Ermənistanı müstəqil ölkə kimi tanımayan nüvə dövləti |
Müəllif: Admin | Bölmə: Xəbərlər | Vaxt: 19-01-2016, 16:33 | Şərh sayı: (0) | Baxılıb: 243
Ermənistanı müstəqil ölkə kimi tanımayan nüvə dövləti
Pakistan-Azərbaycan hərbi əməkdaşlığı yüksək dəyərləndirilirÖtən həftə Pakistan İslam Respublikasının Hərbi Dəniz Qüvvələri komandanı admiral Muhammad Zakaullahın Bakıya səfəri, onun ölkə prezidenti, müdafiə naziri və digər rəsmi şəxslərlə görüşlər keçirməsi Pakistan-Azərbaycan hərbi əlaqələrini yenidən gündəmə gətirib.
Azərbaycanın müdafiə naziri general-polkovnik Zakir Həsənov qonaqları salamlayaraq Azərbaycanla Pakistan arasında hərbi sahədə əməkdaşlığın dostluq və qardaşlıq münasibətləri üzərində qurulduğunu, bu əlaqələrin daim inkişaf etdiyini və hər iki tərəf üçün qarşılıqlı faydalı olduğunu vurğulayıb.
Görüşdə Ermənistan-Azərbaycan münaqişəsində Pakistanın Azərbaycanı dəstəklədiyi və xalqımızın haqq işinə kömək etməyə hazır olduğu xüsusi qeyd edilib. Müdafiə Nazirliyinin yaydığı rəsmi məlumatda qeyd olunur ki, tərəflər Azərbaycanla Pakistan arasında hərbi, hərbi-texniki və hərbi təhsil sahəsində münasibətlərin genişləndirilməsi imkanları və perspektiv istiqamətlərini müzakirə edib, döyüş hazırlığı, birgə təlimlərin keçirilməsi, terrorizmə qarşı mübarizədə müştərək əməkdaşlığın, eləcə də Hərbi Dəniz Qüvvələri arasında əlaqələrin artırılmasının vacibliyini xüsusi vurğulayıblar.
Ölkəmizə səfərdən məmnunluğunu bildirən qonaq Azərbaycan-Pakistan münasibətlərinin möhkəmlənməsində bu cür görüşlərin və qarşılıqlı əlaqələrin genişləndirilməsinin zəruriliyini qeyd edib.
Xüsusilə vurğulanmalıdır ki, Pakistan Azərbaycanın müstəqilliyini tanıyan ilk ölkələrdəndir və üstəlik, indiyədək işğalçı Ermənistanın müstəqilliyini rəsmən tanımayıb. Eyni zamanda müsəlman dünyasında nüvə silahına malik olan yeganə dövlət kimi Pakistanla əlaqələr Azərbaycan üçün mühüm əhəmiyyət kəsb edir. Bu mənada ərazilərimizin erməni işğalında olması şəraitində Pakistan kimi sadiq müttəfiqlərimizin olmasına olduqca böyük ehtiyac var. Adətən Azərbaycan qardaş Türkiyənin ölkəmizə yardımını və hərtərəfli dəstəyini qeyd edir. Lakin Türkiyədən sonra Pakistan kimi güclü müttəfiqimizin olması Azərbaycan xalqının və dövlətinin maraqları baxımından çox mühüm hadisədir. Odur ki, pakistanlı generalın səfərində hansı razılaşmaların əldə olunması xüsusilə maraq doğurur.
Hərbi ekspert Azad İsazadə “Yeni Müsavat”a dedi ki, hər baxımdan Pakistan-Azərbaycan münasibətlərinin inkişafı faydalıdır: “Aydındır ki, Pakistan ordusu Qarabağda döyüşən deyil. Amma unutmayaq ki, Pakistan Azərbaycanın müstəqilliyini tanıyan ilk ölkələrdən biridir və Qarabağ məsələsində Azərbaycana Türkiyə ilə bərabər dəstək göstərir. Pakistan kimi ölkə ilə hərbi əməkdaşlıq etmək yalnız faydamızadır. Üstəlik, Pakistan yeganə İslam ölkəsidir ki, nüvə silahına malikdir, onun varlığının özü Azərbaycana böyük dəstəkdir. Təbii ki, söhbət kiməsə nüvə zərbəsi endirilməsindən getmir. Amma bir məsələni xatırlamalıyıq ki, Türkiyə-Rusiya münaqişəsi başlayanda və ruslar Türkiyəni nüvə silahı ilə təhdid edəndə Pakistanın Baş Qərargah rəisi o dəqiqə reaksiya verdi ki, Pakistan nüvə silahı olan ölkə kimi Türkiyənin yanındadır. Yəni bu da təzyiqin bir növüdür. Unutmayaq ki, bu illər ərzində bir dəfə də olsun Pakistan və Azərbaycan arasında inciklik olmayıb”.
Müdafiə Nazirliyinin mətbuat xidmətinin rəisi polkovnik Vaqif Dərgahlı bildirdi ki, Pakistan daim Azərbaycanın ərazi bütövlüyünü dəstəkləyib və bu dəstək indi də davam edir: “Pakistan dövlətinin rəsmiləri bütün beynəlxalq tədbirlərdə bu mövqedən çıxış edib. Həmçinin Pakistan bu günə də Ermənistanın ərazi bütövlüyünü tanımır. O ki qaldı hərbi əlaqələrə, bu müstəvidə əlaqələrimiz ikitərəfli əməkdaşlıq planına əsasən həyata keçirilir”.
MN sözçüsü Qarabağ savaşı başlayacağı halda Pakistanın prosesdə birbaşa iştirakının mümkün olub-olmayacağı barədə suala qısaca belə cavab verdi: “Pakistanın mövqeyi ondan ibarətdir ki, Azərbaycanın ərazi bütövlüyünü dəstəkləyir. Bu, kifayət qədər ciddi mövqedir”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər