Rusiya ilə Türkiyə müharibənin bir addımlığında... |
Müəllif: Admin | Bölmə: Xəbərlər | Vaxt: 2-02-2016, 12:44 | Şərh sayı: (0) | Baxılıb: 253
Rusiya ilə Türkiyə müharibənin bir addımlığında...
İki ölkənin maraqları Suriyada toqquşur; Qabil Hüseynli: “Bu, bütövlükdə NATO-Rusiya toqquşması kimi dəyərləndirilə bilər”Türkiyə ilə Rusiya müharibənin bir addımlığındadır. Dünya mətbuatının diqqətində olan bu məsələ əksər politoloqlar tərəfindən məhz bu cür qiymətləndirilir. İki ölkənin maraqlarının Suriyada kəsişməsi məhz burada lokal xarakterli müharibə ilə nəticələnə bilər. İngiltərənin “Tayms” qəzetinin iddialarına görə, hər iki ölkə Suriya sərhədində hərbi varlığını gücləndirib.
Belə ki, Türkiyə İŞİD-in nəzarətindəki Suriya ərazilərini minalardan təmizləməyə başlayıb. Bu, Ankaranın quru əməliyyatlarına hazırlaşdığını göstərir. Kreml isə PKK-nın Suriya qolu olan YPG ilə yaxınlaşmağa başlayıb. Rusiya ötən həftə Suriyanın Türkiyə ilə sərhəddə yerləşən Qamışlı şəhərində aviabaza tikmək üçün 200 əsgər göndərib. Prezident Rəcəb Tayyib Ərdoğan ABŞ vitse-prezidenti Co Baydenlə görüşü zamanı Rusiyanın buradakı hərbi varlığına qarşı səbrli davranmayacaqlarını bildirib. Bundan əlavə, ötən gün rusiyalı jurnalist Sergey Dorenko “Replika” proqramının efirində bəyan edib ki, yaxın vaxtlarda Türkiyə Suriyaya müdaxilə edəcək və rusiyalılar yaxın həftələrdə onlara atəş açmalı olacaqlar. Dorenko deyib ki, Türkiyə 80 milyon əhaliyə malik NATO ölkəsidir. Türklər Suriyanın şimal-qərbini bizim Donbası qəbul etdiyimiz kimi hesab edirlər. Onlar düşünürlər ki, həmin ərazilərdə soydaşları yaşayır. Və tezliklə bizim onlarla, türklərlə müharibəmiz olacaq.
Jurnalist güman edir ki, yaxın vaxtlarda Türkiyə Suriyaya müdaxilə edəcək və rusiyalılar onlara atəş açmalı olacaqlar. “Biz müharibəyə başlayacağıq”, - deyə, Dorenko fikrini yekunlaşdırıb.
İki ölkə arasında qarşıdurmaya səbəb olan amillərdən biri də odur ki, Rusiya ötən il oktyabrın 31-də Misirin Sina yarımadası üzərində partladılan sərnişin təyyarəsindən Türkiyəyə qarşı təzyiq və təbliğat elementi kimi istifadə etməyə cəhd edir. Belə ki, Rusiya Federal Təhlükəsizlik Xidməti bu terror aktında “İslam dövləti” terror birləşməsi ilə əlaqəli olan “türk milliyyətçi qruplaşması” olan “Boz qurd” təşkilatından şübhələnir. Bu haqda “Kommersant” yazıb.
Regionun ən güclü dövlətləri olan Rusiya və Türkiyənin müharibə astanasında olması fikrinə münasibət bildirən politoloq Qabil Hüseynli “Yeni Müsavat”a açıqlamasında dedi ki, vəziyyət gərgin olsa da, müharibə ehtimalı yoxdur: “Rusiya-Türkiyə münasibətlərində vəziyyət olduqca gərgindir. Rusiya sanki Türkiyəni yenidən gərginliyə çəkmək istəyir. Türkiyənin sərhədlərinin necə qorunduğunu, hərbi-hava qüvvələrinin sayıqlığını bir növ yoxlamaq istəyir. Bu, Rusiya tərəfindən bir provokasiyadır, Türkiyəni lokal xarakterli, Suriya miqyasında müharibəyə cəlb etmək istəyir.
Rusiya başa düşür ki, Suriyadakı münaqişənin həllində Türkiyənin mövqeyi güclüdür. Bəzi nüanslara baxmayaraq, Suriya ordusu bütövlükdə Türkiyənin təsiri altındadır. Türkiyə gələcək Suriyanın taleyinin həll edilməsində böyük rol oynayacaq.
Bu baxımdan da Rusiya gah təyyarə olayları ilə, gah yardım karvanının vurulması ilə müxtəlif provokasiyalara gedir".
Ekspertin sözlərinə görə, Rusiya bu məsələdə nə qədər kəskin davransa da Türkiyənin arxasında olan NATO ilə müharibəni gözə ala bilməz: “Rusiya mətbuatında bir çoxları belə hesab edir ki, Türkiyə ilə Rusiya müharibəyə doğru gedirlər. Ancaq mən inanmıram ki, bu münaqişə sonda müharibə ilə nəticələnsin. Çünki Türkiyə ilə müharibə bütövlükdə NATO ilə müharibə deməkdir. Belə bir müharibə isə Rusiyaya lazım deyil. Nə qədər şantajdan və ya müxtəlif metodlardan istifadə etsə də, Rusiyanın indiki ağır iqtisadi vəziyyətində bu müharibə onu tamamilə çökdürə bilər.
Bu müharibə Türkiyəyə də lazım deyil. Çünki istənilən müharibə tərəflərdən hər birinə ziyan vurur. Bu baxımdan Türkiyə prezidenti Rəcəb Tayyib Ərdoğan Putinlə danışmaq istəyir. Putin isə naz edən adamlar kimi danışıqlardan qaçır və bununla öz çəkisini artırmaq istəyir. Amma hər halda, Türkiyə prezidenti öz hərbi təyyarələrinə, hava hücumundan müdafiə qüvvələrinə Rusiyanın sərhədi pozan təyyarələrini vur əmrini verib. Bundan əlavə, hərbi təyyarələr hazırlıq vəziyyətinə gətirilib. Bunları da nəzərdən qaçırmaq olmaz. Rusiya ən yeni bombardmançı təyyarələrini Suriyaya göndərir. Lakin bütün bunlar vəziyyəti xilas etməyəcək".
Q.Hüseynlinin sözlərinə görə, Putin davranışları ilə həm də Amerikanı qarşısına alıb və indi gündəmi dəyişməyə çalışır: “Pentaqon da Rusiyaya xəbərdarlıq edib və bildirib ki, sərhədlərin pozulması hallarına son qoymaq lazımdır. Üstəlik, son dövrlərdə Amerika ilə Rusiya arasındakı münasibətlər çox gərginləşib. Rusiya prezidenti Putinin ağır rüşvətxorluqda və digər neqativ hallarla bağlı ittiham edilməsi və bununla bağlı film çəkilməsi Putini bütün dünyanın gözündən salıb və xalqın ona rəğbətini də xeyli azaldıb.
Belə olan halda indiki sərhəd pozma əməliyyatı Amerika ilə Rusiya arasında olan gərginlik və bunun bütün dünya mətbuatında işıqlandırılmasının fonunda Putinin gündəmi dəyişmək cəhdlərindən başqa bir şey deyil. Putin dünya mətbuatının diqqətini Rusiya ilə Türkiyə arasında müharibə ehtimalının artması fikrinə cəlb etməklə onun şəxsiyyəti haqqında dünya mətbuatında gedən fikirləri başqa bir səmtə yönəltmək istəyir".
Rusiya ilə Türkiyənin Suriyada toqquşma ehtimalına gəlincə, Qabil Hüseynli bildirdi ki, Suriya məsələsi təkcə Türkiyənin məsələsi deyil, bütövlükdə NATO-nun, Qərbin məsələsidir: “Ona görə də Türkiyə Suriya məsələsində quru qoşunlarından istifadə etmək öhdəliyini öz üzərinə götürüb. Ancaq hava hücumundan müdafiə NATO qüvvələri tərəfindən həyata keçirilir. Yəni Suriya müharibəsi və lazım gələrsə, bölgədə Rusiya ilə lokal toqquşma, bütövlükdə NATO-Rusiya toqquşması kimi dəyərləndirilə bilər. Çünki aparılan bütün danışıqlar bu səmtdədir. Əks halda, Türkiyə bütün məsuliyyəti bu şəkildə öz üzərinə götürməz. Bir sözlə, aranı qatan Rusiyadır, ona qarşı çıxan NATO-dur. Lakin NATO-nun öndə gedən üzvlərindən biri kimi Türkiyə bu məsələdə önə çıxıb. Lakin yaxın zaman üçün iki ölkə arasında toqquşma gözlənilmir. Rusiya ilə Türkiyənin müharibəyə başlaması çox zəif ehtimaldır. Bu daha çox Rusiyanın gündəmi dəyişdirmək istəyi və Türkiyənin gözünü qorxutmaq cəhdidir. Lakin Rusiya onu da unutmur ki, Türkiyə NATO-ya üzv olan digər ölkələr kimi NATO-dan güclü dəstək alır”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər