Erməni işğalına qarşı iki mühüm sənəd masa üzərində |
Müəllif: Admin | Bölmə: Xəbərlər | Vaxt: 19-01-2016, 16:14 | Şərh sayı: (0) | Baxılıb: 303
Erməni işğalına qarşı iki mühüm sənəd masa üzərində
Arzu Nağıyev: “Dağlıq Qarabağ münaqişəsinin həlli istiqamətində nüfuz savaşı başlayıb”; Elxan Şahinoğlu: “AŞ PA müstəvisində Azərbaycanın haqlı mövqeyini dəstəkləyən sənədlər xeyrimizədir”Avropa Şurası Parlament Assambleyasının (AŞ PA) gələn həftə keçiriləcək qış sessiyasında Azərbaycanın maraqlarına uyğun hazırlanmış iki mühüm sənədin müzakirəyə çıxarılması düşmən ölkədə ciddi narahatlıq doğurub. Ermənistan hakimiyyətinin və diaspor təşkilatlarının xətti ilə AŞ PA deputatlarının ələ alınmasından tutmuş, onlara təsir göstərilməsinə qədər ən müxtəlif səpkili planların işə salınması, Azərbaycana qarşı ermənipərəst çevrələrin qaralama kampaniyasını davam etdirməsi də bunu göstəricisidir.
Qeyd edək ki, AŞ PA “Azərbaycanın işğal altındakı Dağlıq Qarabağ və digər ərazilərindəki zorakılıqlar” və “Sərsəng su anbarı”nın ermənilər tərəfindən qanunsuz istismarı ilə bağlı sənədləri müzakirəyə çıxararaq qəbul etməyi planlaşdırır. Bundan əvvəl Sosial Məsələlər Komitəsinin Paris iclasında da ermənilərə zərbə sayılan sənəd qəbul olunmuşdu. Belə ki, “Azərbaycanın sərhədyanı bölgələrinin sakinlərinin qəsdən sudan məhrum edilməsi” adlı qətnamə layihəsinin səsvermə nəticəsində qəbulu erməniləri çətin vəziyyətə salmışdı. Beynəlxalq təşkilatın qətnamə layihəsində Ermənistan silahlı qüvvələrinin Sərsəng bölgəsindən dərhal geri çəkilməsi, Ermənistan hakimiyyətinin su ehtiyatlarından münaqişə tərəflərinin yalnız birinin xeyrinə siyasi təsir, yaxud təzyiq vasitəsi kimi istifadə etməsini dayandırmaq tələb edilir. Üstəlik, Parlament Assambleyası Ermənistan Parlament nümayəndə heyətinin və Ermənistan hakimiyyətinin bu məruzənin hazırlanmasında əməkdaşlıq etməməsini qəti pisləyib, bu rəftarı AŞ-nin tamhüquqlu üzvü olan bir ölkənin öhdəlik və vəzifələrinə zidd hesab edir və deputatların mandatı dövründə yarana biləcək buna bənzər hallarda görülə biləcək tədbirləri nəzərdən keçirəcəyini bildirib. Artıq hər iki sənəd ötən il qurumun müvafiq komitələrində (Siyasi və Sosial komitələrində) təsdiqlənib. Onların AŞ PA-da qətnamə şəklini alması Azərbaycanın haqlı mövqeyinin dünyada növbəti mötəbər təşkilat tərəfindən təsdiqi demək olacaq. Bundan əvvəl Avropa Parlamenti də Azərbaycan ərazilərinin dərhal işğaldan azad olunması tələbi ilə qətnamə qəbul etmişdi.
ABŞ-ın dövlət katibi Con Kerrinin “dondurulmuş münaqişələr həll edilməlidir” bəyanatından və Almaniyanın ATƏT-də sədrliyə başlamasından sonraya təsadüf edən bu müzakirələrdən nələr gözləyə bilərik?
Politoloq Arzu Nağıyev qeyd etdi ki, AŞ PA-nın bu sessiyasında əsas məsələ Robert Volterin hazırladığı məruzə ilə bağlıdır: “Keçən ilin noyabrında qəbul edilmiş qərara əsasən, eyni zamanda Sərsəng su anbarı ilə bağlı Azərbaycan tərəfinin hazırladığı layihəyə də baxılmalıdır. Ermənilər işğal məsələsi ilə bağlı bu hər iki layihənin əleyhinə oldular. Lakin fakt faktlığında qalır. Təbii ki, burada ATƏT-in Minsk Qrupunun da fəasliyyətsizliyi özünü göstərdi. Almaniya ATƏT-in sədrliyinə başlayıb və bu artıq Fransadan sonra Avropa məkanında öz sözünü deyə bilən bir dövlətdir və düşünürəm ki, Azərbaycanla insan hüquqları ilə bağlı yaranmış məqam həllini taparsa, bizim üçün böyük bir şans yaranar”.
A.Nağıyev qeyd etdi ki, Sərsəng su anbarı ilə bağlı məsələ də bizim üçün önəmlidir: “Çünki su anbarı işğal olunmuş əraziyə düşür və bu inkar olunmaz faktdır. Bir daha qeyd etmək istəyirəm ki, Dağlıq Qarabağ münaqişəsinin həlli istiqamətində nüfuz savaşı başlayıb. Bir tərəfdən bu, bizim üçün müsbət bir hal kimi qiymətləndirilməlidir. Təəssüf hissi ilə qeyd edilməlidir ki, ATƏT-in Minsk Qrupunun həmsədrləri ötən illər ərzində ancaq deklorativ bəyanatlar verməklə kifayətləndilər və münaqişənin həllində mühüm addımlar atılmadı, hətta əksinə, vəziyyət daha da gərginləşdi. Buna əlbəttə ki, regionda özünü göstərən amillər də təsir göstərdi. Bundan da ermənilər öz xeyrinə istifadə etdilər və status-kvonun saxlanmasına, öz siyasi ambisiyalarına uyğun olaraq beynəlxalq hüquq normalarına hörmətsizliklə yanaşaraq addımlar atdılar”.
Politoloq hesab edir ki, bu gün ABŞ-ın dövlət katibi Con Kerrinin bəyanatından, Almaniyanın ATƏT-dəki sədrliyindəni maksimum yararlanmaq lazımdır: “ABŞ və Rusiyanın regionda və Dağlıq Qarabağ münaqişəsinin həlli istiqamətində apardığı nüfuz davasını nəzərə alıb və bundan istifadə edib ATƏT-in atacağı addımlara təsir göstərmək lazımdır. O halda bu yolla prosesləri müsbət məcraya yönəltmək olar. Təbii ki, bunlarla yanaşı, Türkiyə-Rusiya münasibətlərinin gərginliyi və hər iki dövlətin münaqişənin həllində öz baxışları olduğunu da nəzərdən qaçırmaq olmaz. Bütün bu deyilənləri nəzərə alsaq, zənnimcə, müəyyən irəliləyişə nail olmaq olar, lakin əsas məsələ ərazi bütövlüyü kontekstində güc nümayiş etdirməklə təcavüzkarı sülh masasına əyləşdirməkdən ibarət olmalıdır”.
“Atlas” Araşdırmalar Mərkəzinin rəhbəri, politoloq Elxan Şahinoğlu isə “Yeni Müsavat”a dedi ki, AŞ PA-da müzakirə olunacaq hər iki sənəd Azərbaycan üçün çox mühüm əhəmiyyət kəsb edir: “Qətnamə layihələrinin ikisi də Azərbaycanın torpaq bütövlüyü ilə bağlıdır. Bu sənədlər qəbul olunsa, beynəlxalq aləmin Azərbaycanın ərazi bütövlüyünə dəstəyi bir daha ifadə olunacaq. Məsələn, Sərsəng su anbarından istifadə etmək üçün ərazilər işğaldan azad olunmalıdır və bu da sənəddə vurğulanıb. Üstəgəl, keçən il Avropa İnsan Haqları Məhkəməsi də Laçından olan Çıraqovlarla bağlı mühüm qərar qəbul edib. Bu qərarla beynəlxalq aləm azərbaycanlıların işğal altındakı torpaqlara maneəsiz qayıtması hüququnu bir daha tanıyıb”.
Lakin E.Şahinoğlu əlavə etdi ki, bütün bunlara baxmayaraq, bu kimi sənədlərin Dağlıq Qarabağ münaqişəsinin həllini sürətləndirməməsi təəssüf doğurur: “Əgər Ermənistan BMT-nin 4 qətnaməsini yerinə yetirmirsə, aydındır ki, AŞ PA-nın qətnamələrini də qulaqardına vuracaq. Hər halda, beynəlxalq aləmdə, o cümlədən AŞ PA müstəvisində Azərbaycanın haqlı mövqeyini dəstəkləyən sənədlər xeyrimizədir. Gələcəkdə torpaqlarımızı güc yolu ilə azad etməyə başlasaq, bu sənədlər bizim heç bir beynəlxalq hüququ pozmadığımızı ortaya qoyacaq”.
XİN-in mətbuat katibi Hikmət Hacıyev gözlənilən müzakirələrlə bağlı “Yeni Müsavat”a bunları bildirdi: “Azərbaycan Respublikası Ermənistan-Azərbaycan münaqişəsinin beynəlxalq hüququn prinsiplərinə uyğun olaraq həlli istiqamətində digər beynəlxalq təşkilatların, o cümlədən də AŞ PA-nın töhfəsini təqdirəlayiq hesab edir. Azərbaycan münaqişə ilə əlaqədar olan məsələləri üzv olduğu bütün beynəlxalq təşkilatlarda və digər beynəlxalq platformalarda ardıcıl surətdə qaldırır və bu fəaliyyət 2016-cı il ərzində davam edəcək”. Erməni tərəfinin qətnamələrin qəbuluna maneçilik cəhdlərinə gəldikdə, XİN sözçüsü prosesləri qabaqlamağa ehtiyac duymadığını vurğuladı: “AŞ PA-da üzv dövlətlərin deputatları təmsil olunur və onların fəaliyyəti haqqında şərh verməyimiz düzgün olmazdı”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər