Azərbaycan öz müstəqilliyini yenidən itirə bilərdi... |
Müəllif: Admin | Bölmə: Xəbərlər | Vaxt: 10-11-2015, 21:54 | Şərh sayı: (0) | Baxılıb: 268
Azərbaycan öz müstəqilliyini yenidən itirə bilərdi...
"Azərbaycana qarşı xaricdən vaxtaşırı təzyiqlər artır, ölkənin daxili siyasi kursunun formalaşmasını nəzarət altına almaq istəyən müəyyən dairələr ortaya çıxır, Azərbaycanın addımlarını öz ölçülərinə uyğunlaşdırmaq istəyi yaranır. Əlbəttə ki, Azərbaycan bütün bunlara qarşı öz etirazını bildirir və dəfələrlə kimlərinsə diktəsi ilə müstəqil dövlət qurmaq istəmədiyini bəyan edib. Əgər Azərbaycan onların diktəsi ilə hərəkət etsəydi, çoxdan burada da vəziyyət qonşu ölkələrdəki kimi olacaqdı və Azərbaycan öz müstəqilliyini yenidən itirmək təhlükəsi ilə üzləşə bilərdi. Ona görə Prezident İlham Əliyevin Azərbaycanı stabillik adasına bənzətməsi, ilk növbədə, bütün bunların müstəqil siyasət yeritmək kursundan irəli gəldiyini vurğulaması idi".
Bunu Milli.Az-a açıqlamasında Milli Məclisin üzvü, YAP İcra Katibliyinin Siyasi təhlil və proqnozlaşdırma şöbəsinin müdiri Aydın Mirzəzadə Prezident İlham Əliyevin noyabrın 9-da Azərbaycan Milli Elmlər Akademiyasının (AMEA) 70 illik yubileyinə həsr olunmuş ümumi yığıncaqdakı çıxışında səsləndirdiyi Azərbaycandakı stabilliklə bağlı fikirlərə münasibət bildirərkən deyib.
YAP funksionerinin sözlərinə görə, Azərbaycan bundan sonra da müstəqil siyasət yeritməkdə davam edəcək: "Prezidentin çıxışı zamanı dövrün bir sıra məsələlərinə, o cümlədən dünyada baş verən böhran, Azərbaycanın yerləşdiyi bölgədə qeyri-stabilliyin mövcudluğu və s. məsələlərə toxunuldu. Dövlət başçısı qonşu ölkələrdən fərqli olaraq Azərbaycanda stabilliyin mövcud olduğunu və bunun əsasını Azərbaycanın öz problemlərini məhz özünün həll etdiyini önə çəkdi. O bildirdi ki, xaricdən olan təzyiqlərə baxmayaraq, Azərbaycan daxili və xarici siyasətini özü müəyyənləşdirir, əhalisinin sosial vəziyyətinin yaxşılaşdırılmasını özü üçün prioritet hesab edir və bu məsələlərdə müstəqil siyasət öz nəticəsini verir. Əlbəttə ki, Ermənistan Azərbaycan torpaqlarını işğal etməsəydi, ölkəmizin uğurları daha çox ola bilərdi və Azərbaycan da böyük bir ordu saxlamağa məcbur olmazdı. Bununla belə Azərbaycan bundan sonra öz müstəqil siyasətini yeritmək əzmindədir.
Millət vəkilinin fikrincə, prezidentin Azərbaycanın inkişaf yolu barəsində dediyi fikirlər, ölkəmizin dünyadakı problemlərin həllinə dair mövqeyi, eyni zamanda alimlərin dünya problemlərinin həllində rolu ilə bağlı söylədiyi fikirlər çox önəm daşıyır: "Dövlət başçısının böyük elmi auditoriya qarşısında çox ciddi məsələlər barəsində fikir bildirməsi dövlətlə elm arasında böyük bir körpünün mövcudluğu, bu körpünün güclənməsində dövlətin maraqlı olduğunu göstərdi. Eyni zamanda, prezident özünün elmə böyük diqqətini ortaya qoydu. Hesab edirəm ki, bu məsələlər Azərbaycanda elmin inkişafına böyük dəstək olacaq".
Qeyd edək ki, Prezident İlham Əliyev noyabrın 9-da AMEA-nın 70 illik yubileyinə həsr olunmuş ümumi yığıncaqdakı çıxışında deyib: "Azərbaycan artıq neçə ildir ki, müstəqil siyasət apararaq həm siyasi, həm iqtisadi sahələrdə, beynəlxalq münasibətlər sahəsində müstəqil fəaliyyət göstərir. Bizim fəaliyyətimiz xalqın milli maraqları üzərində qurulubdur. Bu, bizim üçün əsas şərtdir, əsas vəzifədir və bütün səylərimiz bu məqsədə xidmət göstərir.
Əlbəttə, biz də dünyada, bölgədə gedən prosesləri izləyərək çalışmalıyıq ki, ölkəmiz üçün riskləri nə qədər mümkünsə minimum səviyyəsinə endirək və buna nail ola bilirik. Bu gün alovlanan bölgədə Azərbaycan sabitlik adasıdır, sülh, əmin-amanlıq məkanıdır. Azərbaycan vətəndaşları əmin-amanlıq şəraitində yaşayırlar, yaradırlar. Əminəm ki, görülən və görüləcək tədbirlər nəticəsində bu müsbət dinamika, müsbət ab-hava Azərbaycanda daha da güclənəcək".
İlkin İzzət
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər