Rusiya hədələyir: yenə ermənilər və kürdlər |
Müəllif: Admin | Bölmə: Xəbərlər | Vaxt: 26-11-2015, 12:52 | Şərh sayı: (0) | Baxılıb: 257
Rusiya hədələyir: yenə ermənilər və kürdlər
Moskva və Ankara arasında son illər münasibətlər inkişaf edərək görünməmiş həddə çatmışdı. Hətta ticarət dövriyyəsinin səviyyəsinə görə, Rusiya Türkiyə üçün bu siyahıda 2-ci, Türkiyə isə Rusiya üçün 6-cı yerə qalxmışdı.
Amma noyabrın 24-də Rusiyanın Su-24 təyyarəsinin Suriya-Türkiyə sərhədində Türkiyənin F-16 qırıcıları tərəfindən vurulmasından sonra münasibətlər bir anın içində korlandı. Gərginlik bir neçə saatın içində sürətlə artdı. Hətta iki dövlət arasında müharibənin başlanacağını ehtimal edənlər oldu. Hələlik bir neçə gün öncəyə qədər özlərini strateji tərəfdaş adlandıran dövlət arasında silahlı münaqişə olmasa da, "soyuq müharibə" tam ciddiliyi ilə davam edir. Artıq Rusiya Türkiyəyə "ibrət dərsi" vermək üçün bu ölkə ilə bütün əlaqələri kəsib. Dövlət rəsmilərinin qarşılıqlı səfərləri təxirə salınıb, ruslar türklərin bütün görüş təkliflərini rədd edir, hətta Rusiyada Türkiyəyə turistlərin gedişinin, eyni zamanda Türkiyədən şimala toyuq idxalının qarşının alınması üçün addımlar atılıb. Mütəxəssislər hesab edirlər ki, əgər münasibətlərin yumşaldılması üçün təcili tədbirlər görülməzsə, "soyuq müharibə" daha dərin "cəbhə"lərə gedib çıxa bilər. Bu "cəbhə"lərdən bəzilərinin planlarının "Böyük Ermənistan" və və "Kürdüstan" xəritələri üzərində qurulması ehtimalı artır.
Belə ki, Rusiya təyyarəsinin vurulmasından dərhal sonra bu ölkənin Liberal-Demokrat Partiyasının sədri Vladimir Jirinovski Türkiyənin ünvanına aqressiv çıxış edərək bildirib ki, Türkiyə ilə məsələni həll etmək lazımdır. Özü də bunu başqalarının əli ilə etmək lazımdır: "Ermənilər türklərə nifrət edirlər. Əgər biz ermənilərə onların qərb vilayətlərini azad etməyə icazə versək, onlar bunu, məmnuniyyətlə, edəcəklər. Ermənilər bunu 1918-ci ildə də edərdilər. Lakin Moskva o zaman ermənilərə kömək etmədi. Rusiya o zaman Türkiyənin tərəfinə keçdi".
V.Jirinovski Türkiyədə "kürd kartı"nı işə salmağın mümkünlüyünə də eyham vurub: "Kürdlər bizdən kömək gözləyirlər. Əgər biz kürdlərə onların müstəqilliyini tanıyacağımızı desək, Şərqi Anadolu da Türkiyənin əlindən çıxacaq. Kürdlərin sayı isə az deyil. 20 milyon nəfərdirlər. Onların artıq paytaxtı da bəllidir. Bu, Diyarbəkir şəhəridir. Əgər bunları etsək, biz son nəticədə müstəqil Kürdüstan və "Böyük Ermənistan" qazanmış olacağıq".
O, qeyd edib ki, Rusiyanın Suriyada hərbi əməliyyatlar həyata keçirməsi Türkiyəyə sərfəli deyil: "Su-24-ün vurulması Türkiyənin Rusiyanı regionu tərk etməyə məcbur etməsi cəhdi də ola bilər. Bundan əlavə, Moskva türklərlə münaqişədə olan kürdləri dəstəkləyə bilər".
Artıq çoxları bilir ki, bu siyasətçi adətən "Moskvanın baş ruporu" rolunu oynayır və Rusiya hakimiyyətinin rəsmi şəkildə deyə bilmədiklərini onun dili ilə ifadə edir.
Bundan dərhal sonra isə Moskvada Ankaradan qisas almaq üçün qondarma "erməni soyqırımı"nın inkarının cinayət sayılmasını nəzərdə tutan qanun layihəsinin hazırlandığı və onun Dövlət Durmasında müzakirəyə çıxarılacağı haqda məlumat yayıldı. Məlum oldu ki, layihənin müəllifi sözügedən qanun layihəsini Dövlət Dumasına "Ədalətli Rusiya" Partiyasının və Partiyanın Dumadakı fraksiyasının sədri Sergey Mironovdur.
S.Mironov özünün Twitter-dəki profilində yazıb: "1915-ci ildə Osmanlı Türkiyəsində erməni soyqırımı faktının danılmasına görə cinayət məsuliyyətini nəzərdə tutan qanun layihəsini elə indicə Dumaya təqdim etdik. Fransadakı kimi biz də belə bir qanunu qəbul edəcəyik. Öz tarixini unudanlara, günahsız insanları qətl edənlərə bu, yaxşı soyuq duş olacaq".
Həmin qanun layihəsinə əsasən, 1915-1922-ci illər ərzində Osmanlı Türkiyəsində qondarma "erməni soyqırımının" baş verməsinin inkar edənlərin, həmçinin bu cinayətlərə dəstək verənlərin 300 min rubl və ya iki illik əmək haqqı məbləğində cərimə edilməsi, yaxud 3 ilə qədər azadlıqdan məhrum etmə cəzasını tətbiq etmək təklifi edilir. Əgər "soyqırım" KİV-in istifadəsi ilə inkar edilirsə, tətbiq olunan cərimə məbləğinin yuxarı həddinin 500 min rubla, azadlıqdan məhrumetmə cəzasının isə 5 il müddətinə qədər artırılması təklif olunur.
Xatırladaq ki, S.Mironov Rusiyada ən yüksək vəzifələrdə çalışmış şəxslərdəndir.
Məlumata görə, yeni qanun layihəsi artıq Rusiya Dumasına müzakirəyə çıxarılması üçün təqdim edilib. Düzdür, hələlik o, müzakirəyə çıxarılmasa da, faktın özü artıq ciddi məqamlardan xəbər verir.
Bundan əlavə, Rusiya KİV-lərində aparılan antitürkiyə təbliğatında ekspert kimi müraciət edilən şəxslərin bir qismi məhz erməni milliyyətindən olan rusiyalı mütəxəssislər olur. Onların isə Türkiyəyə qarşı hansı mövqeyi tutduğu gün kimi aydındır.
Hadisələrin gedişi göstərir ki, Rusiya-Türkiyə münasibətlərində "erməni-kürd kartı"ndan istifadə edilməsi nəinki təkcə bu iki ölkə arasında olan münasibətləri daha da gərginləşdirəcək, hətta çərçivədən kənara çıxaraq digər qonşu dövlətlərlə olan münasibətlərə də xələl gətirəcək.
Elə görünə bilər ki, "Böyük Ermənistan" və "Kürdüstan" faktorlarının ortaya atılması ilə ermənilər və kürdlər bu məsələdə divident əldə edə bilərlər. Əslində isə ən çox ziyan çəkənlərdən biri də güman ki, məhz elə onlar olacaq.
İlkin İzzət
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər