Mədəniyyət hadisəsi |
Müəllif: Admin | Bölmə: Xəbərlər | Vaxt: 29-01-2016, 20:08 | Şərh sayı: (0) | Baxılıb: 221
Mədəniyyət hadisəsi
Hansısa generalın qohumu yanacaqdoldurma stansiyasına basqın eləyib oranın qoruqçusunu döymüşdü, dünən həmin gəncə 30 sutka inzibati həbs veriblər. Ar olsun o hakimə. Nə üçün bu cür perspektivli gənci zindana salırsan? Bəyəm o da hansısa kasıbın qohumudur? Bu baxımdan, gənc çox haqlı olaraq qərardan apelyasiya şikayəti veribdir. Ümid edirəm bu cızmaqara qəzetdə çıxana qədər hakimin ağlı başına gələr, uşağın qərarını cırıb atar, ədalət zəfər çalar. Bizim gələcəyimiz belə gənclərdən asılıdır. Sən bu gün bazarkomun oğlunu, generalın qohumunu 30 sutka dama basacaqsan, sabah heç kim vətəni qorumağa getməyəcək.
Özü də bu saat hamımız əsəbiyik, devalvasiya bir yandan, Qarabağ problemi o yandan - gənclərdə dözüm qalıb? Neftin qiyməti düşəndən bəri hətta mən özüm də yanacaqdoldurma məntəqəsinə təpik qoymaq istəyirəm, baxmayaraq heç maşınım yoxdur.
Sözgəlişi, millətimizin bir hissəsi də keçmiş MTN şefi Eldar müəllimin niyə tutulmadığından narazıdır. Deyirlər, nə təhər olur, nazirlikdə o qədər cinayətkar saxlayan adam, o boyda generalı quldur çıxan şəxs özü bəyəm mələkdir?
Burda da açıq-aydın görünür ki, belə düşünənlər uca millətimizə yaddır. Problemin kökləri Eldar müəllimin haralı olmasının müəyyənləşdirilməsindəki çətinliklərdən qaynaqlanır. Yadınıza salın: o nazir vəzifəsindən çıxarılan vaxt az qalmışdı tutulsun, hətta müstəntiqin əli qapının zənginə uzanmışdı. Bu vaxt xəbər gəldi ki, Eldar müəllim şərurlu deyil, qazaxlıdır. Dərhal istintaq qrupuna “geri çəkilin” əmri verildi.
Araşdırma başlandı. Nəticələr isə məyusedicidir, Eldar müəllimin nəinki naxçıvanlı və şərurlu, nəinki qazaxlı, hətta kürdəmirli olması, ora isə ulu babasının Qarabağdan qaçqın kimi gəlməsi kimi təkzibedilməz dəlillər ortaya çıxdı! Uzun sözün qısası, bunun haralı olması dövlət səviyyəsində təsdiq ediləndən sonra tutacaqlar. İndi tutsan nə biləsən kimi tutursan? Peşmançılıq olar.
Məhz bu baxımdan mən ANS-lə MTRŞ arasındakı davanın filoloji müstəvidən qaynaqlanmasını təbii sayıram. Xatırladım ki, ANS-in əməkdaşı Mirşahin müəllim öz verilişində qurumun adını “mıtırışı” kimi səsləndirir. APA agentliyi bu münasibətlə Azərbaycan Milli Elmlər Akademiyasının Nəsimi adına Dilçilik İnstitutunun Tətbiqi Dilçilik şöbəsinin müdiri, Dövlət Dil Komissiyasının üzvü İsmayıl Məmmədovdan münasibət öyrənmişdi. (O uzunluqda vəzifəsi olandan sonra İsmayıl müəllimin dili uzun olmalıdır, gərək sözünə qulaq asaq). Sitat: “Milli Televiziya və Radio Şurasının (MTRŞ) ”mıtırışı" kimi səsləndirilməsini məqbul hesab etmirik. Dövlət orqanının adı “metereşe” kimi səsləndirilsə daha yaxşı olar". Ay Allah atana rəhmət eləsin, bunu de da bə! Bütün problemlərimiz elə bundan qaynaqlanır.
Bu arada, Bakı Mədəniyyət İdarəsinin müdirini dəyişiblər. Aydın məsələdir. Daşlıq yerə çatanda neftli sahədə sürdüyün atı minə bilməzsən. Hər örüşün öz nəqliyyatı olmalıdır. Bax, “Gülüstan” sarayının dalı pullu vaxtımızda niyə çatlamırdı? Orda nə qonaqlıqlar olurdu, kürülər sel kimi axırdı, neft yaxmacı dilim-dilim, şampanski vedrə ilə, bəh-bəh... İndi isə əlimizi açıb Dünya Bankı kimi qotur qurumdan pul dilənirik: “Sən o yanındakı qəşəng BVF-nin canı, 4 milyard kredit ver”. O da özünü yerli rəhmətlik banklarımız kimi aparır, deyir, iş yerindən arayış gətir, kredit verim. İş yeri olsaydı səndən krediti niyə istəyirdik? Milyonu açıldı, iki milyonu bağlandı. İstəyirdik qabağa düşək, vurduq dala getdik.
Eyni zamanda Bakıda mədəniyyət idarəsinin olması da bir şok xəbərdir. Mən elə bilirdim Bakı çox mədəniyyətsiz, tərbiyəsiz yerdir. O cür general qohumuna 30 sutka arest verən şəhərdə mədəniyyət olarmı?
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər