Ən kədərli gündə lağlağı |
Müəllif: Admin | Bölmə: Xəbərlər | Vaxt: 25-12-2015, 08:58 | Şərh sayı: (0) | Baxılıb: 235
Ən kədərli gündə lağlağı
Seyidlərin cəddi haqqı, əvvəlcə elə bildim, zarafat edirlər. Özü də bu barədə ilk dəfə ciddi bir politoloqun şərhində oxudum. Dedim, yəqin qardaş da qoşulub sosial şəbəkənin lağlağı, zarafatcıl, baməzə abonentlərinə, məzələnir, müasir elmi terminlərlə desək, mırtlaşır.
Sonra gördüm, yox ey, saytlarda Azərbaycan parlamentində ABŞ-da insan haqlarının durumunu müzakirəyə çıxaracaqlar, hətta ola bilər ki, dünya hegemonuna qarşı sanksiya tətbiq etsinlər. Hər çey konqresmen Smitdən asılıymış.
Bir azdan yüzlərlə FB istifadəçisi fürsətdən istifadə edərək, bu layihəni hoydu-hoyduya götürdü, lağlağı ərşə dirəndi, rişxənd, istehza, sarkazm, ələsalma - hamısı bir-birinə qarışdı.
Nə də olmasa, biz optimist xalqıq axı, lətifə sevənik, deyib-gülməyə bir canıq, hər kədərli şeydə bir komik məqam tapırıq. Bu xüsusiyyətimizin meydanı açılmışdı.
Biri yazırdı ki, guya amerikalı konqresmenlər bu xəbəri eşitcək, çox kədərləniblər, sarsılıblar, hətta Konqresin “No smokinq” elanı yapışdırılan yerlərində durub siqareti siqaretə calayıblar.
Başqa biri yazırdı ki, amerikalılara zülm olacaq, daha Mayamidən durub Nabrana, tətilə gələ bilməyəcəklər, Naxçıvanda istehsal olunan “Lifan” avtomobillərini almaqdan məhrum olacaq, öz “Ford”larına minməyə məcbur qalacaqlar.
Prezident Obamanın bu xəbərə görə üzüldüyünü yazanlar da vardı, qəhqəhə çəkib güldüyü yerdə çəkilmiş şəklini paylaşanlar da.
Bir sözlə, olaya ölkəmizdən verilən reaksiya çox qeyri-ciddi idi. Camaat nəyə görəsə burada gülməli nüanslar tapmışdı.
Amma bu, gülməli hadisə deyil, əziz soydaşlar. Dərindən düşünsək, oturub zırın-zırın ağlamalıyıq ki, gör, bizim adımızdan parlamentə hansı düşüncədə, ağıl-kamalda olan adamları seçiblər və onlar hansı işlərlə məşğul olurlar.
Yəni normal, ağlı başında olan adam da durub belə bir qanunvericilik layihəsi hazırlayarmı?
Bu, 2015-ci ilin ən qeyri-ciddi hadisəsidir. Bəlkə Şimali Koreyada, Venesuelada nəsə başqa qeyri-ciddi hadisə də olub, bilmirəm, amma bu unikal dərəcədə qeyri-ciddi hadisədir, özü də məhz hamımızı kədərə boğmalı olan hadisədir.
İmkanı olan adamlar bu hadisədən sonra bu cür deputatları olan ölkədən ağlaya-ağlaya qaçmalıydı.
Əslində, ABŞ da, qüdrətli Avropa ölkələri də hamımıza siyasi sığınacaq verməlidir. Gedərik, getmərik, özümüz bilərik, amma onlar bizə belə bir şərait yaratmalıdırlar, deməlidirlər, sizi bu cür adamlar idarə edirsə, yaşayış yerinizi dəyişməkdə sərbəstsiniz, gəlin bəri.
Rövşən Rzayev və Əli Hüseynov kimi deputatı olan ölkədə yaşamaqdansa, Alyaskada yaşamaq daha yaxşı olar. Tam ciddi deyirəm. Maqadanı da deyərdim, amma ora bir az soyuqdur, o gün 54 dərəcə şaxta olub. Üstəlik, prinsip etibarı ilə Maqadan elə bir ölkənin əyalətidir ki, bizim deputatlar bu cür qanun layihəsi hazırlamağı məhz o ölkədən öyrəniblər.
Bax, ona görə Əli Hüseynov belə deyir: “Əgər ABŞ-da müvafiq komitədə, daha sonra isə konqresdə Kristofer Smitin təqdim etdiyi qanun layihəsi qəbul olunarsa, biz də paralel addım atacağıq”. Çünki ondan öncə bunu İvanov (şərti addır) demişdi. Rus deputatlar ABŞ-ın sanksiyaları ilə üzləşəndə hansı dili danışırdısa, bizimkilər də o ritorika ilə danışırlar, amma miqyası unudublar. Rusiya ərazisinə görə ABŞ-dan böyükdürsə, Azərbaycan hər şeyinə görə ABŞ-ın 50 ştatından ən balacası olan Men ştatından belə balaca və zəifdir.
Hələ deputatlar bir yana dursun, saray telekanallarında çalışan təbliğatçılar dəstəsi də fəaliyyətə başlayıblar, Almaniyanı dağıdıb-çökdürəndən sonra indi də ABŞ-a keçiblər. Bu gün-sabah hindulara qahmar çıxacaq, onların 200-300 il öncə rezervuarlara doldurulmasının, soyqırıma məruz qoyulmasının davasını aparacaqlar.
Bu gedişlə Harriyet Biçer-Stounun “Tom dayının daxması” əsəri yenidən çap olunacaq və bütün idarə müəssisələrə paylanacaq ki, zəhmətkeşlər vaxtilə Amerikada qaradərililərə necə zülm edildiyi barədə oxusunlar. Oxumasalar da, kitabı əllərində tutub televiziya kameraları önündə müsahibə versinlər, desinlər, Amerikanı görmüşük də, budur, burda yazıblar onların nə yuvanın quşu olduğunu...
Siz də oturub lağlağı edirsiniz... Çox kədərli durumdur, əziz həmvətənlər, II Dünya müharibəsindən bəri bu qədər qəm-qüssəli durumumuz olmayıb.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər