İmam Mehdi (ə.f) Quranda (Birinci hissə) |
Müəllif: Admin | Bölmə: Slide, Qurani-Kərim | Vaxt: 18-01-2016, 11:12 | Şərh sayı: (0) | Baxılıb: 884
İmam Mehdi (ə.f) Quranda (Birinci hissə)
İslam cameəsinin nəzərinə əsasən, İslam təməlinin etiqad və məfhumlarının hamısının ilahi kökü vardır. Həmçinin İslamın təməl inanclarından biri də İmam Mehdinin (ə.f) zühuruna etiqad bəsləməkdir. Onun ümumi forması və əsas kökü Quranda təcəlla tapmışdır. Bu böyük səmavi kitab digər motivlər kimi, bu zəmində də ümumi və əsaslı görüşə toxunmuş və həmin xoşbəxt günə qədəm qoymağı bütün İslam ardıcıllarına müjdə vermişdir.Quranda çoxlu ayələr vardır ki, din başçıları[1] onları İmam Mehdinin (ə.f) müqəddəs varlığı və o həzrətin mübarək zühuruna təfsir və təvil etmişlər.
Birinci ayə:
هُدًى لِلْمُتَّقِينَ الَّذِينَ يُؤْمِنُونَ بِالْغَيْبِ
“...Müttəqilərə (Allahdan qorxanlara, pis əməllərdən çəkinənlərə) doğru yol göstərəndir. O kəslər ki, qeybə inanırlar...”[2]
Cabir ibn Abdullah Ənsari müfəssəl hədisin nəqli əsnasında deyir: Cəndəl ibn Cünadə ibn Cübeyr Yəhudi Allahın elçisinin (s) yanına gəldi və verdiyi suala cavab aldıqdan sonra İslamı qəbul etdi. Həmin vaxt Allah elçisinin (s) vəsiləri (canişinləri) barədə o həzrətə (s) sual verdi. Allahın Peyğəmbəri (s) onun cavabında onların adlarını bir-bir çəkdi və bura çatdıqda buyurdu: “Ondan (İmam Həsən Əskəridən (ə)) sonra oğlu Muhəmməddir ki, Mehdi, Qaim və Höccət çağırılır. O, gözlərdən gizli olacaq, sonra zühur edəcəkdir. Zühur etdiyi zaman yer üzünü zülm və sitəm bürüdüyü kimi ədalətlə dolduracaqdır”. Sonra buyurdu: “Xoş onların halına ki, onun qeyb dövründə səbr edərlər. Xoş o kəslərin halına ki, onların məhəbbətində sabitqədəm olarlar. Onlar həmin təqva əhlidirlər ki, Allah Öz kitabında onları vəsf etmiş və buyurmuşdur: “...Müttəqilərə (Allahdan qorxanlara, pis əməllərdən çəkinənlərə) doğru yol göstərəndir. O kəslər ki, qeybə inanırlar...”[3]
İmam Sadiq (ə) da bu ayənin təfsirində buyurmuşdur:
المتقون شيعة علي عليه السلام وأما الغيب فهو الحجة الغائب
“Müttəqilər Əlinin (ə) şiələridir. Qeybə gəlincə o, qeybə çəkilən höccətdir”.[4]
İmam Muhəmməd Baqir (ə) bu ayənin təfsiri, həmçinin İmam Mehdinin (ə.f) zühuru barədə buyurmuşdur:
“Qaim qiyam etdikdə orada “Allahdan başqa bir məbud yoxdur və Muhəmməd Onun elçisidir” nidası ucalmadığı təqdirdə yer kürəsində heç bir abadlıq və ərazi qalmayacaqdır”. Bu, Allah-taalanın həmin dediyidir:
وَ لَهُ أَسْلَمَ مَنْ فِی السَّماواتِ وَ اْلأَرْضِ
”Göylərdə və yerdə olanlar istər-istəməz Ona (Allaha) təslim olmuşlar”.[5]
İmam Mehdi (ə.f) Allahın elçisi (s) qəbul etdiyi kimi cizyəni qəbul etməyəcək və bu, Allah-taalanın həmin dediyidir:
وَقَاتِلُوهُمْ حَتَّىٰ لَا تَكُونَ فِتْنَةٌ وَيَكُونَ الدِّينُ كُلُّهُ لِلَّهِ
“(Yer üzündə) fitnə (şirk) qalmayıb, bütün din (ibadət) yalnız Allaha məxsus olanadək onlarla vuruşun”.[6]
[1] İmamlar
[2] “Bəqərə” surəsi, 2-3 ayə
[3] “Yənabiul-məvəddət”, c.3, səh.283
[4] “Biharul-ənvar”, c.51, səh.52
[5] “Ali-İmran” surəsi, 83-cü ayə
[6] “Ənfal” surəsi, 39-cu ayə
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər