Ermənistanın “mədən-sənaye dövləti” olmaq arzusu gözündə qaldı |
Müəllif: Admin | Bölmə: Xəbərlər | Vaxt: 9-01-2016, 11:11 | Şərh sayı: (0) | Baxılıb: 199
Ermənistanın “mədən-sənaye dövləti” olmaq arzusu gözündə qaldı
Azərbaycanlı alim işğalçı ölkənin Mədən Sənayesində Şəffaflıq Təşəbbüsü Təşkilatının İdarə Heyətinə üzv olmasına imkan verməyib
Qubad İbadoğlu: “Ən azı mötəbər bir təşkilat Ermənistanın işğalçı mövqeyini özünün bəyanatı ilə təsdiqlədi və Ermənistan qarşısında belə bir şərtlə çıxış etdi ki...”
Azərbaycan ərazilərini 25 ildən artıqdır işğal altında saxlayan Ermənistan ölkəmizə yüz milyardlarla dollar ziyan vurub. İşğal altında olan ərazilərin yeraltı və yerüstü təbii ehtiyatlarla zəngin olması isə təcavüzkar ölkəni son illərin böhranlı vəziyyətlərində xilas edir. Ermənistan özü də həyasızcasına etiraf edir ki, işğal altındakı ərazilərdə onlarla xarici şirkətlər çalışır və bölgəyə yatırım qoyur.
Düzdür, bu şirkətlərin əksəriyyəti erməni diasporunun təsiri altındadır və ya birbaşa ermənilərə məxsusdur. Lakin şirkətlərin təmsil olunduğu ölkələrin siyahısına baxsaq, arada üçüncü dərəcəli ölkələrlə yanaşı, Qarabağ münaqişəsinin tənzimlənməsini üzərinə götürən həmsədr dövlətlərin də adını görmək mümkündür ki, bu da acı təəssüf doğurur. İşğalçı ölkə isə Azərbaycana məxsus sərvətlərin talan edilməsi prosesində onlardan da dolayısı ilə dəstək almış olur. Zəbt olunmuş ərazilərdə qızıl mədənlərindən tutmuş, mişar daşı yataqlarına qədər böyük ehtiyatlar var. Siyahıya ötəri nəzər salmaq kifayətdir.
Məsələn, Ağdərə rayonu ərazisində qızıl (Qızılbulaq yatağı), qurğuşun (Mehmana), mis, sink (Dəmirli, Canyataq-Gülyataq), Kəlbəcərdə qızıl (Zod, Ağduzdağ, Tutxum yataqları), civə (Ağyataq, Levçay, Şorbulaq, Ağqaya), Laçında civə (Çilkəz yatağı), Zəngilanda qızıl (Vejnəli) yatağı. Hələ bunlar siyahının bir qismidir. Təsəvvür edin, Ermənistan beynəlxalq hüquqa tüpürərək Azərbaycanın işğal olunmuş ərazilərindəki sərvətləri talamaqla yanaşı, həyasızcasına özünə “mədən-sənayesinə malik ölkə” statusunda beynəlxalq don geyindirmək istəyir. Lakin bir sıra hallarda işğalçı dövlətin cavabı verilir.
Necə ki, sonuncu dəfə İsveçrənin paytaxtı Bern şəhərində Mədən Sənayesində Şəffaflıq Təşəbbüsü Təşkilatının İdarə Heyətində Ermənistanın təşkilata üzvlük üçün etdiyi müraciətə sərt cavab verilib. Bu barədə “Yeni Müsavat”a qurumun İdarə Heyətinin üzvü, iqtisadçı-alim Qubad İbadoğlu geniş məlumat verdi. Onun sözlərinə görə, işğalçı ölkənin Kəlbəcərdə qızıl hasilatına görə bu təşkilata üzvlüyünün əleyhinə çıxış edib: “Ermənistan da bu təşkilata üzv olmaq istəyirdi və hazırda da cəhdlərini davam etdirir. Bilirsiniz ki, Ermənistanın "əsas mədən sənayesi Kəlbəcərdə və Qarabağın işğal olunmuş digər ərazilərindədir. Mən Berndə keçirilən İdarə Heyətində bununla bağlı etiraz çıxışı etdim. Dedim ki, Ermənistanın bu şərtlər daxilində təşəbbüsə qoşulmasının əleyhinəyik.
Bizim etirazlardan sonra bir beynəlxalq və mötəbər bir təşkilat Ermənistanla danışıqlara başladı və Ermənistanın qarşısında şərt qoydu ki, bu ölkə təşkilata üzv olacağı təqdirdə onun açıqladığı hesabatda işğal altında saxladığı Azərbaycan ərazisindən çıxartdığı mədən sənayesi məhsullarından əldə etdiyi gəlirlər öz əksini tapa bilməz. Əslində bununla beynəlxalq təşkilat olaraq, Mədən Sənayesində Şəffaflıq Təşəbbüsü Təşkilatı Azərbaycan ərazilərinin Ermənistan tərəfindən işğal etdiyini bir daha təsdiq etdi.
Eyni zamanda işğalçı dövlət qarşısında çox ciddi bir şərt qoydu ki, Ermənistan mövcud şərtlər daxilində həmin quruma üzv ola bilməz. Hər halda bizim bu istiqamətdəki cəhdlərimiz nəticə verdi. Beynəlxalq katiblik dəstək verdi, bizim mövqeyimizi dəyərləndirib bəyanatla çıxış etdi və Ermənistan hökuməti qarşısında şərt qoydu. Beləliklə, ən azı mötəbər bir təşkilat Ermənistanın işğalçı mövqeyinin özünün bəyanatı ilə təsdiqlədi və Ermənistan qarşısında belə bir şərtlə çıxış etdi".
Q.İbadoğlunun dediyinə görə, Ermənistan işğal olunmuş ərazilərdəki mədən sənayesindən əldə etdiyi gəlirləri gizlətməklə, yəni Mədən Sənayesində Şəffaflıq Təşəbbüsü Təşkilatına təqdim etdiyi hesabata təqdim etməməklə də bu qurumda təmsil oluna bilməz: “Beynəlxalq təşkilatın qaydalarına görə, Ermənistanın fəaliyyəti auditor şirkətləri, müstəqil administratorlar tərəfindən yoxlamadan keçiriləcək. İlk növbədə bu ölkənin birinci hesabatı dəyərləndiriləcək. Əgər o hesabatda işğal altındakı ərazilərlə bağlı məlumatlar aşkar olunarsa, o halda Ermənistan avtomatik olaraq təşkilatın üzvlüyündən xaric olunacaq. Yəni Ermənistan Kəlbəcərdəki qızıl, yaxud Ağdərədəki mis mədənindən əldə etdiyi gəlirlərlə bağlı faktları özünün hesabatlarına daxil edə bilməz. Həmin ərazilər Azərbaycanın ərazisidir və həmin beynəlxalq təşkilat da bu bölgəni Azərbaycan ərazisi kimi tanıdığına görə İrəvan qarşısında şərt qoyur ki, siz işğalçılıq siyasəti nəticəsində bu torpaqlardan əldə etdiyiniz gəlirləri hesabata təqdim edə bilməzsiniz. Çünki Azərbaycana məxsus təbii sərvətlərin Ermənistan tərəfindən istismarı yolverilməzdir. Məsələ burasındadır ki, hələ Ermənistanın təşkilata üzvlüyü məsələsi həll olunmayıb. Üzv olacağı təqdirdə belə, əgər işğalçı ölkə üzərinə götürdüyü öhdəlikləri yerinə yetirməzsə, - bunu da müstəqil auditor da çox asanlıqla aşkara çıxara biləcək, - o halda Ermənistan avtomatik olaraq təşkilatın üzvlüyündən xaric olunacaq”.
İqtisadçı-alim deyir ki, Ermənistan yalnız öz ərazisi çərçivəsində hesabatlar açıqlaya bilər, amma öz ərazisindəki təbii sərvətləri o qədər də geniş deyil: "Bu da sual yaradır ki, Ermənistan hansı təbii sərvətlərlə Mədən Sənayesində Şəffaflıq Təşəbbüsü Təşkilatına üz tutur? Əslində Ermənistan güvənirdi ki, Azərbaycanın işğal altında saxladığı ərazilərindəki sərvətlərin istismarı ilə bağlı məlumatları öz hesabatına daxil etməklə Ermənistanın da dağ-mədən sənayesinə malik olan ölkələrdən biri olduğunu və onun da müəyyən sərvətlərdən gəlirlər əldə etdiyini iddia edə biləcək. Ancaq sirr deyil ki, Ermənistan bu sahədəki gəlirlərin böyük hissəsini Azərbaycanın işğal etdiyi ərazilərdən, qızıl, mis mədənlərindən əldə edir". Q.İbadoğlu onu da qeyd etdi ki, indiki şəraitdə Ermənistanın bu təşkilata üzv qəbul edilməsi sual altındadır.
Azərbaycanlı alim məsələnin hər zaman onun diqqətində olduğunu və işğalçı ölkənin cəhdlərinin qarşısını daima almağa çalışacağını söylədi: “Mən çalışıram ki, Mədən Sənayesində Şəffaflıq Təşəbbüsü Təşkilatı Beynəlxalq İdarə Heyətində daimi olaraq Azərbaycanın maraqlarını müdafiə edim. İlk növbədə məqsəd ondan ibarətdir ki, Ermənistanı ora buraxmayaq. Həqiqətən də Ermənistanın təbii sərvətlərlə zəngin ölkələr siyahısına daxil etmək mümkün deyil. Həmin təşəbbüs də təbii sərvətlərlə zəngin olan ölkələrin cəlb olunduğu təşəbbüsdür. İkinci bir tərəfdən, Ermənistan ora daxil olacağı təqdirdə də yalnız özünün indiki sərhədləri çərçivəsində əldə etdiyi gəlirləri açıqlaya bilər”.
Q.İbadoğlu işğalçı ölkənin Beynəlxalq Məhkəməyə veriləməsini də zəruri sayır: “Əvvəla, hesab edirəm ki, Azərbaycan tərəfi olaraq bu istiqamətdə beynəlxalq mətbuatda analitik yazılar dərc edilməlidir ki, sonradan məhkəmə qərarları üçün istinad imkanları yaransın. İkincisi, fərdi olaraq vətəndaşlar və özəl təşkilatlar adından beynəlxalq hüquq çərçivəsində məhkəmə iddiaları qaldırılmalıdırlar. Vətəndaşlar mülkiyyət hüquqlarının qorunması üçün Avropa İnsan Haqları Məhkəməsinə, özəl şirkətlər isə Avropa İttifaqı və BMT-nin arbitraj məhkəmələrinə müraciət etməlidirlər. Bu istiqamətdə dövlətin əsas işi vəkil və hüquqi dəstək göstərmək olmalıdır. Şəxsən mən ABŞ-da keçirdiyim görüşlərdə və iştirak etdiyim beynəlxalq təbdirlərdə Qarabağ mövzusunu həmişə gündəmdə saxlayıram”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər