Putin Türkiyəni yenə hədələdi |
Müəllif: Admin | Bölmə: Xəbərlər | Vaxt: 18-12-2015, 08:28 | Şərh sayı: (0) | Baxılıb: 182
Putin Türkiyəni yenə hədələdi
“Ərdoğan iqtidarı ilə anlaşmamız mümkünsüzdür” deyən Kreml başçısı keçirdiyi illik mətbuat konfransında dünya gündəmindəki digər məsələlərdən də danışdı; şəxsi həyatından söz açdı...
Dünən Rusiya prezidenti Vladimir Putin Moskvada sayca 11-ci olan ənənəvi illik mətbuat konfransı keçirib. 3 saat çəkən tədbirdə o, həm ölkənin, həm də dünyanın gündəmindəki əsas mövzularla bağlı jurnalistlərin suallarını cavablandırıb.
Təbii ki, ona ünvanlanan ilk suallardan biri “Su-24" təyyarəsinin vurulmasından sonra Türkiyə-Rusiya münasibətlərində yaranan böhranlı durum və iki ölkənin iqtisadi əlaqələrinin perspektivi ilə bağlı olub. Putin bir daha insidentlə görə Ankaranı suçlu çıxarıb, hətta Türkiyə rəhbərliyini amerikalılara yaltaqlanmaqda ittiham edib.
Onun sözlərinə görə, təyyarəni vurmaqla Türkiyə rəhbərliyində təmsil olunanlar ABŞ-a yaltaqlanmaq məqsədi güdüblər. “Biz bilmirik ki, bu işdə üçüncü tərəf var ya yox. Lakin Türkiyə rəhbərliyi amerikalılara yaltaqlanmaq qərarına gəlibsə, bunun doğru addım olub-olmadığını bilmirəm. Ümumiyyətlə, amerikalılara bunun lazım olub-olmadığını bilmirəm”, - deyə o vurğulayıb.
Rusiya lideri Ankaranı həm də hədələyib, “Türkiyənin indiki rəhbərliyi ilə anlaşmaq mümkünsüzdür” deyib: “Təcrübə göstərir ki, bizim üçün anlaşmaq çətindir və yaxud da praktiki olaraq bu, mümkün deyil. Hətta biz ”hə" deyərkən, arxadan bizə zərbə vururlar, özü də anlaşılmayan səbəblər üzündən. Bu üzdən də dövlət səviyyəsində perspektiv görmürəm".
Rusiyanın Türkiyə ilə onun üçün ən həssas məsələlər üzrə əməkdaşlıq etməyə hazır olduğunu söyləyən Putin qeyd edib ki, Ankaranın Suriya sərhədindəki maraqlarını mövcud əməkdaşlıq kanalları vasitəsilə müzakirə etmək üçün imkanları olsa da, bunu etməyib. “Nəyə lazım idi bunu etmək? Mən anlamıram. Bəlkə onlar düşünürdülər ki, biz oradan qaçacağıq? Əlbəttə ki, yox. Rusiya o ölkələrdən deyil”.
Ardınca Suriyada Rusiyanın öz hərbi mövcudluğunu gücləndirdiyini xatırladan Putin artıq bu ölkədə "S-400" zenit-raket komplekslərinin yerləşdirildiyinə diqqət çəkərək hədələyici tonda deyib: “Türkiyə əvvəllər Suriyanın hava məkanını tez-tez pozurdu, hünəri varsa indi də pozsun”.
Qonşu Gürcüstanla bağlı münasibətlərin gələcəyi ilə bağlı suala cavabında Rusiya prezidenti ölkəsinin Gürcüstanla viza rejimini ləğv etməyə hazır olduğunu deyib və hazırkı Gürcüstan rəhbərliyinin davranışlarında münasibətlərin normallaşmasına dair əlamətlər gördüyünü söyləyib: “2008-ci il hadisələrindən sonra münasibətlərimizdə deqredasiya baş verdi. Bu hadisələrin baş verməsinin məsuliyyəti isə birbaşa ovaxtkı prezident Mixail Saakaşvilinin üzərinə düşür. Məhz onun yol verdiyi avantüra nəticəsində vəziyyət bu yerə gəldi, Gürcüstan ərazilərinin bir hissəsini itirdi. Təsəvvür edin ki, indi həmin adam Odessanın qubernatoru vəzifəsindədir. Saakaşviliyə ABŞ-a işçi vizası vermədirlər, Ukraynaya göndərdilər ki, orada işləsin. O da hazırda orada aktiv fəaliyyət göstərir. Qərb bununla Ukraynaya göstərir ki, təkcə onu idarə etmir, həm də oraya onu idarə edəcək adamlar göndərir. Bu isə Ukrayna xalqının üzünə tüpürməkdir”.
Putin ardınca qeyd edib ki, Cənubi Osetiya və Abxaziya ilə bağlı yaranmış məsələləri Tiflis onlarla danışıb razılığa gəlməlidir: “Biz istənilən razılaşmanı dəstəkləməyə hazırıq”.
Kreml rəhbəri ailə həyatı, qızları barədə də danışıb. Qızlarının Rusiyada olduğunu və daimi yaşamaq üçün heç yerə getmədiklərini bildirib. O, qızlarından birinin Moskva Dövlət Universiteti yanında Fondda çalışdığını etiraf edib: “Onların hər ikisi yetkin insanlardır və həyatlarını qurmaq haqları var. Onlar daimi yaşamaq üçün Rusiyadan xaricə getməyib, Rusiyada oxuyublar”. Rusiya prezidenti ailə məsələlərini müzakirə etmədiyini vurğulayaraq, qızlarının üç dildə sərbəst danışdıqlarını da söyləyib.
Təəssüf ki, mətbuat konfransında Azərbaycanla, Dağlıq Qarabağla bağlı Rusiya prezidentinə sual ünvanlanmasına imkan verilməyib.
musavat.com
Siyasət şöbəsi
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər