Deputatlar maaş artımı üçün müraciət etməyəcək |
Müəllif: Admin | Bölmə: Xəbərlər | Vaxt: 13-01-2016, 14:40 | Şərh sayı: (0) | Baxılıb: 262
Deputatlar maaş artımı üçün müraciət etməyəcək
“2 min manat civarında əmək haqqı alırıq, min şükür”Neft pullarının kəskin şəkildə azalması şəraitində manatın dəyərini itirməsi əhalinin bütün kateqoriyalarının gəlirlərini azaldıb. Odur ki, indiki situasiya sadə həyat yaşayan insanlarla yanaşı, digər kəsimin, müqayisədə daha komfortlu yaşayan insanların da durumuna müəyyən təsir edib.
Nazirlər Kabinetinin sonuncu toplantısında ölkə başçısı aztəminatlı ailələrin əmək haqqı və təqaüdlərinin artırılmasının zəruriliyini bildirərək tapşırıqlar verdi. Maraqlıdır, devalvasiyadan sonra maaşının dəyəri yarıbayarı azalan deputatlar necə, əmək haqqının artırılması ilə bağlı hökumətə müraciət edəcəklərmi?
Deputat Fazil Mustafa “Yeni Müsavat”a bildirdi ki, əgər deputat maaşını Rusiya və digər qonşu dövlətlərlə müqayisə etsəniz, bizdə daha aşağı olduğunu görə bilərsiniz: “Xüsusilə də indiki şərtlərdə dolların məzənnəsi ilə götürdükdə, daha da azaldığı görünəcək. Bununla belə, indiki çətin durumda bu məsələnin gündəmə gətirilməsini doğru saymıram. İlk növbədə aztəminatlı insanların vəziyyətini düşünərək, onlara aid əmək haqqı və pensiyaları artırmaq vacibdir”.
Parlamentdə ən çox deputatları təmsil olunan YAP-da necə, deputatların maaş artımı ilə bağlı təşəbbüs və ya müzakirələr varmı?
Deputat, Milli Məclisin komitə sədri Siyavuş Novruzov bildirdi ki, hakim partiyada deputatların maaşının artırılması ilə əlaqədar müzakirə aparılmayıb: “Hələlik bu barədə hər hansı müzakirə olmayıb. Cənab prezident ilk növbədə aztəminatlı ailələr, pensiyaçılar, sosial müdafiəyə ehtiyacı olanların durumunun yaxşılaşdırılması ilə bağlı müvafiq qurumlara tapşırıqlar verib. Hazırda bununla bağlı işlər aparılır. Sonrakı mərhələdə digər məsələlərə baxılacaq və yəqin ki, müvafiq addımlar atılacaq. Ümumiyyətlə, qiymətlərə nəzarət gücləndirilsə, süni qiymət artımı məsələləri olmasa, elə ciddi problemlər ortaya çıxmayacaq”.
Deputat Əli Məsimli də maaş artımı barədə təklif verməyəcək: “Reallıq belədir ki, hər maaşın da öz xərcləri, öz problemləri var. Bununla belə, tam səmimi deyirəm ki, indiki situasiyada müəllimin, həkimin, elm, mədəniyyət, incəsənət və digər sahələrdə çalışanların maaşlarının artmasını istəyirəm ki, onların cibində heç olmasa, özünün və ailəsinin müəyyən tələbatını ödəməyə yetərli pulları olsun, seçicilərlə görüşəndə pafosdan uzaq söhbətlər zamanı onların göstərdiyi təbii səmimiyyət müqabilində deməyə sözüm olsun”.
Deputat Fəzail Ağamalı da dedi ki, qəti şəkildə deputatların maaşının artırılmasının tərəfdarı deyil: “Bu maaşa da min şükür. Sadəcə, qənaətcil olmalıyıq, israfçılığa yol verməməliyik, pulu daha zəruri məqsədlər üçün xərcləməliyik. Çatsa da, çatmasa da, mən maaş artımının tərəfdarı deyiləm. Deputatların maaşının artırılması təklifi cəmiyyət tərəfindən haqlı olaraq düzgün qəbul edilməz. 2 min manat civarında maaş alırıq. Bu, kifayət qədər yüksək məbləğdir. Ona görə də indiki vəziyyətdə maaş artımı barədə düşünmək belə lazım deyil”.
Deputat Zahid Oruc mövzu ilə bağlı danışarkən dedi ki, parlament üzvü olmaq xeyli üstünlüklər və imtiyazlar yaratsa da, çoxlu yazılmış və qeyri-rəsmi öhdəlikləri də inkarolunmazdır: “Dövlət qulluqçularından fərqli olaraq, vətəndaşların daha həssaslıqla və tələbkarlıqla yanaşdığı orqanın ünvanı heç kəsə sirr deyil. Əgər ucqar bir əyalətdə bir qurd insana xəsarət yetirirsə, o andaca millət vəkilinin üstünə saysız-hesabsız müraciətlər daxil olur və deputatın canavara qarşı mübarizədə nə kimi fədakarlıqlar edə biləcəyi soruşulur, istənilir, yaxud tələb edilir. İstəsəniz vətəndaşın uğradığı çətinliyi hər hansı məmurla bağlı, yaxud həyati bir problem kimi də qəbul edə bilərsiz. Belə olan halda, heç kəs xalqın təmsilçisinin xərclərini hesablamayacaq, yalnız onun buna borclu olduğunu söyləyəcək. O üzdən hazırkı devalvasiya canavarı qarşısında millət vəkilinin maaşını artırmaq təklifi onsuz da cəmiyyət rəyində üzərimizə gələn haqlı-haqsız ittihamları bir az da artırar və dollar krediti öhdəliyi olanlardan oğurluq sayılardı”. Z.Oruc dedi ki, pul heç zaman çox olmur: “Yaşayış minimumu haqqında qanun və onun həddi olsa da, yaşayış maksimumunun kriteriyası müəyyənləşməyib. Xüsusilə də ictimai şəxs olanlar statuslarına görə müxtəlif imkanların sahibi olmağa can atırlar. Hər halda, Amerika konqresmenlərinin və Avropa parlamentarilərinin elan etdikləri rəsmi bəyannamədə onların orta təbəqədən də yuxarıda dayandığı məlum olur. Azərbaycan parlamentarisinin maddi və mənəvi obrazı millətindən kəskin fərqlənə bilməz. Çünki nə qədər ütülü geyinsən də unutmamalısan ki, sənin libasın xalqın əynindəkilərdir”.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər