Təzə çıxışın açılışı |
Müəllif: Admin | Bölmə: Xəbərlər | Vaxt: 29-12-2015, 14:20 | Şərh sayı: (0) | Baxılıb: 310
Təzə çıxışın açılışı
Prezident Administrasiyasından bildirirlər ki, Azərbaycan 2015-ci ildə qlobal mürəkkəb proseslərin təsirindən məharətlə qorunmuşdur. Əlbəttə. Buna kimin şübhəsi var?
Azərbaycan yerində cağbacağ durur. Bir az qərb tərəfində əyər-əskik var, o da lazım gəlsə düzələcəkdir. Ancaq mürəkkəb qlobal proseslərin təsirindən Azərbaycanla bərabər azərbaycanlılar da qorunmuşdurmu? Təəssüflər olsun, bunu demək mümkün deyil.
Hər halda ara yerdə Amerikaya blokada qanunu qoymağımız yaxşı oldu. Onlar da az aşın duzu deyil, görünür çoxdan bilirdilər ki, vaxt gələcək, Azərbaycan adlı müstəqil, tolerant, idmançı, muğamsevər respublika ilə toqquşacaqlar. Strateji mərkəzləri, alimləri oturub hesablamışdılar, məlum olmuşdu Yer planeti ABŞ və Azərbaycana eyni vaxtda ev yiyəliyi edə bilməz. İki qoçun başı bir qazanda qaynamaz - bu ata sözümüzü vaxtilə Con Kennedi də çox sevirmiş, vaxtaşırı Merilin Monro-ya danışarmış. Bax, elə buna görə onlar Marsa uçmaq, orda yaşayış məskəni qayırmaq, lazım gəlsə gənc ailələr üçün ipoteka ilə şəhərcik salmaq üzərində çalışırlar. Amerikalılar Marsa uçub gedəndən sonra Yer bizim ixtiyarımızda qalacaqdır. O zaman istəsək bütün Atlantik okeanın sahillərini bulvar edə bilərik.
Dünən planetdə başqa 2 mühüm hadisə də baş verdi. Ruslar Moskvada təzə metro stansiyası açdılar. Bizimkilər isə Bakıda köhnə metro stansiyasına yeni keçidin təntənəli inşa mərasiminin qırmızı lentinin kəsilməsi cahanşümul hadisəsinə şahid olaraq qəlbimiz riqqətlə döyünmüşdür!!! Bəs necə, qoy biri Marsa uçsun, başqası metro tiksin. Bizim işimiz onlarınkından daha geniş miqyaslıdır. Tarixdə bu qalacaq! Çünki çox adam bilmir, “Elmlər Akademiyası” metrosunun həmin təzə çıxışı nanotexnologiyalar, kvant fizikası, gen mühəndisliyi, ozon qatının tikilməsi, qara dəliyin hadisələr sınırı üsullarının tətbiqi ilə hazırlanmışdır. O çıxışdan teleportasiya etmək, ulduz qapıları vasitəsiylə Andıromeda (qədim Azərbaycan sözü andırdan yaranmışdır) dumanlığına getmək mümkündür.
Keçən il bu vaxtlar pulumuz hələ diri idi, az qalmışdı Xırdalanda Atom Elektrik Stansiyası qayıraq. Çox maraqlı proyekt idi. Hətta hökumət adamlarından biri demişdi ki, gərək biz AES üçün maddələri gecə daşıyaq, tıxaca düşməsinlər. O biri məmur isə etiraz eləmişdi: “Yox, nə danışırsan, gecə daşısaq camaat qorxar, elə bilər nəsə təhlükəli şeydir”. Bu dərəcədə camaatın rifah halını düşünən hakimiyyət yaranmışdı. Mollanın anekdotunda deyilən kimi, əcəl imkan vermədi, yoxsa uzunqulaq qənaət rejiminə öyrəşmək üzrə idi.
Yeri gəlmişkən, bu günlərdə Mərkəzi Bank manatla bağlı bir açıqlama verib, heç kim başa düşməyib: “Manatın restruksizasiyasını konsolidasiya etsək manatın aktiv proseslərində bombarbiya kerqudu olacaqdır”. Bu mənə bir başqa lətifəni xatırlatdı. Təyyarədə amerikalı, rus, azərbaycanlı uçurlar. Birdən qəza durumu yaranır, stüardessa deyir ki, cəmi 3 paraşütümüz var, ölkələrin paytaxtını soruşacağam, kim bilsə paraşüt alacaq. Amerikalıdan soruşur: “Rusiyanın paytaxtı haradır?”. Yanki deyir Moskva, paraşütü alıb tullanır. Rus da “Amerikanın paytaxtı haradır” sualına doğru cavab verir, tullanır. Növbə çatır azərbaycanlıya. Stüardessa soruşur: “Mozambikin paytaxtı haradır?”. Azərbaycanlı yazıq-yazıq deyir: “Ta denən paraşüt vermək istəmirəm də”. İndi Mərkəzi Bankın hətərən-pətərən açıqlamaları da bu mənaya gəlir ki, bizə paraşüt vermək istəmirlər.
Cəhənnəmə versinlər. Özümüz uçarıq. Üzməyi öyrəndiyimiz kimi.
Yadımdan çıxmamış bir gülməli qərar haqda da yazım. Son günlər hakimiyyət guya antiböhran tədbiri olaraq mağazaların spirtli içki satmaq lisenziyasını ləğv etdi. O biri yandan isə spirtli içkilərin nağd satışını qadağan edən qanun qayırıblar. Əgər qabaq lisenziyanı təkcə dükan alırdısa, indi faktiki hər bir alıcı almalıdır. Bir lisenziya ləğv edilir, yüz minləri yaradılır - buna islahat deyilirmiş.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər