Zavodları əllərindən alınan sahibkarlardan prezidentin çağırışına dəstək |
Müəllif: Admin | Bölmə: Xəbərlər | Vaxt: 20-01-2016, 18:43 | Şərh sayı: (0) | Baxılıb: 194
Zavodları əllərindən alınan sahibkarlardan prezidentin çağırışına dəstək
Zülfüqarlı qardaşları 1750 nəfəri işlə təmin edə biləcəklərini bəyan etdilər; “Ümidimiz cənab prezidentədir” Prezident son müşavirədə qeyri-neft sektorunun inkişaf etdirilməsinin vacib olduğunu xüsusilə qeyd edib. İlham Əliyev qeyri-neft sektoru dedikdə ilk növbədə kənd təsərrüfatı, sənaye istehsalı və emal sənayesini nəzərdə tutduğunu açıqlayıb. Bundan əvvəl keçirilən müşavirədə isə məmurların sahibkarlardan pul tələb etdiklərini və buna son qoyulmalı olduğunu açıqlamışdı.
“Sahibkar heç kimə borclu deyil. Nə yerli icra hakimiyyəti orqanlarına, nə də hüquq-mühafizə orqanlarının nümayəndələrinə. Sahibkar yalnız dövlətin vergisini verməlidir, vəssalam. Sahibkarları boğurlar, soyurlar, incidirlər. Bu, dözülməz haldır. 9 ayda 67 minə yaxın iş yeri yaradılıb, 30 min bağlanıb. Bax, bunun təhlilini aparmaq lazımdır. Mənə də məlumat verilsin. İş yerlərini bağlayan sahibkarları dəvət edib, soruşmaq lazımdır...” - deyə prezident bildirmişdi.
Sahibkarların boğulması son nəticədə iş yerlərinin bağlanması, nəhəng iş adamlarının ölkədən getmələrinə gətirib çıxarır.
Belə iş adamları arasında ilk sıralarda Zülfüqarlı qardaşlarının gəldiyini söyləsək yanılmarıq. İş adamı Rövşən Zülfüqarlı “Yeni Müsavat”a deyib ki, prezidentin çıxışlarını maraqla dinləyirlər. Əllərindən alınan zavodlar özlərinə qaytarılacağı təqdirdə xeyli vətəndaşa iş, əmək haqqı verməyə də hazırdırlar: “Əlbəttə ki, bizim zavodlarımızı qaytarsalar, haqqımızı bərpa etsələr, biz Azərbaycanda uğurla başladığımız, lakin böyük qanunsuzluqlarla əlimizdən alınan iş yerimizi bərpa edə bilərik. Biz haqq səsimizi prezidentə çatdırmaq üçün illərdir ki, cəhdlər göstəririk. Bilirsiniz ki, biz dağılmış, bütünlüklə iş fəaliyyətini itirmiş zavodları - ”Bakı Elektroştamp" və “Bakıpoladtökmə” zavodlarını alaraq yenidən qurmuşduq. Həmin zavodlarda xaricdən alıb gətirdiyimiz ən son dəzgahları quraşdırmaqla, texnologiyaları tətbiq etməklə müasir standartlara cavab verən metal məmulatlar istehsal edirdik. Zavodlarımızda 1500 nəfər işçi çalışırdı. Dövlətə vergi ödəyirdik. İşçilərimizə stabil əmək haqqı verirdik, işçi geyimlərini, normal qidalanmalarını, təhlükəsiz iş şəraiti təmin etmişdik. Amma nə odu? Əvvəlcə qanunsuz həbslərə yol verməklə bizlərdən zavodlardakı payımızın böyük hissəsi alındı, sonradan isə özümüzü də zavodların rəhbərliyindən birdəfəlik uzaqlaşdırdılar. Zavodların işini iflic edib 1500 nəfəri işsiz qoydular.
Rasim Məmmədovun qoçu dəstəsi 1500 Azərbaycan vətəndaşını işsiz qoydu. Əgər bizim haqqımız bərpa olunsa, əlbəttə ki, iş yerlərini yenidən yaradarıq və üstəlik, artırarıq da. Biz ölkə rəhbərinə, cənab prezidentə inanırıq. Ümid edirik ki, əlimizdən alınan zavodlar özümüzə qaytarılacaq və 1500 nəfərin işlə təmin olunmasına nail ola biləcəyik".
“Zavodları əlimizdən aldılar, amma işlətmədilər. Bu, ölkə iqtisadiyyatına vurulan zərbədir. İqtisadi sahədə diversiyadır”
R.Zülfüqarlı deyib ki, xaricdən valyuta ilə alınan bir çox məhsulların ölkə daxilində istehsalı mümkündür: “Qaradağ rayonu ərazisində nəhəng ”Xəzər-boru" zavodunu Rasim Məmmədovun dəstəsi hucum çəkib əlimizdən aldı. Həmin zavodda 250 nəfər işçi çalışırdı. Bu gün həmin zavodda, digər 2 zavodda 1 nəfər də olsun işləmir. Zavodları əlimizdən aldılar, amma işlətmədilər. Bu, ölkə iqtisadiyyatına vurulan zərbədir. İqtisadi sahədə diversiyadır. Bu gün də 1750 nəfər işçimizin, özümüzün ümidi cənab prezidentədir. Həmin 1750 nəfər işçinin böyük əksəriyyəti bu gün işsiz-gücsüz, maddi sıxıntı içindədir. Ac-yalavac küçələrdə iş axtarışındadırlar. Ümidliyik ki, prezident bizim haqq səsimizi eşidər, iş yerlərimizin bərpa olunmasına göstəriş verər".
R.Zülfüqarlı bildirib ki, “Xəzər boru” zavodu onlardan alınandan sonra orada istehsalı dayandırmaqla ölkəyə eyni məhsulların dəfələrlə baha qiymətə gətirilməsinə nail olublar: “O zavodda istehsal olunan borular dünyada qəbul olunan standartlara uyğun idi. Bakı-Ceyhan neft kəmərinin çəkilişində istifadə olunan yüksək təzyiqə davamlı boruların istehsalı zavodumuzda 800 manata başa gəlirdi. Bu adamlar nə etdilər? Zavodu əlimizdən aldılar, orada istehsalı tamamilə dayandırıb 250 işçini əmək haqsız qoydular. Zavodda istehsal olunan boruları xaricdən 3 min 500 avroya almağa başladılar. Bu gün ”Xəzər boru" zavodunda quşlar yuva qurmağa başlayıb, “Bakıelektroştamp”, “Bakıpoladtökmə” zavodlarında tülkü balalayır. Deməyim odur ki, zavodlar əlimizdən alınıb, 1750 işçi taleyin ümidinə buraxılıb, zavodlarda quraşdırılan dəzgahlar, qara metal ehtiyatları talanıb. Bizim sahibkar kimi dövlətə vergi ödəməyimizin qarşısını alıblar. Zavodlarımızı bizə qaytarsınlar, iş yerlərini yenidən açaq, dövlətə yenidən vergi ödəyək".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər