə kəskin cavablar yazılmaqla yanaşı, onu AXCP sədri ilə debata dəvət ediblər.
Bəzi ekspertlərin fikrincə, müxalifət düşərgəsindən bir neçə cümləlik tənqidi fikrə bu qədər reaksiya adekvat deyil. Prezidenti bütün il boyu sərt tənqid edən, ağır ittihamlar ünvanlayan siyasi liderlər ildə bir dəfə bir-iki cümlədən ibarət tənqidə “qonaq” edilir. Müxalif liderlər buna bunca əndişəli cavablar verirsə, tənqidə dözümsüz olduqlarını ortaya qoymuş olurlar.
Müstəqil siyasi ekspert Elxan Şahinoğlu prezidentin rəqib siyasi qüvvələri tənqid etməsinin siyasi mübarizə olduğunu bildirdi və qeyd etdi ki, bütün dünyada bu baş verən haldır: “Prezidentin nəzərdə tutduğu siyasi liderlərin və onlara yaxın adamların bir çıxışa verdiyi reaksiyalar, cavablara gəlincə, hesab edirəm ki, bir neçə cümlədən ibarət tənqidi fikrə bu qədər hay-küylü reaksiya dözümsüzlükdən irəli gəlir.
Düşüncəmə görə, daha məqbul variant bu idi ki, həmin siyasi liderlər mətbuat konfransı çağıra və gənclərlə bir görüş keçirərdi və hakimiyyətdə olduqları bir il ərzində həyata keçirdikləri işlər, uğurlarla bağlı çıxış edərdi. Sonra da gənclərin suallarına cavab verilərdi və indiki vəziyyətdən çıxış yolları göstərilərdi. Bu, olardı prezidentin tənqidi çıxışına sanbalı adekvat cavab. Dövlət başçısı tənqid etdiyi şəxslərin hakimiyyətdə olanda və sonrakı müddətdə bir-biriləri ilə yol getmədiyini də dedi. Məhəmməd Əmin Rəsulzadənin anadan olduğu gün onun Novxanıdakı abidəsinin önünə hər partiyanın, hər siyasi liderin ayrı-ayrılıqda getməsi, hətta bu cür gündə də birgə tədbirə qatılmamaları məgər yaxşı haldır?
Həmin siyasi liderlər bu cür davranışları və bəzən aralarındakı ixtilaflarla dövlət başçısını o fikirlərində haqlı çıxarırlar. Prezident deyir ki, bunlar öz aralarında yola getmir. Baxsaq görərik ki, bəzi müxalifət liderləri həqiqətən heç öz aralarında yola getmirlər. Hakimiyyət də bu vəziyyətdən çox ustalıqla istifadə edir. Siyasi liderlər müəyyən addımları ilə prezidenti müəyyən qədər haqlı çıxarırlar. Yalnız sosial şəbəkədə status yazmaqla çox da irəli getmək olmaz. Siyasi liderin əsas işi status yazmaqdan ibarət deyil. Siyasi liderin insanları öz ətrafında toplamaq cazibəsi olmalıdır, bölgələrə gedilməlidir, isti evdə və ofisdə oturub gözləməklə dəyişiklik baş verməz".
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər