İranla Səudiyyə Ərəbistanı arasında müharibə təhlükəsi... |
Müəllif: Admin | Bölmə: Xəbərlər | Vaxt: 12-01-2016, 09:20 | Şərh sayı: (0) | Baxılıb: 189
İranla Səudiyyə Ərəbistanı arasında müharibə təhlükəsi...
Ekspertlər bildirirlər ki, birbaşa olmasa da, bir çox ölkələrin qatıldığı savaş mütləqdir...İranla Səudiyyə Ərəbistanı arasında yanvarın 2-dən etibarən başlayan gərginlik yüksək həddədir. Şiələrin lideri şeyx Nimr ən-Nimrin edamı ilə hər iki ölkə arasında başlayan narazılıq regionun digər müsəlman ölkələrinə də sıçrayıb. Üstəlik, İranın Yəməndə yerləşən səfirliyinin Səudiyyə Ərəbistanının raketləri tərəfindən vurulduğunu bəyan etməsi vəziyyəti daha da kritikləşdirib.
İranın Xarici İşlər Nazrliyindən verilən açıqlamada Səudiyyə Ərəbistanından atılan raketlərlə Yəməndə yerləşən səfirliklərin bilərəkdən vurulduğu və səfirliyin işçilərinin yaralandığı bildirilib. Xarici İşlər Nazirliyinin sözçüsü Hüseyn Cabir Ənsari hadisənin nə zaman baş verməsi barəsində məlumat verməsə də, yaralıların həyatının riskdə olmasına görə Səudiyyə Ərəbistanının məsuliyyət daşıdığını qeyd edib.
Səudiyyə Ərəbistanının müdafiə naziri isə ölkəsi ilə İran arasında baş verə biləcək müharibənin bölgədə böyük bir fəlakətin başlanğıcı olacağını vurğulayıb. Müdafiə naziri Şahzadə Məhəmməd ibn Salman ötən həftə Səudiyyə Ərəbistanında şiə din adamı Nimr Baqir əl Nimr ilə yanaşı, 47 məhkumun edam edilməsi və İrandakı Səudiyyə səfirliyinə edilən hücumlardan sonra iki ölkə arasında yaşanan diplomatik gərginlikdən danışıb. Nazir “Economist” jurnalına verdiyi müsahibədə “İki ölkə arasında birbaşa müharibə ola bilərmi” sualını cavablandırarkən bunları deyib: “Biz bunu planlaşdırmırıq və belə bir hadisəni arzulamırıq. İki ölkə arasında müharibənin olması üçün səy göstərən varsa, o şəxsin ağlı başında deyil”. Bunun ardından Şahzadə Məhəmməd İranla müharibə ehtimalının olmadığını vurğulayıb: “Səudiyyə Ərəbistanı ilə İran arasındakı bir döyüş, bölgədə böyük bir fəlakətin başlanğıcı olar. Belə bir döyüşə qətiyyən icazə verməyəcəyik”.
İranın xarici işlər naziri Məhəmməd Cavad Zərif isə BMT-nin Suriya münaqişəsi üzrə xüsusi nümayəndəsi Staffan de Mistura ilə görüşü zamanı deyib ki, Suriya münaqişəsinin həlli istiqamətində Səudiyyə Ərəbistanının mənfi addımlarına imkan verilməyəcək. “İran hər zaman regional böhranların həllində konstruktiv mövqe tutub. Biz Səudiyyə Ərəbistanına Suriya probleminin həllindəki neqativ addımlarına imkan verməyəcəyik”,- deyə Zərif bildirib. BMT nümayəndəsi görüş zamanı İranın Suriya probleminin həlli istiqamətindəki rolunu təqdir edib.
Ekspertlər isə bildirirlər ki, indiki halda İranla Səudiyyə Ərəbistanı arasında müharibənin başlanması o qədər də gözlənilən deyil. Ekspert Ərəstun Oruclu musavat.com-a açıqlamasında bildirib ki, səfirliyin vurulması xəbərləri təsdiqini taparsa, vəziyyət ciddi olacaq: “İsbat olunarsa ki, səfirliyi Səudiyyə Ərəbistanının silahlı qüvvələri vurub, bu, artıq qalmaqalın bir qədər də böyüməsi deməkdir. Amma hökmən deyil ki, buna görə müharibə başladın. Adətən bu tip hadisələr müharibə başlamaq üçün bəhanə kimi də istifadə oluna bilər, səbəb kimi də. Adətən deyək ki, səbəb başqa olur. Belə bir istək varsa, müharibə qərarı alınarsa, bu faktdan istifadə edə bilərlər. Amma mən İranın hazırda müharibəyə getmək istəyini görmürəm. Düşünmürəm ki, İran müharibəyə getmək istəsin”.
Ekspert Natiq Miri isə musavat.com-a bildirib ki, İran müharibədə tərəfdaşlarının kimlər olacağını dəqiqləşdirməyib, bu səbəbdən müharibə başlamaya bilər: “Nəzərə almaq lazımdır ki, İran Səudiyyə Ərəbistanı ilə hər hansı savaş başladığı təqdirdə, onun Suriyadakı mütəfiqi Rusiyanın birmənalı olaraq İranı müdafiə edəcəyindən əmin deyil. Və Rusiyanın da bu prosesə qatılması o qədər də gözlənilmir. Çünki Rusiya bu prosesə qatıldığı təqdirdə, Suriyada gedən proseslərdə mövqeləri zəifləmiş duruma düşəcək. Ona görə də İran üçün bu savaşı başlatmağa bir çox çəkindirici amillər var. Bundan başqa, İran Hörmüz boğazına da iddia edir və bu Hörmüz boğazına tək hüququn yalnız İrana məxsus olduğunu vurğulayır. Ancaq bütün bu iddialara rəğmən, bilirsiniz ki, həmin boğazda ABŞ-ın altıncı təyyarədaşıyan donamması, gəmilər yerləşib. Bu da İran tərəfindən çəkindirici məqamdır. Ona görə düşünmürəm ki, bu məsələ savaş səviyyəsinə gəlsin çıxsın. Ancaq savaş olacaq. Suriyada və Yəməndə Səudiyyə Ərəbistanının və İranın dəstəklədiyi güclər tərəfindən savaş yürüdüləcək. Ancaq Səudiyyə Ərəbistanı və İran arasında savaş olmayacaq”.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər