İmam Mehdinin (ə.f) dünyaya gəlişi |
Müəllif: Admin | Bölmə: Islam tarixi | Vaxt: 4-10-2015, 20:59 | Şərh sayı: (0) | Baxılıb: 1243
İmam Mehdinin (ə.f) dünyaya gəlişi
Müsəlmanlar arasında Mehdinin (ə.f) gəlişi ilə bağlı heç bir fikir ayrılığı yoxdur. Bütün İslam firqələri zülmlə dolmuş yer üzünü ədalət və rəhmətlə dolduracaq bir xilaskarın gəlişinə inanır. İslam firqələri arasındakı ən əsas ziddiyyət Onun doğulub-doğulmaması barədədir.
Əhli-beyt (ə) ardıcıllarına görə Mehdi, İmam Həsən Əskərinin (ə) oğlu Muhəmməddir (ə.f). O, 255-ci hicri ilində Samirra şəhərində dünyaya gəlmiş, sonradan Allahın iradəsi ilə qeybə çəkilmişdir. Mehdi barədəki bu inanc Əhli-beytdən (ə) nəql olunan mütəvatir hədislərdən qaynaqlanır. Əhli-beytə istinadən nəql olunan hədislərdə Allahın Rəsulunun (s) müjdə verdiyi Mehdinin Muhəmməd bin Həsən Əksəri (ə.f) olduğu qeyd edilir.
Hədislərə istinadən Mehdinin (ə.f) doğulmasını iki yolla sübut edə bilərik:
1) Hz. Mehdi (ə.f) və onun pak ata-babaları (ə) barədə nəql olunan hədislər yolu ilə:
Bu qəbildən olan “Səqəleyn” hədisinə işarə etsək, kifayət edər. Allahın Rəsulu (s) buyurmuşdur:
“Ey camaat, mən sizin aranızda iki ağır əmanət qoyub gedirəm; Allahın kitabı və itrətim olan Əhli-beyt. Onlar hovuz kənarında mənə qovuşanadək bir-birlərindən ayrılmayacaqlar! Onlardan önə keçməyin, həlak olarsınız. Onlara öyrətməyin, onlar sizdən daha biliklidirlər!” Təvatürlə nəql olunan bu hədisdən aşağıdakı nəticələri əldə edə bilərik:
1.Quran və Əhli-beyt (ə) bir-biri ilə eyni olan iki ağır və qiymətli əmanətdir.
2.Quran və Əhli-beyt (ə) hərtərəflidir (universaldır).
3.Quran və Əhli-beyt (ə) mütləq hidayət mənbəyidir.
4.Əbədi ünsiyyət. Quran və Əhli-beyt (ə) Qiyamət gününə qədər bir-birindən ayrılmazdır.
5.Quran və Əhli-beytə tabe olmaq vacibdir.
6.Əhli-beyt ümmətin ən elmliləridir.
7.Quran hər növ xətadan uzaq və pak olduğu kimi Əhli-beyt (ə)də hər növ xəta və çirkinlikdən uzaq və pakdır.
Hədisdən aldığımız nəticələri araşdırdıqda görəcəyik ki, bütün zamanlarda Qurandan ayrılmayan və Əhli-beytdən (ə) olan bir imam və bələdçinin varlığı zəruridir. Əks-halda, itrət (əhli-beyt) və Quranın ünsiyyəti (ayrılmaz olması) heç bir məna kəsb etməyəcək. Bu da hədisin buyurduğuna zidd və qeyri-mümkündür. Çünki Rəsulullah (ə) “Onlar hovuz kənarında mənə qovuşanadək bir-birlərindən ayrılmayacaqlar!” deyə buyurur. Deməli, hər dövrdə Əhli-beytdən olan bir imamın varlığı zəruridir. Bu hədis Hz. Mehdinin (ə.f) imamətinə, rəhbərliyinə, ismətinə və ən nəhayət, mövcudluğuna (doğulmasına) dair ən böyük dəlillərdən biridir.
2) Yalnız Hz. Mehdi (ə.f) haqda nəql olunan hədislər yolu ilə
Bu qəbildən olan və İmam Həsən Əskəridən (ə) nəql edilən səhih bir hədisə işarə edək.
Fəzl ibn Şazan deyir: Muhəmməd ibn Əli ibn Həmzə ibn Hüseyn ibn Übeydullah ibn Abbas ibn Əli ibn Əbutalib (ə) bizə belə rəvayət etdi: Əba Muhəmmədin (ə) (İmam Həsən Əskərinin (ə)) belə buyurduğunu eşitdim: “Allahın vəlisi, bəndələri üzərindəki höccəti (bələdçisi) və mənim özümdən sonrakı xəlifəm artıq doğulmuşdur. O, iki yüz əlli beşinci ilin Şəban ayının yarısında sübh azanına yaxın, sünnət olunmuş halda doğuldu. Onu ilk yuyan (qüsl verən) bir dəstə mələklə birlikdə Cənnətin gözətçisi Rizvan oldu. Onu Kövsər və Səlsəbil suyu ilə yudular. Sonra isə onu bibim Həkimə binti Muhəmməd ibn Əli ər-Rıza (ə) yudu.” Muhəmməd ibn Əli ibn Həmzə (r.ə) onun anasının kim olduğunu soruşduqda Həzrət (ə) buyurdu: “Onun anası Məlikədir. Bəzi vaxtlar ona Susən, bəzi vaxtlarda isə Reyhanə kimi də xitab olunur. Həmçinin Siqəl (Səqil) və Nərcis də onun adlarındandır.”
Bu qəbildən olan və səhih sənədlərə əsasən, nəql olunan hədislər İmamın (ə.f) artıq dünyaya gəldiyini və Onun Allahın sonuncu höccəti (bələdçisi) olduğunu bir daha sübut edir.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər