İmam Mehdi (ə.f) yeni din, yeni kitab gətirəcəkmi? |
Müəllif: Admin | Bölmə: Sual-Cavab | Vaxt: 1-10-2015, 19:57 | Şərh sayı: (0) | Baxılıb: 2577
İmam Mehdi (ə.f) yeni din, yeni kitab gətirəcəkmi?
İslam dini Allah tərəfindən nazil olmuş bir dindir. Bu din səmavi olması ilə yanaşı, həm də bütün səmavi dinlərin ən kamilidir. Allah tərəfindən Həzrət Muhəmmədə (s) nazil olmuş bu din Qiyamət gününə qədər dəyişilməyəcək, təhrifdən uzaq olacaqdır. Bu dinin təhrif və sapmalardan mühafizəsi İmam və ilahi övliyaların öhdəsinə düşür.
İmam Mehdinin (ə.f) qeyb dövründə bu vəzifə din alimlərinin, müctəhidlərin üzərinə düşür. İmamlardan fərqli olaraq, din alimləri mütləq şəkildə məsum deyillər, buna görə də onların vəzifəsi əldə etdikləri dəlillər sayəsində hökm çıxartmaqdır. Yəni hər şey zahiri qanunlar əsasında təşkəkkül tapır. Həqiqi hökmlər isə yalnız imamların səlahiyyət və ixtiyarlarındadır. Buna görə də İmam Mehdinin (ə.f) zühuru zamanı bütün zahiri hökmlər həqiqi hökmlərə çevriləcəkdir. Bu, İmamın yeni din gətirməsi anlamına gəlmir. Çünki Həzrət Mehdinin (ə.f) imaməti, hökm və qəzavəti zatən İslam dininin həqiqətidir.
Dini mətnlərdə qeyd edilir ki, Həzrət Mehdinin (ə.f) qeyb dövründə həqiqətdən sapmış və həvayi-nəfslərinə uymuş bəzi alimlər İslam dininin bir sıra hökmlərini, Quranın göstərişlərini istədikləri kimi dəyişməyə cəhd edəcəklər. Beləliklə, bir çox həqiqi hökmlər gözardı ediləcəkdir.[1]
Qeyb dövründə dinə vurulan zərbələr daha çox və güclüdür. Çünki bu dövr həm də nəzəriyyələr dövrüdür. İnsan hər şeyi öz əql və düşüncəsi əsasında araşdırmaq istəyir. Bu iş nəfsi istəklər nəticəsində görüldükdə daha da pis vəziyyət alınır.
Bəzi insanlar İslam dininin həqiqi qanun və qaydalarını unutmuşlar. Onlar üçün həqiqi din namaz-oruc, bir də bəzi nəcis adlandırılan şeylərdən çəkinməkdir. Bəzən qarşıya qadağan olunmuş iş çıxdıqda müxtəlif hiylə və bəhanələrlə Allah qanununu tapdalamağa cəsarət edir, buna qarşı çıxırlar. Bəzən onların təfəkküründə haram və halalın sərhəddi pozulmuş, hökmlər aydın şəkildə görünmək əvəzinə, duman içində itib batmış, görünməsi çətinləşən bir materiyaya çevrilmişdir. Belə bir zamanda İmam Mehdi (ə.f) zühur edib, Allahın bəndələrinə əmr etdiyi həqiqi hökmləri ortaya çıxartdıqda, bu, sözsüz ki, şübhə ilə qarşılanacaq və yeni din anlamına yozulacaqdır.
İmam Sadiqdən nəql olunan hədislə tanış olduqda məlum olur ki, İmam Mehdi (ə.f) zühur edən zaman insanları yenidən İslam dininə tərəf çağırar və uzaqlaşdıqları şeyə doğru onları qaytarmaq üçün bələdçilik edər.[2]
Bütün bunları araşdırdıqdan sonra belə bir nəticəyə gələ bilərik ki, İmam Mehdi (ə.f) zühur etdikdə İslam dinində heç bir dəyişiklik işləri aparmayacaqdır. O Həzrətin gördüyü iş çaşqınlıq və şübhələrə son qoymaq olacaqdır. Həzrət Mehdi (ə.f) İslam Peyğəmbərinin gördüyü işləri görəcəkdir. Allahın Rəsulu (s) cəhalətin kökünü məhv etdiyi kimi, o Həzrət də (ə.f) dində olan bidətləri məhv edəcəkdir.[3]
[1] Ətraflı məlumat üçün İbrahim Əmininin “Dadqostəre-cəhan” kitabına müraciət edə bilərsiz.
[2] “Kəşful-ğummə”, c.3, s.254; “İrşad Mufid”, s.343.
[3] “Biharul-Ənvar”, c.52, s.352
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər