Avropanın nəzakəti bura qədərmiş? |
Müəllif: Admin | Bölmə: Xəbərlər | Vaxt: 13-10-2015, 14:34 | Şərh sayı: (0) | Baxılıb: 299
Avropanın nəzakəti bura qədərmiş?
- İrəli, yalnız irəli! Dayanmaq olmaz! Dayansaq, uduzacağıq, bizi geri qaytaracaqlar. İrəlidə həyat, arxada isə aclıq və ölümdür!
... 29 yaşlı Əbdülkərim Məccar Suriyanın Hələb şəhərindəndir. Oradan qaçıb, əvvəlcə Türkiyəyə yollanıb, sonra rezin qayıqla Yunanıstanın Lesbos adasına keçib. Daha sonra Macarıstan, Avstriyaya üz tutub, Almaniyaya keçib.
Fəqət, yüz minlərlə miqrant təki onun arzusu Almaniyada məskunlaşmaq deyil.
Əbdülkərim Almaniyadan Fransaya adlayıb. Daha doğrusu, qaçıb, yeriyib, avtobusla və qatarla gedib, axırda Fransanı Britaniyadan ayıran La-Manş boğazının sahilinə, Kale şəhərinə çatıb.3500 miqrant təki.
Yaxın Şərq və Şimali Afırikadakı terrordan, savaşdan, bombardmanlardan qaçan bu zavallılar Britaniyaya keçmək istəyirlər.
Onların hədəfi La-Manşın təki ilə, dənizin dibi ilə çəkilmiş tuneldir. Dünən 100-ə yaxın miqrant tunelin Kale hissəsindəki girişinə daxil olmaq istəyib.
Polis qoymayıb və toqquşma başlayıb.
Fransa polisinin dadına hərbçilər çatıblar və miqrantlar niyyətlərinə çatmayıblar.
Tunelin operatoru "Eurotunnel"dən verilən açıqlamaya görə, "miqrantların yaratdıqları iğtişaşlarla bağlı olaraq qatarların hərəkətində müəyyən ləngimələr yaransa da, problem artıq aradan qaldırılıb".
3500 miqrant tuneli keçərək Britaniyaya adlamaq istəyir.İyun ayından bəri Fransanın Kale şəhəri və ətrafına yığışmış miqrantlarla polis arasında toqquşmalar səngimir. Həmin iğtişaşlarda, davalarda indiyədək 17 miqrant həlak olub.
Canını götürüb müharibədən və terrordan qaçanlar arasında bundan sonra neçə nəfərin Kaledə can qoyacaqlarısa hələ bəlli deyil.
Afrika və Asiya ölkələrindən Avropaya axışan miqrantların sayı artdıqca, Avropa Birliyinin ilkin siyasətindən fərqli olaraq indiki davranışlarında fərqlər artır.
Avropa miqrantları əvvəlcə şəfqətlə, humanizmlə, sevgi ilə qarşılamağa çalışdığını deyirdi.
Hər halda Çexiya, Macarıstan və ya Bolqarıstan istisna olmaqla digər öklələrdə belə idi. Almaniya və Fransada hətta sakinlər "könüllü" olaraq vağzalların və nəqliyyat qovşaqlarının yanına düzülərək miqrantlara su, yemək, paltar paylayırdılar.
Avropa Birliyinin mediası da bunu "miqrantlara qucaq açan avropalıların humanizmi və səmimiyyəti" kimi təqdim edirdi.
Təbliğat maşını işə düşmüşdü və təşviqatın mancanaqları gurultu ilə işləyirdi.Həmin gurultu səsləri aldadılan miqrantların narazılıqlarını gizləməyə, ört-basdır etməyə yönəlmişdi. Ki, həbsxanaları xatırladan düşərgələrə yönəldilən, barmaq izləri götürülən, barələrində ən müfəssəl şəkildə məlumatlar toplanan miqrant binəvalar və ya binəva miqrantlar gördüklərinə inansınlar.
Görüntü ümidlə yaşayan, nəyəsə güvənən insanları sakitləşdirməyə, onların arzularının illüzor olmadığını göstərməyə yönəlmişdi.
Amma az sonra bu böyük, yöndəmsiz, milyardlarla avronun xərcləndiyi reklam konstruksiyası dağıldı və onun parçaları arasında gizlədilən həqiqət göründü.
Miqrantar çox gec olsa da, anlamağa başladılar ki, onların hər 10 nəfərindən ən yaxşı halda biri sığınacaq ala bilər.
"Barmaq izi harada götürülübsə, oraya getməlisiniz, orada problemlərinizin həllinə çalışmalısınız" - bu sözləri eşidən miqrantlar əmr aldıqlarını dərk etdilər.
Halbuki Macarıstanda, Yunanıstanda, Avstriyada barmaq izləri alınan miqrantlar Almaniyada, Fransada, Britaniyada, Skandinaviya ölkələrində yaşayacaqlarını, yeni həyata başlayacaqlarını xəyal edirdilər."Səmimi" avropalılar da dəyişiblər, daha doğrusu, burqomistrlər, merlər, bələdiyyə sədrləri, nazirlər və dövlət məmurlarının göstərişlərinə əsasən gülümsəyən, dövlət büdcəsindən ayrılmış pullar hesabına alınan "second hand", yəni işlənmiş geyimləri miqrantlara "ailə üzvlərimizin paltarlarıdır" kimi paylayan almanlar, avstriyalılar, fransızlar bezdiklərini dedilər.
Avropa Birliyinin müxtəlif ölkələrində miqrantlara qarşı yürüşlər, mitinqlər və piketlərin sayı artır.
Almaniyanın Çexiya ilə sərhədi yaxınlığındakı Zebnis şəhərində 3 mindən artıq alman ölkəyə miqrant axınına son qoyulmasını tələb edir. PEGİDA kimi antimiqrant, ifrat şovinist hərəkatla yanaşı, müxtəlif sağçı-radikal qrupların üzvləri və tərəfdarları olan almanlar əllərində "Merkel terrorçuların anasıdır!" yazılmış plakatlar tutmuş, çoxları da əyinlərinə "İslam turizminə stop!" yazılı futbolkalar geyinmişdilər."Vətəndaşların narazılıqlarını nəzərə alan" Almaniya hökuməti də miqrantlarla bağlı mövqelərində "zəruri" dəyişikliklərə başlayıb. Sığınacaq almaqla bağlı şərtlərin sərtləşdiriləcəyi, miqrantların əksər qrupları üçün müavinət və maliyyə yardımlarının məbləğlərinin əhəmiyyətli dərəcədə azaldılacağı deyilir.
Daha doğrusu, bütün bunlar olacaq.
... Kale şəhərinin sakinləri də antimiqrant yürüşünə çıxıblar. 1000-ə yaxın fransız rəsmi icazənin olmamasına rəğmən, şəhərin mərkəzi meydanına yığışaraq miqrantların dərhal çıxarılmasını tələb ediblər.
Nümayiş iştirakçılarından olan 48 yaşlı Jülyen Bifo deyir: "Onlar şəhərimizi çirkləndirir, heç nə etmək istəmirlər. Kaledə baş verənlər səbr kasamızı daşdırıb".Şəhərin çirklənməsindən narahat olan fransızlar, görəsən, Liviyada, İraqda, Suriyada Avropa Birliyinin əsla təmiz olmayan siyasi məqsədlərinə görə yüz minlərlə, milyonlarla insanın evsiz, sabahsız, ümidsiz qaldığını anlayırlarmı?
Ağac altında, asfaltda yatan miqrantın "şəhərin görkəmini pozması"ndan şikayətlənən almanlar, fransızlar, britaniyalılar bombardman olunan Suriya, Liviya, İraqdakı şəhərlərin ümumiyyətlə görkəmdən çıxaraq viran qaldığını bilmirlərmi?
Anlayırlar, bilirlər.
Amma yenə də, yenidən dediklərindən dönmürlər.
Miqrantları geri döndərmək üçün.
Geridə o zavallıları yalnız ölüm gözləyir.
Orxan Hun
Milli.Az
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər