"Atəşkəsin faydasını yaxın zamanlarda görəcəksiniz" - SORĞU |
Müəllif: Admin | Bölmə: Xəbərlər | Vaxt: 7-04-2016, 15:27 | Şərh sayı: (0) | Baxılıb: 182
"Atəşkəsin faydasını yaxın zamanlarda görəcəksiniz" - SORĞU
Son günlər cəbhədə gedən döyüşlər xalqımızda böyük ruh yüksəkliyi, qələbəyə inam yaratdı. Peşəsindən, vəzifəsindən asılı olmayaraq, hər kəs müsəlləh əsgərə çevrildi, ürəklər vətən üçün döyündü. Ancaq döyüşlərin ardınca atəşkəs elan edilməsi gənclərdə bir qədər ruh düşkünlüyünə səbəb oldu. Cəmiyyətdə ruh yüksəkliyini qoruyub-saxlamaq üçün medianın, qələm adamlarının, ziyalıların çiyninə böyük yük düşür. Onların fikrini öyrəndik: bunu üçün nə etməli, hansı istiqamətdə təbliğat aparmalı?"Qələbəyə aparan yol addımlardan asılıdır"
Yazıçı Mehriban Vəzir: Ziyalılar və ya ekspertlər bu 4 günlük sürəcdə əldə olunan nəticələrin müsbət və mənfi tərəflərini geniş şərh etməlidirlər. Bu, yalnız prosesi daha dərindən anlamağa yardım edə bilər. Ruh yüksəkliyi isə qələbəyə aparan addımların keyfiyyətindən asılıdır, sözdən yox.
"İndiki mərhələdə məhz belə lazımdır"
Millət vəkili Elman Nəsirov: Atəşkəs cəmiyyətdə ruh düşkünlüyü yaratmamalıdır. Ali Baş Komandan hansı addım atdığını çox gözəl bilir. Bütün addımlar zərgər dəqiqliyi ilə hesablanıb. İndiki mərhələdə məhz belə lazımdır. Geopolitik reallıqlar öz işini görür. Biz düşmənə gücümüzü göstərdik. İndi isə bu gücün ardınca diplomatik addımlar atılacaq. Faydasını yaxın zamanlarda hiss edəcəksiniz.
"Azərbaycan orudusunun gücünə şahid olduq"
İctimai Televiziyanın əməkdaşı Vəsilə Vahidqızı: Mənim üçün televiziya təbliğat vasitəsi deyil, yəni mən televiziyaya o anlamda yanaşmağın əleyhinəyəm. Düşünürəm ki, bu, daha çox sovet yanaşmasıdır. Məncə, jurnalistlər ona çalışmalıdırlar ki, televiziya təbliğat vasitəsi olmasın. Televiziya və ümumiyyətlə media ən doğru informasiya vasitəsi olmalıdır. Konkret bugünkü vəziyyətə gəldikdə isə, əhalinin ruh yüksəkliyini qorumaq üçün Qarabağın azadlığı yolunda ən doğru addımlar atılmalıdır. Yəqin ki, atılacaq da. İnsanlar Azərbaycanın güclü bir orduya sahib olduğunun canlı şahidi oldular. Media hansısa bəlkə də effekt verməyən forma və metodlar üzərində baş sındırmaqdan çox, dürüstlük və məsuliyyət üzərində düşünməlidir.
"Müharibə romantikasına zərər vuran hər şey kənarda qalmalıdır"
Şair Salam Sarvan: Bu əməliyyatlar zamanı sosial şəbəkədə fəallığım ürəyimdən gələnləri bölüşmək ehtiyacıyla bağlıdır. Ruh düşkünlüyü görmürəm. Sadəcə, bəzi dostlarımız təəssüflərini bildirirlər ki, əməliyyatlar niyə dayandı? Biz bu məsələylə bağlı diplomatik detalları dəqiqliyinə qədər bilmirik. Üzdə görünən hələ bu ki, siyasi meydanda ziyanımıza heç nə baş vermir. O biri meydanlarda isə qazancımız çox böyükdür, sıçrayış dərəcəsində böyükdür. Mən bu hadisələrin hərbi, psixoloji, mənəvi tərəflərini nəzərdə tuturam. Burada heç bir şişirtmə yoxdur. Nə atəşkəs?! Müharibə getməkdədir. Sadəcə, bu prosesi həm də müharibəyə bütün mənalarda yararsızların ürəkbulandırmalarından, məhz bu yararsızlıq kompleksindən irəli gələn göyərçin çırpıntılarından qorumaq lazımdır. Müharibə romantikasına zərər vuran hər fikir, hər jest ictimai rəydən kənarda qalsın gərək.
"Ruhumuz ölməyib, barıt çəlləyiyik"
ANS televiziyasının əməkdaşı Ləman Ələşrəfqızı: Məncə, gənclərin dünən keçirdiyi dəstək aksiyası, Şəhidlər xiyabanına etdikləri yürüş kimi tədbirlərə ehtiyac var. Əlbəttə, bu məsələdə televiziyanın də çiyninə yük düşür. Bütün diqqət Qarabağa yönəlməlidir. Hərbi vətənpərvərlik mövzusunda diskussiyalar, tok-şouların sayı artmalıdır.
Bir neçə gündür, bu hadisələr baş verir, görün adamlarımızda nə qədər ruh yüksəkliyi artıb. Açığı, mən bunu gözləmirdim. Deməli, hələ ayaq üstdəyik. Deməli, hələ ruhumuz ölməyib. Əksinə, barıt çəlləyiyik. Allah köməyimiz olsun. Mən hesab edirəm ki, hər şey yaxşıya doğrudur. 25 ildə biz bugünkü qədər ümidli olmamışdıq. İndi bir-iki azad etdiyimiz yüksəkliyimiz və ən əsası yüksəkdən də yüksək ovqatımız var!"
"Ali Baş Komandanın bir çağırışı toparlanmağa kifayətdir"
Şairə Rəbiqə Nazimqızı: Həmişə demişəm və yenə deyirəm, bir çağırışla istənilən vaxt cəhbəyə gedəcək yüz min nəfər toplamaq olar. Amma düşünürəm ki, bu atəşkəs ümumilikdə ölkəmiz üçün xeyirlidir. Çünki ermənilərin onu birtərəfli qaydada pozduğunu gördük. Məyusluğa qapılmaq lazım deyil, proseslərin nəticəsini gözləyək. Ali Baş Komandanın bir çağırışı yenidən toparlanmağa kifayət edəcək.
Sevinc Fədai
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər