Milli birlik |
Müəllif: Admin | Bölmə: Xəbərlər | Vaxt: 30-01-2016, 10:20 | Şərh sayı: (0) | Baxılıb: 286
Milli birlik
Neftin ucuzlaşması, devalvasiya, krizis millətimiz arasında birliyi möhkəmləndirir, bunun özü böyük uğurdur.Örnək üçün, iki gün qabaq “Dəmirbank”la “Azəriqazbank” birləşib “Qazdəmirbank” oldular. Başqa bankların, nazirlik və idarələrin birləşməsi də gündəmdədir. AMEA prezidenti Akif Əlizadənin sözlərinə görə, Fizika İnstitutu ilə Kimya İnstitutunu birləşdirmək, üstünə Riyaziyyat İnstitutunu gəlmək, alınan nəticədən Dilçilik İnstitutunu çıxmaq, nəhayət, Fəlsəfə İnstitutuna bölmək fikirləri vardır.
Çox yaxşı olar. Birlik daha artsın deyə Artur müəllimlə Abid Şərifovu calaq eləmək, baş nazir vəzifəsinə Abid Rasizadə adlı yeni insan tipini rəhbər qoymaq mümkündür. Namxuda, tibb elmimiz çox inkişaf etmişdir.
Tibdən söz düşmüşkən, büdcə vəsaitlərinə qənaət məqsədi ilə Səhiyyə Nazirliyini qəbiristanlıq idarəsinə, bunların cəmini isə Qafqaz Müsəlmanları İdarəsinə birləşdirmək çox yaxşı hərəkət olardı, xalq tərəfindən rəğbətlə qarşılanardı. Nə üçün eyni bir həkim insanı həm əməliyyat, həm dəfn eləməsin, onun cüməaxşamlarında mağara gedib dua oxumasın? Görün dövlət büdcəsinə nə qədər qənaət eləmək, sonra yığılan pulla təzə Avropa Oyunları qayırmaq olar!
Səmərələşdirici təkliflərdən biri də Təhsil Nazirliyi ilə Tələbə Qəbulu üzrə Dövlət Komissiyasını birləşdirməkdir. Qəzet yazır ki, artıq buna yaşıl işıq yandırılıb, yeni yaranacaq Elm və Təhsil Nazirliyinin şefi isə Mikayıl Cabbarov olacaqdır. Əhsən. Ümid edirik Mikayıl müəllim məktəblərdə pis oxuyan uşaqların qapazlanması ənənəsini tələbə qəbuluna da gətirəcəkdir. Hansı abituriyent 250 baldan aşağı toplasa onu elə imtahan salonunda it sürütməsi eləyib ağzını-burnunu qanatmalıyıq.
Dünən general Məhərrəm Əliyevin qohumuna, bazarkomun oğluna xuliqanlığa görə 30 sutka həbs verilməsindən yazmışdım. Gənc bizim bildiyimiz azı 4 nəfəri döyüb, YDM-i dağıdıb, ancaq “cəzasını” görürsünüz. Halbuki, jurnalist Seymur Həziyə dayanacaqda guya bir “işverənə” plastik su butulkası atdığı üçün 5 il həbs cəzası veriblər. Bu boyda ədalətsizlik, haqsızlıq olan dövlətin, ərazinin üstünə göydən bir asteroid düşsə azdır. Ancaq gördüyünüz kimi, düşmür. Çünki milli birliyimiz göydən gələn bəlaları darmadağın edir! “Beşinci element” kinosunda Bryus Uillisin qəhrəmanı göydən gələn daşı od, hava, su, torpaq və sevgi elementlərinin köməyi ilə dağıtdığı kimi bir şey alınır. Bizim beş elementimiz bir az fərqlidir: neft, qaz, kürü, muğamat və İlhamə Quliyeva.
Bu arada Hadı müəllimdən də büdcənin inkişafı sahəsində növbəti səmərəli təklif irəli atılmışdır. Yəqin siz hamınız Hadı müəllimi yaxşı tanıyırsınız, özəlliklə müəllimlər. Çünki Hadı müəllim 40 ildir deputatxanada sosial məsələləri qayırmaqla məşğuldur, keçən il isə müəllimlərə dərsdən sonra bənna, xarrat, dülgər, suvaqçı, rəqqasə, masajist, dəniz qulduru, peşmərgə, ölüyuyan, ofisiant, jurnalist, köşə yazarı, gemorroy həkimi və sairə işlərdə çalışmağı məsləhət görmüşdü. Deyirdi, insan bir maaşla yaşamasın gərək, insan özünə Lənkəranda “Palıdlı” istirahət mərkəzi də açmalıdır. Müəllimlər Hadı müəllimin təklifini sevinclə qarşılamışdılar, bir neçəsinin ürəyi sevindiyindən partlamışdı.
Uzun sözün qısası, indi Hadı müəllim sahibkarları incidən, kosmosdan gəlmə quldur dəstələrinə qarşı çıxıb. Sitat: “Prezident demişkən, gəlin məmurun əlindən vuraq, sahibkarın başını kəsən məmurun əlini qıraq”. Düzü, məncə prezident belə söz deməyib, Hadı müəllim nəsə təxribat edir. İkincisi, Hadı müəllimin cəzası uyğunsuzdur. Baş kəsənin əlini qırmaqla iş düzəlməz, gərək baş kəsənin başını kəsəsən. Cəza cinayətə uyğun olmayanda dövlət möhkəmlənir.
İndi söz baş kəsən təşkilatlarındır.
Musavat.Com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər