Hakimiyyət Rəsul Quliyevin Azərbaycana qayıtmaq istəməsinə “yox” deyib |
Müəllif: Admin | Bölmə: Xəbərlər | Vaxt: 8-01-2016, 11:47 | Şərh sayı: (0) | Baxılıb: 914
Hakimiyyət Rəsul Quliyevin Azərbaycana qayıtmaq istəməsinə “yox” deyib
Sərdar Cəlaloğlu: “Lideri olmayan qruplar var ki, onlar zaman yetişən kimi Rəsul Quliyevin ətrafında toparlana bilərlər”
Azərbaycan parlamentinin eks-spikeri, hazırda ABŞ-da mühacirətdə yaşayan Rəsul Quliyev Bakıya qayıtması üçün hakimiyyətə müraciət edib. Müraciətə isə mənfi cavab verilib. Bu barədə “Yeni Müsavat”a daxil olan xəbərdə deyilir ki, keçmiş YAP-çı deputat Rza İbadovun üzərindəki cinayət işinin götürülməsi və onun ötən ay Azərbaycana buraxılması eks-spikerdə ona da “yaşıl işıq” yandırıla biləcəyi ümidini yaradıb. Ancaq Rza İbadova və bir neçə il öncə vətənə qayıdışına şərait yaradılan sabiq prezident Ayaz Mütəllibova göstərilən münasibət onun şəxsində təkrarlanmayıb.
R.Quliyevlə uzun illər eyni partiyada fəaliyyət göstərmiş keçmiş silahdaşı ADP sədri Sərdar Cəlaloğlu bildirdi ki, Rəsul Quliyev əvvəlki nüfuzunu nə qədər itirsə də, Azərbaycanda siyasi hadisələrə təsir etmək imkanları var. Rəsul Quliyevi Rza İbadovla, Ayaz Mütəllibovla müqayisə eləmək yanlışdır. Nə Rza İbadov, nə də Ayaz Mütəllibov ölkə siyasətinə Rəsul Quliyev qədər təsir eləmək imkanında olmayıblar. Hakimiyyət də bunu nəzərə alır: “Rəsul müəllimin ölkəyə qayıtmasını əngəlləyən məqamlardan biri də hakimiyyətin ona şəxsi münasibətinin pis olmasıdır. 20 ilə yaxın vaxt keçir, lakin Rəsul Quliyevlə pozulmuş şəxsi münasibət hələ də düzəlmir. Rəsul Quliyev həm də şəxsi münasibətlərə görə vəzifədən və ölkədən getmişdi. 20 ildir həm də buna görə onun ölkəyə gəlməsinə imkan verilmir. Hələ də onu bağışlaya bilmirlər”.
“Bəs Rəsul Quliyevin hansı təsir imkanları qalır ki, hakimiyyət onun ölkəyə gəlişini təhlükə sayır” sualına isə S.Cəlaloğlu belə cavab verdi: “Həm regional amil baxımından, həm indiki böhran şəraitində xalqın ümid yeri ola biləcəyindən Rəsul Quliyev diqqəti cəlb edə, xalqın müəyyən bir hissəsinin, eyni zamanda hakimiyyətdəki bir sıra şəxslərin ümid yerinə çevrilə bilər. Hakimiyyət bunu düşünür və ona görə də onu ölkəyə buraxmır. Rəsul Quliyev ilk baxışdan nə qədər zəifləmiş, yıpranmış durumda görünsə də, ölkəyə gəlişindən sonra alternativ qüvvə kimi ortaya çıxmaq imkanları qalır. Siyasətdə ayrı-ayrı fərdlərin əsasən imici rol oynayır. Məsələn, cəmiyyətdə elə adamlar var ki, dəfələrlə Rəsul Quliyevdən güclüdür və xalqa daha çox xeyir verə bilər, amma xalq heç onu tanımır və arxasınca getmir. Amma güclü imici yaradılmış şəxsin arxasınca xalq çox şeylərin fərqinə varmadan gedir. Kütləvi şüur belədir. Xalqın gözünün qabağında nə qədər çox durursansa, bir o qədər adiləşirsən. Rəsul Quliyev isə uzun müddətdir ölkədən gedib, onun kimi liderlərə xalqların münasibəti mistiksasiya ilə bağlıdır. İnsanlar özlərindən uzaqda olan liderlərə hansısa ilahi don geydirirlər və onun haqqında xəyalla yaşayırlar. Rəsul Quliyev də uzun müddətdir ölkədən uzaqda olduğu və ölkəyə buraxılmadığı üçün xalqın müəyyən hissəsinin ürəyində mistikləşib”.
ADP sədri onu da dedi ki, hakimiyyətin içində dar ayaqda Rəsul Quliyevin ətəyindən yapışmaq düşüncəsində olanlar var. Hakimiyyət bunu da bilir: “Bu cür qüvvələr çoxdur. Lideri olmayan qruplar var ki, onlar zaman yetişən kimi Rəsul Quliyevin ətrafında toparlana bilərlər”.
Bəs iqtidar hansı şərtlər daxilində Rəsul Quliyevi ölkəyə buraxa bilər: “Yuxarıda xatırlatdığım xüsusi münasibət dəyişməyincə, heç bir şərtin olacağı gözlənilən deyil. Amma ümumən götürdükdə, hakimiyyət ölkənin düşdüyü böhrandan çıxması istiqamətində ciddi addımlar atmaq istəyirsə, Rəsul Quliyev kimi adamların biliyindən, təcrübəsindən ən azı məsləhət səviyyəsində istifadə etməlidir. Rəsul Quliyevə bir vəzifə verilməsə də onu ölkəyə buraxıb iqtisadi böhrandan çıxmaq istiqamətində ideyalarından yararlanmaq olar. İqtidar ona kömək eləmək istəyən istənilən qüvvənin imkanlarından istifadə eləməyə çalışmalıdır. Böhranı subyektiv bəyanatlarla, Siyavuş Novruzovun onu-bunu söyməsi ilə aradan qaldırmaq mümkün deyil. İqtidar öz siyasətini dəyişib cəmiyyəti bu vəziyyətdən çıxarmaq üçün bütün ictimai, siyasi qüvvələri səfərbər eləməlidir. Xaricdə olan təcrübəli vətəndaşlarımızın hamısının imkanlarından istifadə etməlidir. Dünya dəyişib, artıq neft və qaz iqtidarın əlində əvvəlki kimi silah rolu oynaya bilməz. Neçə ki, gec deyil, iqtidar təcili tədbirlər görməlidir”.
Xatırladaq ki, 2015-ci ilin son aylarından başlayaraq bir neçə dəfə Rəsul Quliyevin ölkəyə qayıtmaq istədiyi barədə xəbərlər yayılıb. Ötən il dekabrın 18-də R.Quliyev modern.az-a açıqlamasında da qayıtmaq istədiyini, lakin qayıdışının hansısa şərtlər daxilində olmasını istəmədiyini dilə gətirmişdi: “Heç vaxt etmədiyim ”cinayət" işinə görə əfv olunmağımı xahiş etmərəm. Kiminsə diktəsi ilə müəyyən addımlar atmağa razılıq vermək şərti ilə yaşamaqdansa, ölməyə üstünlük verərəm. Mənə qarşı açılmış "cinayət" işinin əsas müddəaları ilə Azərbaycanı tərk etməzdən bir gün öncə indi sizlərin yaxşı tanıdığınız şəxslərin iştirakı ilə tanış edilmişdim. Yəni “özünü yaxşı aparmasan, bu cinayət işi açılacaq” xəbərdarlığını almışdım. “Burada yazılanların hamısı yalandır, bunu necə edəcəksiniz” sualıma “sən ağıllı adamsan, bunu necə etməyin çox asan olduğunu bilirsən” cavabı verilmişdi.
Mən xaraktercə dediyim sözə həmişə əməl edən adam olmuşam və belə də qalacağam. Hamı mərhum prezident Heydər Əliyevdən üz döndərəndə mən onu Vəzirov, Mütəllibovun hədə-qorxusuna, terror etmək cəhdlərinə baxmayaraq, axıra qədər müdafiə etdim.
Elçibəy hökumətində də nazirlər bu işi davam etdirdilər, ancaq mən fikrimdən geri dönmədim. Parlament sədri seçiləndə iki cümləlik çıxış etdim. Dedim ki, mən Heydər Əliyevin siyasəti ilə razılaşmayanda istefa verəcəyəm. 1994-cü ilin oktyabr, 1995-ci ilin mart hadisələrində onu sözün əsl mənasında müdafiə edən nə ərtrafındakılar, nə də nazirləri oldu, yalnız mən oldum. 1996-cı ildə 3 məsələdə bizdə kəskin fikir ayrılığı yarandı. Bu, korrupsiya ilə rüşvət, Qarabağ probleminin həlli və demokratiyanın inkişafı məsələləri idi. Verdiyim sözə əməl edib, dava- qırğınsız, xoşluqla istefa verib getdim. Xaricdə yaşadığım dövrdə heç vaxt zorla hakimiyyətin dəyişdirilməsi ideyasını dəstəkləmədim. Mən həmişə bunun əleyhinə olmuşam. Hakimiyyətin məni respublikaya buraxması onun üçün heç bir təhlükə yaratmır".
Eks-spikerin sonda dedikləri əslində hakimiyyətə “məni ölkəyə buraxın” çağırışı kimi qəbul edilə bilər.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər