Gənclərə müjdə: işsizliyin aradan qaldırılması üçün layihələr olacaq |
Müəllif: Admin | Bölmə: Xəbərlər | Vaxt: 30-10-2015, 12:12 | Şərh sayı: (0) | Baxılıb: 290
Gənclərə müjdə: işsizliyin aradan qaldırılması üçün layihələr olacaq
- Prezident İlham Əliyev Nazirlər Kabinetinin son iclasında sosial məsələlər, xüsusilə də işsizliklə bağlı problemlərin həllini önə çəkdi. Bu müşavirədən sonra Gənclər və İdman Nazirliyi xüsusən gənclər arasında məşğulluq məsələlərinin həllinə dəstək verilməsi ilə əlaqədar hansı təkliflər, layihələr hazırlayır?
- Ümumiyyətlə, Azərbaycanda həyata keçirilən dövlət siyasətinin əsas istiqamətlərindən biri məhz ölkənin iqtisadi potensialının gücləndirilməsi və vətəndaşların sosial rifahının yüksəldilməsidir. Gənclər siyasəti də dövlət siyasətinin tərkib hissəsi olduğu üçün bu sahədə əsas istiqamətlər məhz gənclərin məşğulluğunun artırılması, gənclər arasında sahibkarlıq fəaliyyətinin təşviq edilməsi və bu vasitə ilə məşğulluğun artırılmasına dəstək olmaqdır. Ona görə də indiyədək Azərbaycan gəncliyi ilə əlaqədar qəbul olunan dövlət proqramlarında və hazırda icrası başa çatmaqda olan "Azərbaycan gəncliyi 2011-2015-ci illərdə" Dövlət Proqramında, eləcə də layihəsi hazırlanmış və 2016-2020-ci illəri əhatə edəcək yeni Dövlət Proqramında gənclərin məşğulluğu və gənclər arasında sahibkarlığın artırılması məsələləri ayrıca fəsil və bəndlərdə öz əksini tapıb.
Cənab Prezidentin müvafiq sərəncamı ilə bu il "2015-2025-ci illərdə Azərbaycan gənclərinin İnkişaf Strategiyası" qəbul olunub. Bu, ilk dəfə olaraq 10 ili əhatə edən strateji əhəmiyyətli bir sənəddir. Burada biz 10 ilin sonunda gənclərdən nəyi gözlədiyimiz, gənclərin inkişafına yönəlmiş hədəflər və onların hansı vasitələrlə dəf edilməsi nəzərdə tutulur. Qeyd etdiyim Dövlət Proqramının icrası da həmin Strategiyadan irəli gəlir. Deməli, bu müddət ərzində ən azı iki dövlət proqramı işləyənə, eyni zamanda zərurət olduqda ayrı-ayrı istiqamətlər üzrə əlavə normativ sənədlər hazırlana bilər. Strategiyanın həm məqsədlərində, həm hədəflərində, həm də gözlənən nəticələrdə məhz gənclər arasında məşğulluğun artırılması, işsizliyin aradan qaldırılması, gənc mütəxəssislərə dəstək verilməsi, karyera qurmaq istiqamətində gənclər üçün müxtəlif layihələrin həyata keçirilməsi kimi məsələlər öz əksini tapıb.
Təbii ki, bizim nazirlik iş yeri açan dövlət qurumu deyil. Biz, sadəcə, gəncləri onlara müxtəlif təlim kursları keçməklə, peşə biliklərini aşılamaqla silahlandıra bilərik. Yeri gəlmişkən, Strategiyada respublika ərazisində mövcud olan 30-dan artıq Gənclər Evlərindən daha səmərəli istifadə etmək, onların bazasında gənclərə peşə təlimlərinin keçilməsi nəzərdə tutulur. Gənclərə karyera axtarışı istiqamətində CV-nin yazılmasından tutmuş, özünü təqdimetməyədək vərdişləri aşılamaq niyyətindəyik. Bu işlər aidiyyəti dövlət qurumları və ictimai təşkilatlarla birgə həyata keçiriləcək.
Bu günə qədər nazirlik tərəfindən müxtəlif adlar altında təlim kursları, karyera günləri, karyera düşərgələri təşkil olunub. Eyni zamanda, biz gənclər təşkilatları tərəfindən irəli sürülən layihələri də dəstəkləyirik. Bunların içində "İdeya qazandı" telelayihəsini qeyd edə bilərəm. Bu layihə çərçivəsində gənclər öz "startup" ideyalarını ortaya qoyur, qalib gəldiyi təqdirdə isə donorlar tərəfindən müvafiq vəsait əldə edirlər. Bununla gənclər həm müəyyən sayda iş yeri açır, həm də iqtisadiyyata sahibkar kimi qoşulurlar. Digər layihə isə gənclər üçün Biznes İnkubasiya Mərkəzidir. Bu layihə bir neçə mərhələdə həyata keçirilir. Bakıda və regionlarda müxtəlif tədbirlər, seminarlar təşkil edilib. Bu təlimlərdə təxminən 5 minə yaxın gənc əhatə olunub. İlkin mərhələdə Mərkəzdə 8 gəncin "startup" ideyası həyata keçiriləcək. Onlara ən azı 1 il müddət veriləcək. Sonra uğur qazanan layihələr oradan ayrılacaq və müstəqil fəaliyyət göstərəcək. Əvəzinə isə digər gənclər gələcək və onların ideyaları üçün şərait yaradılacaq. Burada İKT sahəsi ilə bağlı biznes ideyalar çoxluq təşkil edir.
Bundan başqa, 2006-cı ildən etibarən Azərbaycanda Dövlət İqtisadi Universitetinin bazasında bizim dəstəyimizlə məzun yarmarkaları keçirilir. Əvvəllər yarmarkalarda 140-150 vakansiya olurdusa, son yarmarkaya müxtəlif şirkətlər tərəfindən 900-dən artıq vakansiya çıxarılıb. Bundan əlavə, Universitetlə müqaviləyə görə, burada ötən il gənclər üçün Biznes İnkubator fəaliyyətə başlayıb. Orada bir neçə "startup" həyata keçirilib, biznes sahəsində metodiki tövsiyə xarakterli müxtəlif sayda çap məhsulları hazırlanıb və təlimlər keçirilib.
Nazirlər Kabinetinin son müşavirəsində cənab prezidentin verdiyi tapşırıqlara gəlincə, bəzi məsələlər hazırlanan yeni Dövlət Proqramında da nəzərə alınacaq. Bununla bağlı aidiyyəti dövlət qurumları qarşısında məsələlər qaldırılacaq. Eyni zamanda gənclərin əmək bazarında özünə yer tapa bilməsi məqsədilə onların maarifləndirilməsi, təlimatlandırılması ilə bağlı öhdəmizə düşən işləri də həyata keçirəcək, dəstəyimizi əsirgəməyəcəyik.
Yeri gəlmişkən, dekabrın sonunda "Azərbaycan gəncliyi 2011-2015-ci illərdə" Dövlət Proqramının icrasına dair hesabat veriləcək.
- Bu yeniliklər yalnız 18 yaşından yuxarı gəncləri, yoxsa daha aşağı yaş kateqoriyasını da əhatə edəcək?
- Xeyr, "Gənclər haqqında" Qanunda gənclərin yaş həddi 14-29 yaş arası nəzərdə tutulur. Ona görə də biz bütün layihələrimizi həyata keçirdikdə bu yaş aralarını əhatə edirik. Düşünürəm ki, bu layihələrdə orta məktəblərin yuxarı sinif şagirdlərini də əhatə etmək məntiqlidir. Çünki bu yaşda gənclər onları əmək bazarında nələrin gözlədiyinə dair daha erkən məlumatlı olacaqlar. Onlar gələcəkdə orta ixtisas və ya ali təhsilini seçdikdə nə etmək lazım olduğunu bilməlidilər. Bu məsələdə biz Gənclər Evlərindən maksimum dərədəcə istifadə etmək niyyətindəyik. Hər bir Gənclər Evində peşə hazırlığı ilə bağlı ayrıca otaqlar var. Onlar müasir texniki avadanlıqlarla təchiz olunub. Orada keçirilən təlimlərin sayı artırılacaq. Eyni zamanda Gənclər Evləri məlumatlandırıcı vəsaitlərlə təmin olunacaq. Niyyətimiz ondan ibarətdir ki, hər hansı şəxs ora daxil olanda məşğulluq, reproduktiv sağlamlıq və s. məsələlərlə bağlı geniş məlumat əldə etmək imkanı əldə etsin. Yəni hər hansı əmək birjası və ya keryera günləri təşkil olunanda bu məlumatlar gənclərə vaxtında çatdırılsın. Aydın məsələdir ki, onlar bu haqda televiziya, radio və sosial şəbəkələr vasitəsilə də məlumatları əldə edəcəklər. Amma biz xüsusən bölgələrdəki funksional gənclər mərkəzlərinin işinin səmərəliliyini daha da artırmaq istəyirik. Əsas iş məlumatlandırmadan ibarət olacaq. Çünki bəzən vətəndaşlar, gənclər dövlətin, dövlət strukturlarının gördüyü vacib işlərdən xəbərsiz olur. Gənclər isə daim məlumat axtarışındadırlar. Ona görə də bu məlumatlandırma mexanizmlərini təkmilləşdirməyə çalışırıq.
- İşsizlik və məşğulluqla yanaşı Nazirlər Kabinetinin müşavirəsində bir çox məsələlərə toxunuldu. Onların arasında sizin nazirliyə aid və tədbirlər görülməli olan məqamlar varmı?
- Ölkədə dövlət siyasətinin həyata keçirilməsində hər bir dövlət qurumunun üzərinə müəyyən pay düşür. Biz də Gənclər və İdman Nazirliyi olaraq çalışırıq ki, mövcud qanunvericilik çərçivəsində həm ölkədə sağlam mühitin yaranması, həm korrupsiya ilə mübarizə, həm gənc peşəkarların irəli çəkilməsi və s. önəmli məsələlərdə öz töhfəmizi verək. Bizim də həm mərkəzi aparatımızda, həm yerli idarələrimizdə müvafiq komissiyalarımız var. Demək olar ki, il boyu gənclərlə işləyən məmurların təlimatlandırılması, gənclərin hüquqlarının müdafiəsi, onların arasında sağlam düşüncənin təbliği ilə bağlı müvafiq tədbirlər həyata keçirilir. Gənclər siyasətinin də əsas vəzifələrindən biri ondan ibarətdir ki, ölkənin böyük bir qisminin gənc olduğunu nəzərə alaraq, bu gün ölkədə keçirilən dövlət siyasətini dəstəkləmək və onların proseslərdən kənarda qalmamasını təmin etməkdir.
- Rüşvət və korrupsiya ilə mübarizədə gənclərin rolunu artırmaq üçün hansı işlər görülür?
- Yəqin ki, bu gün müasir Azərbaycan gəncinin ən yaxşı barometri sosial şəbəkələrdir. Gənclərimiz bu şəbəkələrdə fəal təmsil olunurlar. Amma biz dövlət qurumu olaraq keçirdiyimiz görüşlərdə, təlim və seminarlarda gəncləri daim ayıq olmağa, vətəndaş mövqeyi nümayiş etdirməyə, öz hüquqlarını bilməyə və konstruktiv, mədəni formada öz hüquqlarını müdafiə etməyə çağırırıq. Yeri gəlmişkən, hüquq cəmiyyəti və hüquq maarifçiliyi məsələsi yeni Dövlət Proqramında da yer alıb. Ümumiyyətlə, gənclər arasında həm insan haqlarının təbliği, həm də hüquq maarifçiliyi baxımından aparılan tərbiyə işləri geniş yayılıb.
İlkin İzzət
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər