AŞ PA-ya yeni prezident seçildi |
Müəllif: Admin | Bölmə: Xəbərlər | Vaxt: 26-01-2016, 22:43 | Şərh sayı: (0) | Baxılıb: 190
AŞ PA-ya yeni prezident seçildi
Qurumun Azərbaycan üzrə keçmiş həmməruzəçisi beynəlxalq təşkilatın rəhbərliyinə gətirildiYanvarın 25-də Strasburqda Avropa Şurası Parlament Assambleyasının (AŞ PA) qış sessiyası qurumun baş katibinin əvəzlənməsi ilə öz işinə başlayıb. Sessiya iştirakçıları AŞ PA pezidenti Ann Brosserin yerinə Pedro Aqramuntu seçiblər.
Bu barədə “Yeni Müsavat”a sessiyada iştirak edən Müsavat Partiyasının Məclis üzvü, vicdan məhbusu Tofiq Yaqublunun qızı Nigar Yaqublu məlumat verib. Onun sözlərinə görə, yeni prezident seçkilərdən sonrakı çıxışında Avropadakı ixtilaflardan, Fransa və Türkiyədəki terror hadisələrindən danışıb.
Qeyd edək ki, ispaniyalı deputat, Avropa Xalq Partiyası qrupunun üzvü Pedro Aqramunt ötən ilə qədər AŞ PA Monitorinq Komitəsinin Azərbaycan üzrə həmməruzəçisi olmuşdu və 5 il bu statusda çalışmışdı. Bu mənada AŞ PA-nın yeni prezidenti üçün Azərbaycan tanış ölkələrdən olacaq. Assambleya sədri vəzifəsinə namizədlər qurumdakı siyasi fraksiyalar tərəfindən irəli sürülür.
Siyasi qruplar arasında razılaşdırılmış rotasiya prinsipinə dair “centlmen sövdələşməsi”nə əsasən bu dəfə növbə Pedro Aqramuntun rəhbərlik etdiyi Avropa Xalq Partiyası Qrupunun idi. Onun bu vəzifəyə namizədliyi ötən il öz qrupu tərəfindən irəli sürülüb. (apa)
İspaniyanın Valensiya bölgəsindən deputat seçilmiş senator Pedro Aqramunt 2000-ci ildən etibarən AŞ PA-da təmsil olunur. O, bu illər ərzində müxtəlif vaxtlarda assambleya daxilində komitə sədri vəzifələrində çalışıb, bir çox hesabatlar hazırlayıb və eyni zamanda uzun illər Azərbaycan üzrə həmməruzəçi vəzifəsində çalışıb. P.Aqramunt AŞ PA-da fəal parlamentarlardan hesab olunur. P. Aqramunt bu vəzifədə mandatı 2017-ci ildə bir dəfə yenilənməklə, 2018-ci ilin yanvar ayına qədər fəaliyyət göstərəcək.
“Avropanı təkəbbürlü olmamağa və qərbsayağı demokratiyanı zorla ölkələrə diktə etməməyə çağırıram”- AŞ PA-nın yeni prezidenti Pedro Aqramunt bəyan edib. Daha sonra o bildirib: “Biz belə hallardan çəkinməliyik. Hər ölkənin öz tarixi və inkişaf yolu olduğundan, qərbsayağı demokratiya modelini hansısa ölkəyə zorla tətbiq etdirməməliyik. Bu, təkəbbürlüyün göstəricisidir və çox təhlükəlidir. Çünki biz bu cür siyasətimizlə bir çox ölkələri özümüzdən uzaqlaşdıra bilərik”.
AŞ PA-nın qış sessiyasının ilk plenar iclasında qurumun yeni sədri P.Aqramunt bu vəzifədə görəcəyi işlərdən, assambleyanın prioritetlərindən, Avropada və dünyada baş verən əsas hadisələrdən, mövcud problemlərin həllindən danışıb. APA-nın Avropa bürosunun xəbərinə görə, AŞ PA sədri Avropa Şurasına üzv ölkələrdə həll edilməmiş münaqişələrin vəziyyətinə də toxunub: “Bizim təşkilatımız daxilində bir neçə ölkədə münaqişələr hələ də həll edilməyib. ”Dondurulmuş" adlandırdığımız münaqişələr mövcuddur. Gürcüstanda Cənubi Osetiya və Abxaziya, Moldovada Dnestryanı bölgədəki münaqişə, eyni zamanda Azərbaycanın Dağlıq Qarabağ münaqişəsi hələ də öz həllini tapmayıb. Bu münaqişələrin həll edilməməsi ümumilikdə Avropanın təhlükəsizliyi üçün təhdid təşkil edir".
APA-nın Avropa müxbirinin məlumatına görə, Aqramunt demokratikləşmə ilə bağlı da mesajlar verib.
Yeri gəlmişkən, Azərbaycan parlamentinin nümayəndə heyətinin qatıldığı sessiyada ölkəmizin hüquq müdafiəçilərindən heç kim təmsil olunmur. N.Yaqublu bildirdi ki, hələlik qış sessiyasının gündəliyində Azərbaycandakı məhbuslar, demokratiya və s. məsələlərin salınıb-salınmayacağı tam dəqiq deyil.
26 yanvarda isə Azərbaycanın milli maraqlarına xidmət edən iki hesabat müzakirə ediləcək. Belə ki, Robert Uolterin (Britaniya) “Dağlıq Qabağda və Azərbaycanın işğal altında olan başqa ərazilərində gərginlik”, Bosniya və Herseqovinadan olan deputat Militsa Markoviçin “Azərbaycanın sərhədyanı regionlarının əhalisi qəsdən içməli sudan məhrum edilirlər” hesabatları müzakirəyə çıxarılacaq. Kəlbəcər girovları Dilqəm Əsgərov və Şahbaz Quliyevin azad olunması barədə sənədin də müzakirə olunacağı gözlənilir. Məlumata görə, AŞ PA-da Avropada mühacir problemi, Suriya və İraqdakı əcnəbi silahlılar, Avropa Şurasına üzv ölkələrdə insan haqlarının müdafiəsinin möhkəmlənməsi məsələləri də müzakirə mövzusu olacaq. Həmçinin Avropa İnsan Haqları Məhkəməsinin hakimləri də seçiləcək.
YAP-ın icra katibinin müavini, deputat Siyavuş Novruzov Strasburq müzakirələri barədə “Yeni Müsavat”a danışarkən bidlirdi ki, Azərbaycanla bağlı 26 yanvar müzakirələrinə böyük önəm verir. Söhbət Azərbaycan ərazilərinin işğalı və Sərsəng su anbarının erməni işğalçılarının nəzarəti altında olması ilə bağlı qətnamə layihələrindən gedir.
S.Novruzov sessiyada Azərbaycandakı insan hüquqları, siyasi məhbuslar və digər məsələlərlə bağlı müzakirələrin olub-olmayacağı barədə suala cavabında belə dedi: “Güman etmirəm ki, bununla bağlı hansısa sənəd qəbul olunsun. Biz dəfələrlə bu məsələlərlə bağlı bildirmişik ki, burada hər hansı siyasi məhbusdan söhbət gedə bilməz. Azərbaycanda ancaq bu və ya digər vəzifə səlahiyyətlərini aşma, vergidən yayınma və digər məsələlərlə bağlı məsuliyyətə cəlb olunanlar var. Bunu da istənilən orqan araşdıra bilər. Ancaq məhkəmə qərarı olmadan kiminsə dərhal azadlığa buraxılmasını tələb etmək qanuna hörmətsizlikdir. Ancaq erməni lobbisi çox ciddi canfəşanlıq edir. Çünki AŞ PA-da ardıcıl şəkildə bir neçə sənəd qəbul olundu, Azərbaycandakı seçkilərin nəticələri və işğal olunmuş ərazilərimizlə bağlı. Yenə də iki sənədin qəbulu gözlənilir. Ona görə də ermənilər onlara yaxın olan deputatlar vasitəsilə bu kartdan istifadə etməyə çalışırlar”.
AŞ PA-nın yeni prezidentinə münasibətə və gözləntilərə gəldikdə, S.Novruzov bildirdi ki, qurumdakı müxtəlif siyasi qrupların fəaliyyətindən çox şey asılıdır: “Müxtəlif qruplar var ki, erməni lobbisinin təsiri altındadır. Onlar ədalətə yox, erməni lobbisinin ayırdığı vəsaitə xidmət edirlər. İndi yeni prezident işləyər, baxarıq”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər