Siyəzənin deputatı tapıldı və danışdı |
Müəllif: Admin | Bölmə: Xəbərlər | Vaxt: 15-01-2016, 10:07 | Şərh sayı: (0) | Baxılıb: 279
Siyəzənin deputatı tapıldı və danışdı
Tahir Süleymanov: “Bunlar axı kimə, nəyə lazım idi?” Bölgələrdə baş verən etiraz aksiyaları deputatların fəaliyyətini də gündəmə gətirib. Bu arada bəzi deputatlar hətta mövcud duruma görə həmkarlarını da günahlandırır. Məsələn, AVP sədri, deputat Fəzail Ağamalı “Yeni Müsavat”a açıqlamasında deputatlar Tahir Süleymanov və Əsabil Qasımovu unun qiymətini qaldırmaqda ittiham edib və bildirib ki, onlar süni bahalaşmaya gedib əhalinin vəziyyətini ağırlaşdırmasınlar.
“Bu deputatlara çağırış edirəm ki, xalqı çörəklə imtahana çəkməyin, xalqı dövlətdən narazı salmayın. Onlar bu dövlətdən qazanıblar, indi qazandıqlarını zəhmət çəkib xalqa xərcləsinlər. Bu durumda da pul qazanmaq həvəsinə düşməsinlər” deyə, F.Ağamalı əlavə edib.
Qeyd edək ki, Əsabil Qasımovun köməkçisi deputatın xaricdə olduğunu, yanvarın sonlarında ölkəyə dönəcəyini bildirib.
54 saylı Şabran-Siyəzən seçki dairəsinin deputatı Tahir Süleymanov isə bir neçə günlük sükutdan sonra telefonumuza cavab verdi və Siyəzəndə baş verən aksiya, qarşıdurmalar və digər məsələlərlə bağlı suallarımızı cavablandırdı.
- Tahir müəllim, Siyəzəndə nə baş verir, vəziyyətlə bağlı nə deyə bilərsiniz?
- Prokurorluq bu barədə rəsmi məlumat verib. Heç bir qarşıdurma yoxdur. Müəyyən qüvvələr gəlib ora. Müsavatın, Xalq Cəbhəsinin üzvlərindən, sonra dini radikal adamlar var. 50-100 nəfər adam gəlib. Biz də ordaydıq. Əslində heç bir tələb də yoxdur. Onları dəvət elədik, soruşduq ki, nə istəyirsiniz, nə məsələdir? Dedilər, kreditlərimiz var, nə bilim, daha nə... Mən də dedim axı, camaatı bura yığmaqla kredit, bank məsələsi həll olunmur. Rayonda heç bir gərginlik yoxdur, özüm də bu dəqiqə Siyəzəndəyəm. Ayın 12-13-ü də orda olmuşam.
- Siz müxalifəti günahlandırırsınız, amma siyasi partiyalar bu məsələlərə qarışmadığını bəyan edir...
- Orda həbs olunanların içərisində mənim dediyim insanlar var, mən onlara istinad edirəm.
- Hətta həmkarlarınız da deyir ki, aksiyalar keçirən adamları qınamaq olmaz, onların problemlərini həll etmək lazımdır. Sizə isə sadə adamları günahlandırırsınız...
- İndi bu, mənim öz fikrimdir. Orda 50-55 nəfər saxlanılıb, o adamlara istinadən deyirəm.
- Deyirsiniz gərginlik olmayıb. Əgər gərginlik yox idisə, Daxili Qoşunların əsgərləri niyə rayona gedirdi? Qarşıdurmanı təsdiqləyən videokadrlar da var.
- Gərginlik əsassızdır. Tutaq ki, orda daş atdılar, bir qadını, bir uşağı yaraladılar. Bunlar axı kimə, nəyə lazım idi?
- Niyə əvvəlcədən gedib camaatla görüşmədiniz, əhalini sakitliyə çağırmadınız, onların sözünü hökumətə çatdırmadınız ki, belə gərginlik də yarandı?
- Mən hər gün ordayam, həmişə də onlarla bir yerdə olmuşam. Parlament seçkiləri ayyarım bundan əvvəl keçirilib, kəndbəkənd görüşlərimiz də olub, bu məsələlər qaldırılmayıb. Bunların, sadəcə, dedikləri odur ki, banklara borcları var. Mən də müraciət etdim, ağsaqqallara dedim ki, bu şəkildə, belə söhbətlərlə bank məsələsi həll olunmur axı.
- Sizin seçki dairəsində təqribən nə qədər adamın bank krediti var?
- Mən onu dəqiq bilmirəm, onların dediklərini sizə deyirəm. Nə bilim ki, kimin nə qədər borcu var? Təəssüf ki, məndə bu barədə məlumat yoxdur, olsaydı, deyərdim. Mən hər gün Siyəzəndə oluram, amma ayın 12-sinə qədər burda bu cür söhbətlər olmayıb. Mən Bakıda yaşamıram, yaşayış yerim buradır. Hər gün də bu camaatın arasındayam.
- Deputat həmkarınız Fəzail Ağamalı sizə və Əsabil Qasımova müraciət edib dedi ki, camaatı çörəklə imtahana çəkməyin...
- (Sualı yarımçıq kəsir) Mən hazırda icra hakimiyyətindəyəm, adamlarla görüşürəm. Mənim o barədə məlumatım yoxdur, heç bir şey oxumamışam, düzü, mənim buna vaxtım da olmayıb.
“Yerli adam necə olur, özün təsəvvür elə, hamısı “çerez-çerez” bir-birinə qohum-əqrəbadır”
- Mən müraciətin məzmununu sizə deyirəm. Həmkarınız bildirib ki, indiyə qədər dövlətdən yararlanıbsınız, heç olmasa bundan sonra xalqı düşünün...
- (Yenə müdaxilə edir) Mənim qardaşım, kim nə deyib, bilmirəm. Mən də deyirəm ki, oxumamışam. Tutaq ki, deyirlər kimsə sizin haqqınızda bir söz deyib. Siz onu oxumasanız, nə deyə bilərsiniz? Oxumadığım, bilmədiyim şey barədə heç bir məlumat verə bilmərəm.
- Yaxşı, siz və həmkarınız Əsabil Qasımov iri un şirkətlərinin və un dəyirmanlarının sahiblərisiniz...
- (Bu dəfə də suala imkan vermir) Mən un şirkətinin rəhbəri deyiləm. 2000-ci ildən millət vəkiliyəm, un məsələsinə də baxmıram.
- Hər halda, təsisçisiniz...
- Xeyr, heç təsisçi də deyiləm. Bu məsələnin mənə heç bir aidiyyəti yoxdur.
- Elə isə həmkarınız niyə sizin adınızı çəkib?
- Yenə deyirəm, axı mən onun dediklərini oxumamışam, bilmirəm nə deyib. Gəlin bir-birimizə hörmətlə yanaşaq da...
- Hazırda Siyəzəndə vəziyyət necədir? Sosial şəbəkələrdə xəbərlər dolaşır ki, gərginlik hökm sürür...
- Qəti şəkildə. Mən sizə məsuliyyətimlə deyirəm, tam sakitlikdir. Bu dəqiqə icra hakimiyyətindən çıxmışam, Mədəniyyət Sarayının qabağındayam. Qəti belə söhbətlər yoxdur. Hər şey öz qaydasındadır.
- Son seçki sizin üçün heç də asan keçmədi, rəqibiniz üstün görünürdü. Bu gün necə, insanlarla dil tapa bilirsinizmi, sizi eşidirlərmi?
- Burda nə mənim əleyhimə olan adam olub, nə də... Mən burda yerli adamam, özümə rəqib, ya alternativ də görmürəm. Seçkilər vaxtı 5-10 nəfər olub, seçki də artıq geridə qalıb. Bunlar hamısı mənim camaatım, xalqım, qohum-əqrəbamdır. Yerli adam necə olur, özün təsəvvür elə, hamısı “çerez-çerez” bir-birinə qohum-əqrəbadır.
- Amma Elza Seyidcahan dedi ki, ordan mən seçilmişdim...
- İndi nə deyim? Seçiləydi də.
- Sonrakı günlərdə keçmiş rəqib kimi görüşüb-danışdınızmı?
- Mən Elza Seyidcahanı tanımıram. Onunla heç bir tanışlığım yoxdur, heç onunla görüşüm də olmayıb. Nə mən onun telefonunu bilmirəm, nə də o mənim. Mən ona işlərində ancaq müvəffəqiyyətlər arzulayıram.
- Əgər siyəzənlilərin səsini qazanmısınızsa, onda niyə əhali sizin yanınıza gəlib sözünü deməkdənsə, aksiya keçirməyə qərar verdi?
- Mənim yanımda indi adamlar var, danışa bilmirəm, bağışlayın...
Ana Vətən Partiyasının sədri, deputat Fəzail Ağamalı həmkarları Milli Məclisin digər üzvləri Tahir Süleymanovla Əsabil Qasımovun adlarını çəkərək, onları ölkədə unun qiymətinin süni şəkildə bahalaşmasına görə sərt tənqid edib. Fəzail Ağamalı hər iki deputatın un istehsalı ilə məşğul olduqlarını dilə gətirərək, qiymətlərin onlar tərəfindən qaldırıldığını deyib. Artıq qarşı tərəfdən deputat Fəzail Ağamalının ittihamlarına cavab verilib.
Lakin “Yeni Müsavat”ın suallarından yayınan, məsələdən “xəbərsiz” olduğunu deyən Tahir Süleymanov modern.az saytına açıqlamasında həmkarının ittihamına reaksiya verib, deyib ki, F.Ağamalının dedikləri əsassızdır. “Şimal bölgəsində unun bir kisəsi 26 manatdır və buna uyğun olaraq çörəyin də qiymətində artım olmayıb. Unun qiymətinin qalxması haqqında informasiyalar əsassızdır və yaxşı olardı ki, hər kəs bildiyi məsələdən danışsın. Bu gün ölkəmizin 5-6 aylıq taxıl ehtiyatı var və unun qiymətində hər hansı artım olmayıb” - deyə, T.Süleymanov bildirib.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər