Manatı daha ciddi təzyiqlər gözləyir - ekspert |
Müəllif: Admin | Bölmə: Xəbərlər | Vaxt: 18-01-2016, 09:14 | Şərh sayı: (0) | Baxılıb: 281
Manatı daha ciddi təzyiqlər gözləyir - ekspert
Neftin yenidən bahalaşacağı əlçatmaz arzuya çevrilir...İranın neft bazarına daxil olması ilə neftin qiymətləri yenidən müzakirə olunmaqdadır. Neftin qiymətinə yönələn əksər proqnozlar nikbin deyil. Hazırda Brent markalı neft 2004-cü ilin fevralından bəri ilk dəfə 29 dollardan aşağı düşüb. ICE London qitələrarası birjasında Brent markalı neftin 1 barelinin dəyəri 6,49 faiz azalaraq 28,88 dollaradək düşüb.
“Bloomberg”in xəbərinə görə, İran artıq yanvarın 18-dən neft üçün “qara bazar ertəsi” planlaşdırır. Sanksiyalar götürüləndən sonra İran neft bazarına daha ucuz qiymətlərlə girəcək, onsuz da aşağı olan neft qiymətləri bir az da düşəcək. Bu barədə artıq həmin ölkənin xarici işlər nazirinin müavini Abbas Arakçi də anons edib. İranın bazara girməyindən ən çox qorxan ölkələrdən biri də Rusiyadır. Bu, neftdən asılı olan ölkələr üçün “iqtisadi faciə” adlandırılır. Daha əvvəl Rusiyanın energetika naziri Aleksandr Novak bildirib ki, İran sutkada 2,5 milyon barel neft ixrac etmək iqtidarındadır. Amma İran bu mövzuda tələsik açıqlamalar verməyə meyl etmir. İranın neft naziri Bidjan Zanqane sanksiyaların ləğvindən sonra sutkalıq neft çıxarışının 500 min barrel olacağını qeyd edib. Hər halda bu iki fərziyyənin hansının real olduğu yaxın 1-2 həftə ərzində bilinəcək.
Bundan əlavə, İsrailin araşdırma şirkəti olan “Windward” daha maraqlı məlumat yayıb. Həmin məlumata görə, sanksiyaların ləğvinin mümkünlüyünü bilən İran hələ 2015-ci ilin baharından neft istehsalına başlayıb. "Windward" hazırda İranın 28 supertankerlik neft xammalının olduğunu bildirir. Və sabahdan həmin 51 milyon barrellik ehtiyat dünya bazarına çıxarılaraq qiymətləri “dağıdacaq”.
Qiymətin düşməsi ilə Qərbi Avropanın ən böyük neft ixracatçısı olan ölkədəki istehsal 2008-ci ildəkindən daha kritik durumdadır. Norveçin Neft İdarəsinin rəhbəri Bente Nyland
yerli mediaya açıqlamasında bildirib ki, Norveçin neft sənayesi böhrandadır və bunu inkar etmək mümkün deyil. Brent neftin bir barelinin qiyməti aşağı düşərək, son nəticədə öz dəyərini 4 faiz itirib. Qərbi Teksas növlü xam neftin (WTI) bir bareli isə günə 31,21 dollar qiymətlə başladığı halda, hazırda 29,69 dollardan satılır. Bu isə onun 4,9 faiz ucuzlaşdığını göstərir. Analitiklər isə neftin qiymətlərində yaşana biləcək qiymət artırımının qalıcı olmadığını iddia edirlər. Onların fikrincə, 30 dollarlıq qiymət kritik dəstək statusundadır. Qiymət daha da aşağı düşərsə, satış qrafiki yüksələ bilər.
Ekspert Natiq Cəfərli isə bildirib ki, ABŞ və Qərbin İrana qarşı sanksiyalarını götürməsi gözlənilən addım olub. Onun fikrincə, qərar dünya neft bazarına da təsir edəcək: “Bundan sonra neftin qiymətinin ucuz qalması ehtimalı daha da gücləndi. Çünki İran ilkin mərhələdə gündə 500 min barel, 6 aydan sonra daha 500 min barel bazara neft çıxaracaq, artıq müqavilələr imzalanıb. Bu amil neft bazarında qiymətlərə təsir edəcək. Dünya üçün ikinci pozitiv təsir 80 milyon əhalisi olan ölkənin qapılarının açılmasıdır. Bu, böyük investisiya imkanları olan bazardır. Avropa ölkələri bu bazarda özlərinə yer tutmağa çalışacaqlar. Azərbaycan normal istisadi-siyasi kurs apara bilsə, o bazarda kiçicik də olsa, özünə yer götürər. Amma indiki şəraitdə, bu, çox çətin görünür. Hər halda, qonşu ölkədə belə imkanın yaranması Azərbaycan vətəndaşları üçün iş tapmaq baxımından müsbətdir”.
“Moody’s” beynəlxalq reytinq agentliyinin analitiki Mariya Malyukova isə bildirib ki, Azərbaycanın milli valyutası olan manatın məzənnəsi əsasən neftin qiymətinə bağlıdır və bununla bağlı proqnoz vermək çətindir: “Hər şeyi neft qiymətlərinin dinamikası göstərəcək”.
Yeri gəlmişkən, Böyük Britaniyanın “Standard Chartered” bankı neftin gələcək qiymətləri ilə bağlı pessimist proqnoz verib. “Standard Chartered” bankı “qara qızıl” qiymətlərinin 10 dollara qədər ucuzlaşacağını gözləyir: “Hesab edirik ki, əsas oyunçular hər şeyin çox gec olduğunu anlayan zaman neft qiymətləri 10 dollara qədər ucuzlaşmış olacaq”. “Reuters”in məlumatına görə, dünyanın bir çox bankları (“Barclays”, “Macquarie”, “Bank of America”, “Merill Lynch” və “Societe Generale”) 2016-cı illə bağlı öz proqnozlarını mənfiyə doğru dəyişiblər. Analitiklərin fikrincə, Çin iqtisadiyyatındakı ləngimə ilə yanaşı, dünya bazarlarında sutkada 1,5 milyon barel neftin artıq hasil olunması qiymətləri ucuzlaşdıran əsas amillərdir.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər