Gənc müəllimənin qəhrəmanlığı |
Müəllif: Admin | Bölmə: Xəbərlər | Vaxt: 5-02-2016, 09:11 | Şərh sayı: (0) | Baxılıb: 252
Gənc müəllimənin qəhrəmanlığı
Rayonlardan birində kəndə təyinat alan müəllim qızın videosu internetdə baxış rekordu qırmışdır. Hamı baxır, qıza əhsən deyir. Telekanalizasiyalar hadisədən reportaj hazırlamışdır. “Filmin” rejissoru isə onları qınamışdı, deyirdi istinad eləmədən filmimi efirə basıblar. Sanki Bakıdan İsmayıllıya coğrafiya müəllimi işləməyə gedən qızın əhvalatı Alexandro İnyaritu-nun son çağlar məşhurlaşan filmi “Xortdan” imiş, bunun kimsə müəllif hüququnu pozubdur.(İngiliscə adı “The Revenant” olan bu filmi Anadolu türkləri “Diriliş” kimi tərcümə ediblər, mən “Xortdan” adını ona görə təklif edirəm ki, bu, filmin məzmununa çox uyğun gələn addır. Di Kaprionun qəhrəmanı filmdə sözün əsl mənasında o biri dünyadan xortlayıb gəlir, diri-diri basdırılır, ölümdən qayıdır).
Azərbaycanın eni-uzunu 500 kilometrdən çox deyil, indiki texnologiyalar dövründə bu cür əl boyda məmləkətdə hansısa rayona, o cümlədən İsmayıllıya “ucqar” demək gülüncdür. Ən azından, coğrafiya müəllimi bunu bilməlidir. Eyni zamanda, başqa nəticə də çıxara bilərik: hakimiyyət özü də etiraf edir ki, Azərbaycanı pis kökə salıblar, artıq hər yer ucqar kimidir. (Hakimiyyətin nə dəxli var soruşsanız, həmin filmin sponsoru prezidentin maliyyələşdirdiyi Gənclər Fondu idi).
Bir haşiyə çıxım. Ümumiyyətlə, bizim təhsil sistemində ən pis öyrədilən fənnlərdən biri coğrafiyadır. Tarixən belə olub. Sanki azərbaycanlılar Yeri öyrənməyi mənasız bir iş sayıblar. Yadımdadır, orta məktəbdə coğrafiya müəllimim o zamankı ÇSSR dövlətinin qısa adını Çexoslovakiya Sosialist Respublikası kimi açmaq yerinə (burada birinci S hərfi Slovakiyanı bildirirdi) Çexoslovakiya Sovet Sosialist Respublikası şəklində oxumuşdu, mən bunu ona irad tutanda isə mübahisəyə girmişdi. Açıb kitaba baxmışdıq, yanıldığını isbat eləmişdim. Hazırda uşaqlarım oxuyan məktəbin dəhlizində isə Xudafərin körpüsünün fotosu asılıb, altına isə “Xudafərin körpüsü (Zəngilan rayonu)” yazılıb. 3 aydan çoxdur mən o yazını dəyişdirə bilmirəm. Müəllimlərə, direktor müavininə demişəm, xeyri yoxdur. Təhsil nazirinə yazdım, cavab gəldi ki, əslində Xudafərin körpüsü Barselonadadır. Hətta indi özümdən şübhələnməyə başlamışam, deyirəm bəlkə Xudafərin körpüsü bizim vəfasızlığımızdan, işğalın uzun çəkməyindən bezib Zəngilana doğru sürüşüb, xəbərim yoxdur.
Bir əhvalat da yazım, yaralı yerimdir çünki. Uşaq bir gün gəldi ki, Kolumb haqda təqdimat hazırlamalıyıq, kömək elə. Mən də ona kitablar, vəsaitlər tapdım, özü yaxşı bir xəritəli təqdimat hazırladı, hətta Kolumbun “Santa Mariya” gəmisinin rəsmini çəkdi. Sabahısı isə müəllim onun bu əziyyətini yerə vurub... Vikipediyadan kseroksla vərəqə çıxarılan məlumat gətirən uşağa daha yaxşı qiymət yazmışdı. Belə müəllimə, belə məktəbə nə deyəsən?
İsmayıllıya yollanan gənc qəhrəmanımızın yanına dönək. Məncə, onun qəhrəmanlığına kölgə salan bir detal hər kəsin diqqətindən yayınmadı: qızın anası da o kəndə gedib, birgə yaşayırlar. Ana yemək bişirir, odun sobasını qalayır, qız isə dərs keçir. Bu idillik mənzərə qəhrəmana yaraşmır. Gərək qız kəndə tək gedəydi. Təklif edirəm Gənclər Fondu filmin növbəti seriyalarında ucqar dağ kəndinə tək yollanan bir müəllim tapsın. Müəllim nəfəsi ilə soyuq sinfi qızdırsın, dərsdən sonra ayağı yalın uşaqları belində evlərinə daşısın, bu zaman ayı ilə güləşsin (filmdəki kimi), gecə isə donmamaq üçün evini ona kirayə verən Məmmədəli dayının dayçasını kəsib qarnına girsin. Yoxsa bunun nəyi qəhrəmanlıq oldu: ana sacda kətə yayır, qız da telini oynada-oynada intervü verir?
Pik saatlarında avtobusun qapısından sallanıb evə dönən gənc paytaxt sakinlərin qəhrəmanlığı da filmlərimizə mövzu olmağa layiqdir.
Son anda internetdə bir xəbər başlığı gördüm: “Ağcabədidə müəlliməni kimlər qaçırıb?” Bah-bah... Görün müəllim və müəllimə peşəsi bizdə necə matah olubdur, artıq onları oğurlayırlar. Yazını oxumadım, müəlliməni qaçıranlar böyük ehtimalla hansısa dağ kəndinin şagirdləri imiş.
Ehtiyat müəllimin yaraşığıdır, özünüzdən muğayat olun, ey hörmətli müəllimlər.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər