Azərbaycana qarşı çirkin kampaniyanın davamı |
Müəllif: Admin | Bölmə: Xəbərlər | Vaxt: 9-10-2015, 23:22 | Şərh sayı: (0) | Baxılıb: 335
Azərbaycana qarşı çirkin kampaniyanın davamı
Avropa Şurasının (AŞ) baş katibi Torbyorn Yaqland oktyabrın 7-də öz nümayəndəsini Nazirlər Komitəsinin Azərbaycanda İnsan Hüquqları üzrə Birgə İşçi Qrupundan (BİQ) geri çağırmaq barədə qərar qəbul edib. Bu barədə AŞ baş katibinin mətbuat katibi bəyanat verib. Bəyanatda qeyd olunub ki, 2014-cü ilin oktyabrından Avropa Şurasının nümayəndəsi Bakıda vətəndaş cəmiyyəti və hakimiyyət arasında dialoqun bərpasına yönəlmiş görüşlərdə iştirak edib. Eyni zamanda bildirilib ki, 2014-cü ildə Azərbaycandan bir qrup şəxs AŞ-nin baş katibi T.Yaqlanda, AŞ Parlament Aassambleyasının (PA) rəhbəri Ann Brasserə və təşkilata üzv dövlətlərə Azərbaycanda insan hüquqları sahəsində vəziyyətin pisləşməsi ilə əlaqədar qətiyyətli tədbirlər görmək çağırışı ilə müraciət edib. Görünən budur ki, AŞ-nin baş katibi hərtərəfli araşdırma aparmadan, BİQ-də təmsil olunan hüquq müdafiəçilərinin də fikrini öyrənmədən, məqsədli şəkildə yalnız sözügedən müraciətə əsaslanaraq öz nümayəndəsini geri çağırmaq qərarına gəlib. Maraqlı məqamlardan biri də budur ki, Azərbaycanda bəzi media qurumları, xüsusən də xarici dairələrdən qidalanan bəzi xəbər saytları bu hadisəni sensasiya kimi qələmə verib, AŞ-nin Azərbaycanla əməkdaşlığı dayandırması barədə yanlış təsəvvür yaratmağa çalışıblar. Əsl gerçəklikdə isə AŞ Azərbaycanla əməkdaşlığına heç bir halda son qoymayıb, söhbət yalnız BİQ-in iclaslarında dinləyici kimi iştirak edən bir nəfərin bundan sonra qurumun tədbirlərinə qatılmamasından gedir.
Mövzu ilə bağlı fikirlərini "Kaspi"yə bölüşən hüquq müdafiəçisi, Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə deyib ki, AŞ baş katibinin son qərarına BİQ-də təmsil olunan hüquq müdafiəçiləri artıq öz etirazlarını bildiriblər. Onun sözlərinə görə, BİQ-in dünən keçirilən toplantısında bu məsələyə yenidən toxunulub və hər kəs öz münasibətini açıqlayıb. Millət vəkili qeyd edib ki, BİQ-in yaradılmasını vaxtilə Azərbaycan Prezidenti İlham Əliyevdən T.Yaqland xahiş edib. Ölkə başçısı da baş katibin bu xahişinə hörmət əlaməti olaraq, BİQ-in yaradılması üçün müvafiq tapşırıqlar verib, qısa zaman ərzində İşçi Qrupu fəaliyyətə başlayıb: "Bəzi şəxslər elə fikirləşirlər ki, BİQ zərurət oldu-olmadı hər ay toplanmalı, iclas keçirməli, hansısa qərar qəbul etməli, müəyyən məsələləri müzakirə etməli, müraciət və bəyanatlar yaymalıdır. Halbuki biz toplaşmadan da hökumətlə əməkdaşlığımızı davam etdirirdik. Bir sıra məsələləri araşdırıb həmsədrlərə, Əfv Komissiyasına göndərir, eyni zamanda, bizə edilən fərdi müraciətləri araşdırır, lazımi ünvanlara yollayırdıq. Bu günlərdə 9 hüquq müdafiəçisi ilə birlikdə Ali Məhkəmə sədrinə də müraciət etmişik və müraciətimizdə bəzi şəxslərin işinin nəzarətə götürülməsini, onların işinin ədalətli həll olunmasını istəmişik. Yəni bu qaydada bizim fəaliyyətimiz, əməkdaşlığımız davam etməkdədir. BİQ 3-5 nəfər həbsdə olan adamdan ötrü yaranmayıb ki, yalnız onlar barədə qərar çıxarsın, işləsin və sair. Azərbaycan cəmiyyətində kimin hansı hüququ pozulubsa, bununla bağlı BİQ-ə müraciət edə bilər. Bu, həmin şəxsin haqqıdır və kiməsə bu barədə məhdudiyyət qoyulmayıb. Biz özümüz də fərdi müraciətlərə üstünlük veririk".
Deputat deyib ki, AŞ-nin marağında olan 5-10 nəfər var ki, onların məsələsi yalnız əfvlə həllini tapa bilər. Bu isə Prezident İlham Əliyevin müstəsna hüququdur və əfv hər ay verilmir: "Bu günə qədər olan əfv fərman və sərəncamlarına nəzər yetirsək, bu kimi humanist addımlar il ərzində 1-2 dəfə olur. Biz ümid edirik ki, bir qrup şəxs cari ilin dekabr ayında azadlığa qovuşacaqlar. Onların əfv olunması üçün müzakirələr aparır, təkliflər veririk. Bütün görülən işlərə rəğmən, bu gün heç bir ciddi səbəb olmadan, müzakirə aparılmadan, tələm-tələsik BİQ-dən imtina edilməsi Azərbaycana qarşı çirkin kampaniyanın davamıdır. Çox təəssüf ki, Avropa Şurası da bu anti- Azərbaycan kampaniyasının tərkib hissəsinə çevrilir, təsir altında atılan addımlarla ölkəmiz əleyhinə qərəzli münasibət sərgilənir. Biz bunu qətiyyətlə pisləyir və hesab edirik ki, Avropa Şurasının nümayəndəsi BİQ-də olsa da, olmasa da, İşçi Qrupu fəaliyyətini bundan sonra da davam etdirəcək. Azərbaycan cəmiyyətində müzakirə predmeti olan şəxslərin azadlığa çıxmaq imkanları qanunən yol veriləndirsə, biz bundan sonra da bununla bağlı ölkə başçısına müraciət edəcək, həmin şəxslərin əfv olunmasını xahiş edəcəyik. Baş katib Yaqlandın qərarı həm də onu deməyə əsas verir ki, Avropa Şurası BİQ-in fəaliyyət göstərməsində əvvəlcədən maraqlı olmayıb, sadəcə, söz xətrinə belə bir təklif verib, təklif alınmayacağı təqdirdə isə bundan Azərbaycan əleyhinə istifadə etmək niyyəti güdüb. Ola bilsin ki, onlar heç gözləmirdilər ki, Prezident İlham Əliyev bu təklifə dərhal reaksiya verəcək, BİQ yaradılacaq. Görünür, baş katib və onun simasında Avropa Şurası vaxtilə belə bir təklif irəli sürdüklərindən peşman olub".
Parlament üzvü Bəxtiyar Əliyev baş katib T.Yaqlandın son qərarını yalnız onun Azərbaycana münasibəti kimi deyil, ümumilikdə ölkəmizə qarşı aparılan kampaniya kimi xarakterizə edib. Millət vəkilinin sözlərinə görə, Azərbaycan nümayəndə heyətinin AŞ-də uğurlu fəaliyyəti, ölkə həqiqətlərinin Avropanın mühüm qurumunda dəstəklənməsi Azərbaycana qarşı qarayaxma kampaniyası aparan siyasi dairələri hiddətləndirir. Bu səbəbdən də T.Yaqlanda ciddi təzyiq göstərilir ki, baş katib də təzyiqlərdən yaxa qurtarmaq üçün həmin siyasi sifarişləri yerinə yetirir: "Onlar Azərbaycanda insan haqları ilə bağlı heç bir ciddi problemin olmadığını yaxşı bilirlər. İşçi Qrupunun normal şəkildə fəaliyyət göstərdiyi də göz önündədir. Belə olan halda onlar sabah hesabat verərkən obyektiv məsələləri qeyd etmək məcburiyyətində qalacaqlar. Ona görə də süni surətdə problemlər yaratmaqla bu əməkdaşlığı dayandırmaq istəyiblər. Burada məqsəd tam aydındır. Sonradan Azərbaycanın bu işinə qara yaxmaq, qeyri-obyektiv mövqe bildirmək və sair. Bu səbəbdən də hesab edirəm ki, Azərbaycanın QHT və vətəndaş cəmiyyətinin nümayəndələri ölkəmizə qarşı bu qərəzli münasibətə etiraz bildirməlidirlər".
BİQ-də təmsil olunan hüquq müdafiəçisi Sahib Məmmədov isə mövzu ilə bağlı "Kaspi"yə açıqlama verərkən ilk növbədə bəzi media qurumlarında hadisə barədə yanlış məlumatların getməsinə toxunub. Bildirib ki, "Turan" İnformasiya Agentliyinin rəhbəri Mehman Əliyev bu barədə çaşdırıcı məlumat yaymaqla KİV haqqında Qanunu kobud şəkildə pozub, rəsmi məlumatı təhrif edərək öz məqsədinə uyğun şəkildə yayıb. S.Məmmədovun fikrincə, media rəhbərinin bu addımı həm də etik normaların pozulmasıdır: "Mehman Əliyev birinci dəfə deyil ki, bu tipli məlumatlar yayır. O, xarici ölkələrdən milyonlarla vəsait alıb və Azərbaycanda 5-6 media qurumu yaradaraq saxta məlumatları tirajlamaqla məşğul olur. Əsl həqiqətdə isə Avropa Şurasının baş katibi Nazirlər Komitəsində çıxış edərkən BİQ-in fəaliyyətinin səmərəli olmadığını söyləyib. Ona görə də öz nümayəndəsini BİQ-in iclaslarına göndərmək istəmədiyini vurğulayıb. Təəssüf ki, bəzi media qurumları da bu hadisəni "Avropa Şurası nümayəndəsini geri çağırdı", "Avropa Şurası Azərbaycanla əməkdaşlığı dayandırdı" - kimi təqdim ediblər".
Hüquq müdafiəçisi bildirib ki, Azərbaycanda BİQ 2005-ci ildə yaradılıb və orada heç bir beynəlxalq təşkilatın nümayəndəsi üzv deyil. Onun sözlərinə görə, BİQ yalnız milli formatdır və burada hakimiyyətin müxtəlif qolları təmsil olunub: "BİQ-in həmsədrləri Prezident Administrasiyasının, Milli Məclisin, Məhkəmənin nümayəndələridir. Eyni zamanda, BİQ-də yerli vətəndaş cəmiyyəti təmsilçiləri, 10 nəfərdən ibarət hüquq müdafiəçiləri təmsil olunurlar. Göründüyü kimi, BİQ-də nə beynəlxalq təşkilatların nümayəndəsi, nə də Avropa qurumlarının təmsilçiləri yer alıblar. Yalnız razılaşma əsasında, onların Azərbaycan hökumətindən xahişinə görə Avropa Şurası baş katibinin nümayəndəsi BİQ-in iclaslarında iştirak edir, müşahidə aparırdı. İndi isə baş katib deyir ki, bundan sonra öz nümayəndəmi BİQ-in iclaslarına göndərməyəcəm. Biz ilk növbədə bundan təəssüf hissi keçiririk. Ona görə ki, Avropa Şurası sıradan bir QHT deyil, Avropa məkanında ciddi qurumdur. Özünə hörmət edən ciddi qurum isə hər hansı ciddi səbəb olmadan, əldə etdiyi hansısa birtərəfli məlumat əsasında bu cür küskünlük nümayiş etdirməli deyil. Azərbaycan Avropa Şurasının üzvüdür, ölkəmiz Avropa Məhkəməsinin yurisdiksiyası altındadır. Ona görə də bu təşkilatın borcudur ki, Azərbaycanla əməkdaşlıq etsin. Digər tərəfdən, onsuz da Yaqlandın nümayəndəsi Azərbaycana gəlib-gedə bilmirdi. Bu səbəbdən həmin nümayəndə regionda səfərdə olan zaman bizdən xahiş edirdi ki, BİQ-in iclasını çağırın, mən də orada iştirak edim. Amma indi Yaqland bəyanat verir ki, nümayəndəmi göndərməyəcəm. Özü bilər. Bu, bizim işimizə hər hansı formada ciddi təsir etmir. Lakin Yaqland gələcəkdə yenidən öz nümayəndəsinin BİQ-in iclaslarına qatılmasını istəsə, gərək bunun üçün Azərbaycan hökumətindən icazə alsın".
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər