Azərbaycan - hər kəsdən yaxşı, dünənindən pis... |
Müəllif: Admin | Bölmə: Xəbərlər | Vaxt: 14-01-2016, 18:00 | Şərh sayı: (0) | Baxılıb: 295
Azərbaycan - hər kəsdən yaxşı, dünənindən pis...
Ölkədə vəziyyət gərgindir və bunu hamı bilir. Gün ərzində rayonlardan gələn xəbərlər də onu göstərir ki, ölkə əhalisi manatın ucuzlaşmasından və başqa böhranlardan yaranan bahalıqlardan narahatdır, narazıdır. Azərbaycan hələ çörək sınağı ilə qarşılaşmayıb - bahalıq təzəcə qol götürüb oynayır; bu proses dərhal siyasətə də təsirini göstərir. Artıq etirazlara qarşı görülən tədbirlər sırasında müxalifət partiyalarının yerlərdəki təmsilçilərinin həbsi xəbərləri də var. Buna etiraz olaraq üzvləri həbs olunan partiyalar bəyanat veriblər. Müsavat rəhbəri isə MCQMİ-yə çağırılıb, xəbərdarlıq alıb.
Lakin ölkədəki vəziyyət nə qədər gərgin olsa da, qəti və birmənalı olaraq proses çıxılmaza doğru getmir. Gerçəklik budur ki, Azərbaycan hələ də regiondakı bütün dövlətlərdən sabit, varlı və yaşanası ölkədir. Hansılardanmı? Bütün qonşularımızdan! Rusiyadan, Türkiyədən, Gürcüstan və Ermənistandan. Ölkəmizdəki vəziyyət bütün göstəriciləri ilə Ukraynadan, Moldovadan, ...Suriyadan, Liviyadan, iki-üç istisna ilə, bütün müsəlman aləmindən daha yaxşı, daha üstündür. Postsovet ölkələri arasında, eləcə də müsəlman dünyasındakı ən rahat və stabil ölkələrdən biridir, məmləkətimiz. Çörək də var, iş də, maaş da, sabitlik də.
Meydanlarda bomba partlamır, etnik qırğınlar, çatışmalar yoxdur; gücdən düşmüş manatımız isə rubldan da, türk lirəsindən də, erməni dramından da, gürcü larisindən, Ukrayna qrivnindən də hələ güclüdür. Bu baxımdan, hələ olana şükür edək, olacaqlardan Allah qorusun deyək...
Vəziyyətin mürəkkəbliyindən istifadə edərək, stabilliyi pozmaq, Azərbaycanı ərəb ölkələrinin gününə salmaq istəyənlər də çox deyil. Bu sırada indiki duruma adekvat olmayan məmurlar daha öndə gəlir. Onların indiki rejimə sadiqlik göstəricilərinin bu məsələdə heç bir əhəmiyyəti yoxdur. Xalq yerlərdəki idarəetmədən və balaca padşahlardan razı deyil. Azacıq bir təlatüm bu cür məmurların timsalında xalqı iqtidarla üz-üzə qoyacaq. Buna görə də iqtidarın anti-böhran tədbirləri sırasında ilk yerdə bölgələrdəki məmurları yeniləmək, gəncləşdirmək və prezidentin də iki dəfə anons etdiyi kimi, idarəetməni ASAN modelinə keçirmək lazımdır.
Hakimiyyət ideoloqları və onun informasiya texnoloqları daha çox işləməlidirlər. Facebook fəalları qos-qoca hakimiyyətin informasiya şəbəkəsini üstələyir. İqtidarınsa əlində daha böyük imkanlar var - televiziya efiri tamamilə ona məxsusdur. İndi bir qədər fəal və yenilikçi olmaq yetərlidir ki, sosial şəbəkələrdən ölkə qazanına uzanan çömçələr havada qalsın. Burada müstəqil qəzetlərin də önəmi artır. İllərdir özünə geniş oxucu təbəqəsi toplayan və əsasən də narazı kəsimə xitab edən qəzet və saytlar ölkənin qarışdırılmaması, ərəb dünyasındakı xaosun Azərbaycanda təkrar olunmaması üçün səfərbər oluna bilər. Lakin iqtidarın iqtisadı sıxıntıları ucbatından müstəqil media quruluşları olduqca zəifləyiblər; son proseslərsə onu daha da pis duruma gətirib. Onlar, xüsusi ilə çap mediası tam çökərsə, informasiya məkanına kənar güclərin müdaxilə imkanları daha da artacaq. Bu baxımdan, iqtidar Mətbuat Şurasında konsolidə olunan media nümunələrini daha da gücləndirməyə və onların müstəqillik çərçivələrini artırmağa məcburdur.
Eyni münasibət ölkə müxalifətinə də olmalıdır. Azərbaycanın siyasi müxalifəti, kiçik istisnalarla, vətənpərvərdir, satqın deyil, özünü tükətməyib. Onlarla başladılan və seçkilər ərəfəsində dayandırılan dialoq davam etdirilməlidir. Azərbaycan müxalifəti meydanlarda təsirli deyil - lakin indi o, virtual aləmdə - sosial şəbəkələrdə iqtidardan da imkanlıdır, üstündür. Belə imkanların, ən azı öz zərərinə işləməməsi, təlatümlərə meydan olmaması üçün hakimiyyət maraq və təşəbbüs göstərməlidir. AXP lideri, sabiq baş nazir Pənah Hüseyn də yaxınlarda musavat.com-a verdiyi açıqlamada müxalifətin məsuliyyəti də, hakimiyyətin kiçik bir hissəsini də bölməyə hazır olduğunu demişdi. Ən çətin, ən məsuliyyətli, xalqla təmas nöqtələri sayılan vəzifələri, yerli hakimiyyət orqanlarındakı müəyyən postları vətənpərvər müxalifətin kadrları ilə paylaşmaq siyasi-iqtisadi islahatların ən böyüyü olardı....
Bir sözlə, indi Azərbaycanda vəziyyət, şərti ifadə ilə desək, dünənkindən pisdir. Lakin bütün qonşulardan və müsəlman dünyasındakı iki-üç ölkə istisna olmaqla, hamısından yaxşıdır.
Ona görə də seçim etməliyik - sabahkı daha pis, xarici güclər tərəfindən xaosa sürüklənən Azərbaycandansa, hər kəsdən yaxşı, yalnız özünün dünənindən pis Azərbaycan daha şükürlüdür.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər