Rusiya forpost Ermənistanın arxasından çəkilir? |
Müəllif: Admin | Bölmə: Xəbərlər | Vaxt: 23-01-2016, 19:19 | Şərh sayı: (0) | Baxılıb: 141
Rusiya forpost Ermənistanın arxasından çəkilir?
Ağır iqtisadi duruma görə Kreml müttəfiqinə vəd etdiyi güzəştli kreditləri verməyə bilər; onların arasında silah-sursat almaq üçün ayrılan 200 milyon dollarlıq vəsait də var; işğalçı ölkə isə ərazilərimizin süni məskunlaşmasını davam etdirir... İşğalçı Ermənistan gözlənildiyi kimi, əsas siyasi-hərbi dayağı və iqtisadi sponsoru Rusiyada yaşanan ağır sosial-iqtisadi problemlərin altını ən ciddi şəkildə çəkməyə başlayıb. Düşmən ölkədən gələn son xəbərlər buna şübhə yeri saxlamır.
Söhbət təkcə Rusiyadan Ermənistana pul transfertlərin həcminin yarıbayarı azalmasından və erməni əmək miqrantlarının durumunun pisləşməsindən getmir. Məsələ ondadır ki, Rusiya günbəgün ağırlaşan iqtisadi vəziyyət üzündən Ermənistan qarşısında öz kredit öhdəliklərini də yerinə yetirmək problemi ilə üzləşib. Musavat.com-un məlumatına görə, bu barədə erməni iqtisadçı-eksperti Aşot Yegizaryan bildirib. Onun sözlərinə görə, problem o dərəcədə dərinə işləyib ki, ölkə vəd elədiyi kreditləri verə bilməyəcək.
Bundan öncə Ermənistanın maliyyə nazirinin müavini Pavel Safaryan Rusiyada indiki tendensiyasının qalacağı təqdirdə kredit öhdəliklərinin yerinə yetirilməsi üçün risklərin yaranacağını istisna etməmişdi.
Erməni ekspertə görə, Moskvanın günün birinə kredit vermək qabiliyyətində olmayacağı ehtimalı həmişə olub. “Bundan əlavə, Rusiya rəsmən bəyan edib ki, mövcud sosial-iqtisadi situasiyanı nəzərə alaraq, öz üzərinə yeni kredit öhdəlikləri götürməyəcək, əvvəlki razılaşmalara isə əməl eləmək niyyətindədir. Ermənistanın kreditləri hansına aid ediləcək - bilinmir”, - deyə o qeyd edib.
Lakin o, Kremlin əvvəlki anlaşmalara da riayət edəcəyinə şübhə ilə yanaşır. “Doğrudur, bu, ölkənin imic məsələsidir, ancaq situasiya elədir ki, Rusiya öhdəlikləri yerinə yetirə bilməyəcək. Odur ki, elə bir əsas yoxdur iddia edək ki, Rusiya Ermənistana maliyyə yardımı edəcək. Əgər bir il öncə kimsə buna inanırdısa, indi belələri qalmayıb” - əlavə edib erməni ekspert.
***
Xatırladaq ki, Rusiyanın Ermənistana boyun olduğu son kreditlər arasında müasir silah-sursat almaq üçün nəzərdə tutulan 200 milyon dollarlıq kredit də var. Erməni tərəfi çox ümid edirdi ki, bu kredit hesabına elə Rusiyanın özündən ucuz qiymətə alacağı silah və hərbi texnika hesabına Azərbaycanla hərbi balansı qismən öz xeyrinə dəyişə biləcək.
Göründüyü kimi, öz hayında olan Rusiya indi heç kredit vermək qabiliyyətində də deyil. Çünki öz büdcəsi ciddi çətinliklərlə üzləşib və bu çətinlikləri dünya qiymətinə silah satışı sayəsində də aradan qaldırmaq mümkün deyil, o ki ola, güzəştli qiymətlərlə satılacaq, həm də özünün ayıracağı kreditlər hesabına satılacaq silahlar hesabına.
Lakin bu, əsla o anlama gəlmir ki, Rusiya forpost Ermənistanın arxasından çəkilir, yaxud ondan imtina edir. Sözsüz ki, yox. Ermənistan şimal qonşumuzun regionda əsas hərbi qalasıdır və Moskva sonadək ondan imtina etməyəcək. Sadəcə olaraq, Rusiyanın beynəlxalq sanksiyalar üzündən (yeri gəlmişkən, Ermənistan kimi işğalçılıq siyasətinə görə) üzləşdiyi iqtisadi-maliyyə çətinlikləri düşmən və işğalçı ölkə də bölüşmək zorundadır.
Çünki könüllü şəkildə özünün siyasi, iqtisadi taleyini ona bağlayıb, öz təhlükəsizliyini, o sırada sərhədlərinin mühafizəsini ona həvalə edib. Bu da o anlama gəlir ki, ermənilər ruslarla diktə-tələb yox, yalnız xahiş dilində danışa bilərlər və Kremlin istənilən kaprizinə, yalan vədlərinə və bütün bunlardan qaynaqlanan iqtisadi məhdudiyyətlərə dözüm göstərməlidirlər.
***
Ancaq nə qədər qəribə də olsa, ağır iqtisadi problemlər fonunda ermənilərin işğal altındakı Azərbaycan ərazilərini süni şəkildə məskunlaşdırmağa davam etdiyi haqda xəbərlər yayılıb. Bu dəfə Laçın rayonunda yeni kənd salması haqda məlumat mətbuatda yer alıb. Məlumatlara görə, “Ariavan” adlanacaq yeni kəndin tikintisi sürətlə davam edir.
Modern.az xəbər verir ki, Laçının müharibə zamanı dağıntılara məruz qalmış Zabux kəndinin yerində salınan yeni kənd ermənicə Ariavan adlanacaq və 50 evdən ibarət olacaq. Hazırda evlərdən 26-sı istifadəyə verilsə də, 24-nün tikintisi ilin sonuna qədər başa çatdırılacaq. Paralel surətdə kəndə yeni yollar salınır və kanalizasiya, su xətləri çəkilir.
Ariavan kəndinin yaradılması fikri Livan ermənilərinə məxsusdur. Məhz onların yaratdığı “Ari” fondu Zabux kəndinin xarabalıqları üzərində salınan kəndin maliyyə xərclərini öz üzərinə götürüb.Gələcəkdə evlərin sayı 150-ə çatdırılacaq və onlardan biri hissə Qarabağa köçən ermənilərə, qalanı isə satışa çıxarılacaq.Qeyd edək ki, Zabux kəndi Ermənistanın Gorus rayonu ilə həmsərhəd ərazisində yerləşir.
***
Bu fakt bir daha işğal edilmiş Azərbaycan ərazilərində etnik təmizləmə aparmış işğalçı Ermənistanın beynəlxalq hüquq normalarına məhəl qoymadan ərazilərimizi süni şəkildə məskunlaşdırmaq siyasətini davam etdirdiyini sübut edir. Rəsmi Bakı yəqin ki, bu faktla əlaqədar öz mövqeyini bildirəcək.
Təbii ki, Minsk Qrupu həmsədrlərinin də məsələyə reaksiyasına ehtiyac var. Əfsus ki, vasitəçilər indiyədək işğalçı tərəfin bu kimi hərəkətlərinə adekvat münasibət bildirməyiblər. Halbuki, İrəvanın süni məskunlaşma siyasəti sülh danışıqları prosesinə ən ciddi əngəllərdən biridir.
Bu, o deməkdir ki, İrəvan heç nəyə məhəl qoymadan işğalçılıq siyasətini davam etdirir. Belədə, onunla Azərbaycan tərəfinin sülh danışıqları aparmasının, o cümlədən vasitəçilərin çox səy elədikləri prezidentlərin görüşünün anlamı qalmır.
Onu da qeyd edək ki, Ermənistanın Dağlıq Qarabağda Suriyadan qaçan erməni ailələrini yerləşdirməsi barədə də indiyədək dəfələrlə məlumatlar yayılıb. Bu və digər faktlar həmçinin, Dağlıq Qarabağdakı separatçı rejimin təmsilçiləri tərəfindən etiraf edilib. Di gəl ki, həmsədrlər hətta ermənilərin özlərinin boyunlarına aldıqları faktları belə həmişə görməzlikdən gəliblər.
Odur ki, rəsmi Bakının Ermənistanın işğalçılıq siyasətini ifşa eləməkdən ötrü Beynəlxalq Məhkəməyə, BMT və ATƏT-ə müraciət eləməkdən başqa yolu qalmır. Minsk Qrupunun özünün də səlahiyyətli və effektli bir qurum olmamasını gündəliyə gətirməyin zamanı çatıb.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər