Hacı Zaur Məmmədov: “Niyə durumu anlayıb dərs almırıq?” |
Müəllif: Admin | Bölmə: Xəbərlər | Vaxt: 11-11-2015, 10:40 | Şərh sayı: (0) | Baxılıb: 1086
Hacı Zaur Məmmədov: “Niyə durumu anlayıb dərs almırıq?”
Redaksiyamıza Xaçmaz şəhər məscidinin imam-camaatı hacı Zaur Məmmədovdan məqalə daxil olub. Yazını oxucularımızın diqqətinə təqdim edirik.
Məhərrəm ayının başlandığı ilk gündən bu günə kimi, sanki dindarlara istiqamətlənmiş, mənşəyi məlum olmayan məchul və əsassız qıcıqlandırmalar başlayıb... Planın arxasını görmək çətin olsa da, indiki mərhələdə məqsədin cəsarətli möminlərimizi zindanlara sürükləmək olduğunu görmək o qədər də çətin deyil. Təbii ki, zindan nəfsinə hakim olan mömin üçün azadlıq düşərgəsidir, amma gərək həyat kimi həbsin də, ölümün də millətə və vətənə faydası olsun. Din və torpaq üçün gələn əsarətə də, şəhadətə də salam olsun. Amma çox-çox təəssüf ki, son neçə illərdə gördüyüm heç bir həbsin bu xalqa hər hansı bir yöndən faydası toxunmayıb. İlk məscid sökülmə və hicab qadağalarına qarşı atılan bütün addımlar bizi yanlış yola istiqamətləndirib. Nəticədə yüz nəfərdən çox mömin insan həbs edilib və hətta dünyasını dəyişənlər olub. Bəs nəticə? Nə dəyişdi? Bu gün yenə əvvəldən də olduğu kimi hüquqi və sivil yollarla insanlar övladlarını hicabla məktəblərə yola salırlar. Məscidlərimiz fəaliyyətlərinə davam edir və yeniləri tikilir yaxud təmir edilir.
Onda belə çıxır ki, bu aksiyaların məqsədi yalnız bu günahsız həbslər olub? Son Gəncə və dünən də paytaxtda baş verənlər də mahiyyət cəhətindən eyni olduğuna görə bir mərkəzdən yönləndirilməsi ehtimalı vardır. Axı bunlar kimdir? Olmaya dırnaq arası müxalifət ilə bir nəticə əldə edə bilməyənlər “Ya Hüseyn” şüarını bəhanə edib bəzi dindarları, xüsusi ilə də tanınmış ruhanilərimizin vasitəsi ilə məkirli siyasətlərini Suriyada və İraqda (İŞİD sifətiilə) olduğu kimi burada da təbliğ etmək istəyirlər?! Xüsusilə də Yaxın Şərqdə cərəyan edən hadisələr və ölkəmizdə güc strukturları ilə baş verən həssas məqam fonunda.
Bunlar kimdir və hansı mərkəzin tabeçiləridir? Heç soruşan yoxdur ki, niyə zərər çəkən hörmətli ruhanimiz xalqın digər fərdləri kimi haqqını hüquqi yollar ilə deyil, mömin gənc nəslin həbsi bahasına bərpa etməlidir? Bir halda ki, özünün də buna razı olmağını güman etmirəm. Əgər sadəlöhvlük edirəmsə, bu da bir başqa yanlışlıqdı. Bu yola çox mübarək canlar fəda edilib, amma yeri gələndə sükut etməyi də bacarıblarsa, bir “yumruq” da biz yesək nə olacaq? Niyə durumu anlayıb ibrət çıxarıb dərs almırıq? Niyə bəzən birilərinin qazına gedib provokativ üsullara əl atırıq? Kim verir bu ağılı bizə?
Əzizlərim! Bu xalqla düşmənçiliyi üzündən ictimai sabitliyi pozmağa çalışan, ölkəni qarışdırıb xalqı həyəcana gətirərək vəziyyəti çıxmaza soxmaq, nəticədə (Allah qorusun) Suriya və İraqda baş verənləri burada həyata keçirmək istəyənlərə fürsət verməyin! Gəlin bir daha sağlam düşünün! Yüz yaxud min nəfər Azərbaycan xalqının, əksəriyyəti bir qırağa, heç cüziyyatı da demək deyil. Yəni bizim bu gün əsl ümdə vəzifəmiz dini və milli maarifləndirməni gücləndirmək və o sahəyə bütün enerjimizi sərf etməkdir. Vəhabi və nurçu kimi bu xalqa yad ünsürlər təmkinli hərəkət edərək özlərinin beyin mərkəzlərini yaradırlar. Son həbslərdə üzə çıxan faktlar bu həqiqətləri bir daha ortaya qoydu. Amma mən həbsdə ruhani tanıyıram ki, orda olmaqdansa bu saat azadlıqda olub insanlara din-mərifət öyrətməklə daha əvəzsiz xidmətlər göstərmiş olardı.
Nəticə etibarı ilə bu özbaşına, söz dinləməməkdən irəli gələn şüarlar kimlərə və hansı şəkildə xidmət etdiyi məlumdur. Biz özümüz gərək bunlara imkan verməyək.
Son olaraq əziz qardaş və bacılarıma maariflənmə və xalqın hər bir problemi ilə məşğul olub bunları dilə gətirilməsi üçün çalışmalarını tövsiyə edirəm, bundan sonra baş verəcək hər hansı bir fitnədə haqlı ikən haqsız duruma düşməmələrini tövsiyə edirəm! Allah doğrusunu bilir!
P.S. Yazımdan yanlış nəticə çıxara bilənlərin ola biləcəyi üçün bir daha qeyd edirəm: söhbət hörmətli ruhanilərimizdən getmir. Ruhanilərimizin özlərini də aldadaraq, qandıraraq yanlış yola yönləndirənlərdən, onların səmimi iman və etiqadlarından öz məkrli məqsədləri üçün istifadə etmək istəyənlərdən gedir.
P.S.S. Əvvəllər çox vaxt bu kimi movzularda susmaq ve səbr etməyimi inkar etmirəm. Bunun da səbəbi qorxu filan deyildi, Allahım da şahiddir ki, sırf dindarlarımız arasında fitnəyə bais olmamaq üçün susmağı uyğun görürdüm. Amma görürəm ki, biz susduqca hadisələr təkrarlanaraq daha da oz məcrasından cıxır. Kimlərsə dindarlarımızı özləri də bilmədən başqa məcraya yönəltməyə cəhd edir. Özü də planlı və əvvəldən hesablanmış şəkildə.
islam.az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər