Əlahəzrət “təəssüb” və ya Hacı filankəsin “adamı” |
Müəllif: Admin | Bölmə: Məqalələr | Vaxt: 8-12-2016, 13:29 | Şərh sayı: (0) | Baxılıb: 286
Əlahəzrət “təəssüb” və ya Hacı filankəsin “adamı”
“Kiçik” məsələlər rubrikasındanAllahın Peyğəmbəri (s) buyurub: “Təəssübkeşlik edən və yaxud təəssübü çəkilən, iman halqasını öz boynundan açmışdır” (əl-Kafi, c.2, səh.308, hədis 2). Bu hədis təəssübün nə dərəcədə təhlükəli mərəz olduğunu aşkar anladır. Təəssüb, günah olaraq, bir zamanlar imanlı olan insanı imansıza çevirməyə qadirdir. Deməli, müsəlmanlar diqqətli olmalı, imanlarını şeytanın bu silahından qorumalıdırlar. Bəs, bunu bacarırıqmı? Azərbaycanın dini cameəsində təəssüb və təəssübkeşlərə rast gəlirikmi?
Təəssüf ki, bu xəstəlik bəzilərimizin ruhuna hopub, qəlblərimizə yol tapıb. Özü də sakitcə, hay-küysüz. Hətta təəssüb yükü ilə yüklənən müsəlmanlar təəssübkeşliyin nə qədər arzuolunmaz bir xüsusiyyət olması barədə bəhslər aparır, kimlərisə bu yoldan çəkindirməyə çalışırlar. Azərbaycan dindarlığının qeyri-rəsmi iyerarxik pillələrində fərqli mövqelər tutanların ya davranışında, ya çıxışılarında, ya da yazılarında bu təhlükəli yolla irəliləmələrini sübuta yetirən işartılara rast gəlmək mümkündür.
Məsələn. Biri sosial şəbəkədə müəyyən fikir söyləyir və... qızğın müzakirələr başlayır. Dərhal cəbhələşmə, qruplaşma baş verir. Hər kəsin dostu-tanışı özünə borc bilir ki, dostluğ əhdinə “vəfa” etsin, gəlib qarşı tərəfə bir-iki “yağlı” söz döşəsin. Özü də məsələnin məğzinə varmamış, arqumentlərlə tanış olmamış. Yetər ki, bizim dotumuz və tanışımız belə düşünür. Özümüzə isə həmişə bəraət qazandıra bilərik, bəhanə azlığıdı? Məsələn, “A kişi, mən onunla bir ton çörək yemişəm e!”. Ya da belə variant: “Mən onu 20 ildir tanıyıram”. Ya da belə: “Biz birlikdə ziyarətdə olmuşuq, tanıyıram onu”. İndi, gəlin birlikdə bir suala cavab aramağa çalışaq: belə “arqumentlərə” əsaslanaraq fikir yürütmək təəssübün təcəssümüdür ya yox?
Başqa bir mənzərə. Görürsən, biri çıxıb hansısa məclisdə elə söz deyir ki, adamın əti tökülür. Buna söz də deyilməz, bu ifadə sözə bir həqarət sayılar. Amma bu “alimin” ünvanına irad bildirmək özünə qarşı sunami yaratmaq anlamına gəlir. Niyə? “Ayə, bilirsən o kimin tələbəsidir?” Ya da “Bilirsən onun haqqında Hacı filankəs nə deyib? Aç “yutubu” bax da!”. Yaxud “Bu Hacı filankəsin adamıdı e, qardaş, bir az ehtiyatlı ol!” Vəssalam. “Sarsıdıcı” dəlillərə alternativ varmı? Yoxdur! Çünki belə absurd sözlərə, ifadələrə yol verən birisinə nə deyəsən, necə izah edəsən? Bunu təəssüb adlandıra bilərik ya yox?
Belə nümunələri davam etdirmək mümkündür Nə qədər təəssübkeşik olar? Bu gün bir yerdə çalışırıq, ruzimizi ordan əldə edirik – bu yerin təəssübü qəlbimizə dolur, övladımız biri ilə savaşır – onun təəssübü bizə hakim kəsilir, dostumuz kiminləsə ticarət gəlirlərini bölüşə bilmir – biz dərhal Ali hakim missiyasını üzərimizə götürüb dostumuzun “yardımına” tələsirik... Heç kim demir ki, dostluq, dosta yardım, qardaşlıq hissi və sair bənzər insani xislətlər pisdir. Qətiyyən! Amma... Bu yerdə daha bir hədisə nəzər salaq: Allahın Peyğəmbəri (s) buyurub: “Hər kimin qəlbində xardal dənəsi boyda olsa belə təəssüb olarsa, Allah qiyamət günündə onu cahiliyyət dövrünün ərəbləri ilə birgə dirildər” (əl-Kafi, c.2, səh.308, hədis 3). Xardal dənəsi... Zənnimizcə, kifayət qədər ciddi xəbərdarlıqdır.
Ümid edək ki, şeytanın insana qarşı apardığı irimiqyaslı müharibənin tərkib hissəsi olan təəssüb döyüşündə məğlub olmayacağıq, əzəli düşmənimizin aşkar və gizli təxribatlarının qurbanına çevrilməyəcəyik, məsumlardan hədis söyləməklə kifayətlənməyərək bu hədislərdəki tövsiyələrə əməl də edəcəyik.
P.S. Sonda isə daha bir hədis. Oxuyaq və çalışıb əməl edək. İmam Sadiq (ə) buyurur: “Mənim ən sevimli və ən yaxşı dostum o şəxsdir ki, eyblərimi mənə həmişə hədiyyə etsin, desin”. (Biharul-ənvar 76/ 282).
Islam.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər