Rusiyanın haqqı var, amma... |
Müəllif: Admin | Bölmə: Xəbərlər | Vaxt: 25-11-2015, 22:15 | Şərh sayı: (0) | Baxılıb: 217
Rusiyanın haqqı var, amma...
Rusiyanın İŞİD-lə mübarizədə Xəzər dənizi üzərindəki hava məkanından istifadə etməsi qonşuluqdakı dövlətləri də narahat etməyə başlayıb. Rusiya prezidenti Vladimir Putin 2 gün öncə Tehranda Türkmənistan prezidenti Qurbanqulu Berdımuhəmmədovla görüşdə bildirmişdi ki, Rusiya Sinay yarımadası üzərində təyyarəni vuran terrorçular cəzalanana qədər Xəzər dənizi üzərindən hava məkanını istifadə etməyə davam edəcək: "Rusiya Xəzər dənizi üzərindəki hava məkanından İŞİD-lə mübarizədə və terror aktlarında əli olanları cəzalandıranadək istifadə edəcək".
Lakin o, qonşu dövlətlərin narahatlığının da nəzərə alınacağını istisna etməmişdi: "O ki qaldı bizim regiondakı dostlarımızın Xəzər dənizi üzərindəki hava məkanından istifadə edilməsindən narahatlığına, bizim qazaxıstanlı dostlarımız hələ heç nə deməyiblər, lakın biz bunu nəzərə alacağıq".
V.Putin əlavə edib ki, onlar anlayırlar ki, bəzi narahatlıqlar yaranır, lakin Rusiyanın terrorizmlə mübarizədə göstərdiyi bütün səylərin yükü ilk növbədə məhz Rusiyanın üzərinə düşür: "İŞİD və digər terror təşkilatları heç kimə mərhəmət vermir, onlar vəhşilik edirlər. Ona görə də, əgər hər hansı bir narahatlıq yaranırsa, onda onları minimuma endirmək lazımdır. Lakin bizim təyyarə ilə bağlı faciəvi təcrübəni nəzərə alsaq, onda biz cinayətkarları cəzalandırmaq üçün lazım bildiyimiz müddətə qədər bunu etməyi davam etdirəcəyik".
Bəzi ekspertlər hesab edirlər ki, Putinin açıqlaması Xəzərsahili ölkələrə növbəti təzyiq vasitələrindən biridir. Azərbaycandakı ekspertlərin isə məsələyə öz yanaşmaları var.
Milli.Az-ın məlumatına görə, milli təhlükəsizlik nazirinin sabiq müavini Sülhəddin Əkbər musavat.com-a deyib ki, Rusiya ilk dəfə qanadlı raketlərini döyüş şəraitində sınaqdan keçirmək üçün belə bir siyasətə əl atıb: "Məsələnin ümumi və xüsusi tərəfləri var. Rusiya silahlarını sınaqdan keçirməklə dünyaya sübut etmək istəyir ki, onun da ABŞ kimi müasir texnikaları var, uzaqdan istənilən ölkəni vura bilər, itki də verməz. Digər mesajlardan biri də Xəzərsahili ölkələrədir. Rusiya bildirmək istəyir ki, regionda hakim dövlətdir".
Sabiq nazir müavini Rusiyanın Xəzər sahilindən əməliyyatlarına Azərbaycanın icazə verib-verməməsi ilə bağlı bunları dedi: "Hüquqi baxımdan götürsək, Rusiya Xəzərdən, neytral zonadan bu zərbələri endirə bilər. Azərbaycandan icazə almağına da ehtiyac yoxdur. Terrorla mübarizə Rusiyanın bütün hərəkətlərinə legitimlik verir. Bu baxımdan Azərbaycan buna etiraz da edə bilməz. Rusiya bu məsələdə bizimlə hesablaşmaya bilər. Şimal qonşumuz Azərbaycan sularından istifadə etmir. Dövlətimiz Rusiyanın terrorla mübarizədə Xəzərin hava məkanından istifadə etməsinə etiraz edə bilməz. Çünki burada terrora qarşı mübarizədən söhbət gedir".
Təhlükəsizlik və beynəlxalq məsələlər üzrə ekspert, "Baku Network" ekspert qrupunun rəhbəri, politoloq Elxan Ələsgərov isə Milli.Az-a açıqlamasında bildirib ki, gəmilərdəki nisbətən ən son sistemlərdən buraxılan raketlər terrorla mübarizə ilə yanaşı, həm də güc nümayişidir. Lakin bu fakt bölgədə xoş olmayan ab-hava yaradır: "Azərbaycan terrora qarşı mübarizəyə "hə" deyir, amma Xəzər dənizindən raketlərin buraxılmasına birmənalı baxa bilmərik. Diplomatiyamız xeyli vaxtdır Xəzəri sülh dənizinə çevirmək uğrunda çalışır, digər tərəfdən də bu cür hərbi əməliyyatlar təşviş olmasa da, bir az narahatlıq doğurur. Çünki bu Xəzərdə lazımsız ağır ab-hava yaradır. Amma biz Rusiyanın terrorla mübarizəsini dəstəkləyirik. Terrorizmə son qoymaq lazımdır. Çünki özümüz də terrordan çox əziyyət çəkmişik. Ona görə də Rusiyanın Suriyada terrorla mübarizədə iştirakda hər cür haqqı var. Lakin terrorla mübarizənin Xəzər dənizindən aparılmasına o qədər də sevinə bilmərik".
İlkin İzzət
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər