Cəbhədəki gərginliyin əsl səbəbi: Cilovlama doktrinası nədir? |
Müəllif: Admin | Bölmə: Xəbərlər | Vaxt: 5-04-2016, 19:27 | Şərh sayı: (0) | Baxılıb: 293
Cəbhədəki gərginliyin əsl səbəbi: Cilovlama doktrinası nədir?
Azərbaycan aprelin 2-dən bəri Ermənistanla cəbhə xəttində davam edən gərginlikdən həm siyasi, həm də hərbi baxımdan qalib çıxdı.Bunu Milli.Az-a açıqlamasında təhlükəsizlik və beynəlxalq məsələlər üzrə ekspert, "Baku Network" ekspert qrupunun rəhbəri, politoloq Elxan Ələsgərov deyib.
Onun sözlərinə görə, cəbhədə vəziyyətin gərginləşməsinin əsl səbəbi Ermənistanın yürütdüyü yeni hərbi-siyasi taktika ilə bağlı idi: "Bir müddət əvvəl Ermənistan hərbi qüvvələrinin cəbhə xəttində ardıcıl şəkildə uğursuzluqları olmuşdu, çoxlu itkilər vermişdilər. Ona görə də təxminən bir ay öncə Ermənistan prezidenti Serj Sarkisyan və müdafiə naziri Seyran Ohanyan yeni "Cilovlama hərbi doktrinası"nı qəbul etdilər və bu doktrina Azərbaycana qarşı həyata keçirilməliydi.
Azərbaycanın işğal olunmuş ərazilərində yerləşmiş Ermənistan silahlı birləşmələri mülki əhalini və yaşayış məntəqələrini atəşə tutmağa başladıqdan sonra bu doktrinanın əsl mahiyyəti üzə çıxdı. Deməli, Sarkisyan-Ohanyan cütlüyünün ağlına gəlib ki, vəziyyətdən çıxmaq üçün Azərbaycan kəndlərini vursunlar. Çünki Azərbaycan kəndləri təmas xəttinə çox yaxındır, ermənilərin məskunlaşdığı kəndlər isə cəbhə xəttindən nisbətən uzaqdadır. Yəni onlar Azərbaycan kəndlərini iriçaplı pulemyotlardan, minaatanlardana rahat atəşə tuta bilirdilər. Bizim Ordumuz isə eyni silahlardan 1-2 kənd istisna olmaqla ermənilərin məskunlaşdığı kəndlərə ata bilmirdi. Bax həmin doktrina bu siyasətin əsasında qurulub.
Son olaraq martın 31-də və aprelin 1-də ermənilər bu doktrinanı həyata keçirməyə və Azərbaycan kəndlərini atəş altında saxlamağa başladılar. Nəticədə kəndlərdə mülki vətəndaşlar arasında ölən və yaralananlar oldu, yaşayış evlərinə ciddi ziyan dəydi, bəziləri dağıdıldı. Bizim Ordumuz isə bunun qarşısını almaq, mülki əhalinin atəşə tutulmaması üçün həmin istiqamətlərdə ermənilərin nəzarətində olan yüksəklikləri ələ keçirdi. Azərbaycan Ordusunun məqsədi mülki erməniləri vurmaq deyildi. Diqqət yetirdikdə görmək olar ki, Azərbaycan ordusu ermənilərin yaşadığı kəndlərə doğru irəliləmədi, yaşayış məntəqələrinə hücum etmədi. Bizim ordunun məqsədi etibarlı müdafiəni qurmaq idi, ona görə də ətrafdakı yüksəklikləri ələ keçirdi. Bununla da Ermənistanın hərbi-siyasi rəhbərliyinin yeni hərbi doktrinası çökdü. İndi Azərbaycanın işğal olunmuş Dağlıq Qarabağ ərazisində və ətraf rayonlarda yerləşmiş Ermənistan ordusu özünə yeni doktrina axtarmalıdır".
Politoloqun qənaətincə, ordunun cəbhədə həyata keçirdiyi uğurlu əməliyyatların Azərbaycana üstünlüyü təmin etməsi baxımından iki mühüm cəhəti var: "Birincisi, məsələnin siyasi tərəfi ilə bağlıdır. Biz əvvəllər düşünürdük ki, ordumuz hərəkətə keçsə, güclü ermənipərəst qüvvələrin əli ilə bütün dünya Azərbaycana qarşı çıxacaq və bizə qarşı kampaniyaya başlanacaq. Lakin gözlənilənlərin əksinə olaraq, prezident İlham Əliyevin siyasəti nəticəsində heç bir dövlət bunu etmədi. Baxmayaraq ki, Rusiya KİV-lərində güclü anti-Azərbaycan təbliğatı aparılır və KTMT-nin baş katibinin köməkçisi buna qarşı çıxıb, Rusiya rəsmilərindən heç kim Azərbaycanın əleyhinə heç bir söz deməyib. Yəni bütün dünya ictimaiyyəti Azərbaycanın haqlı olduğunu təsdiqlədi. Bu, bizim böyük siyasi qələbəmizdir. Çünki bəzi dövlətlər Dağlıq Qarabağın müstəqilliyini tanıya, nota göndərə bilərdilər. Amma bu baş vermədi. Sonra hadisələrin gedişində Azərbaycan birtərəfli qaydada atəşkəs elan etdi. Yəni bundan sonra nə olacaqdısa, onun bütün məsuliyyəti erməni tərəfinin üzərinə düşəcəkdi. Azərbaycanın Rusiya prezidenti Vladimir Putinin müraciətindən sonra atəşkəs elan etməsi isə bu məsələdə başımızın uca olduğunu göstərir. Yəni Azərbaycan bununla göstərdi ki, biz Rusiyanın da, dünya ictimaiyyətinin haqqını tanıyır, onlarla hesablaşır və hörmətlə yanaşırıq.
Digər cəhət isə hərbi aspektlə əlaqədardır. Ermənilər cəbhə boyu üç müdafiə zolağı yaradıblar. Onlar hətta tarixdə mövcud olmuş "Mannergeym xətti", "Majino xətti" kimi, özlərinin fəxri hesab etdikləri Ermənistanın müdafiə nazirinin şərəfinə ona "Ohanyan xətti" adını da qoyublar ki, guya bu xətt keçilməzdir. Amma Azərbaycan Ordusu bu xətti asanlıqla keçdi. Bu isə ermənilərin hərbi məğlubiyyəti deməkdir. Azərbaycan göstərdi ki, o, Ermənistanı hərb yolu ilə öz yerinə oturtmaq iqtidarındadır. Bu fakt ermənilərin böyük sarsıntı keçirməsinə səbəb oldu. Yəni Ermənistan həm siyasi, həm də hərbi müstəvidə məğlub oldu".
Ekspert qeyd edib ki, indi iki qarşı tərəfdə fərqli tendensiyalar müşahidə edilir: "Azərbaycanda könüllülər cəbhəyə getmək istəyir, insanlarda ruh yüksəkliyi var, vətənpərvərlik hisslərinin yüksəkliyi hiss olunur. Amma dövlət könüllülərə ehtiyacı olmadığını bildirdi, əhaliyə çağırış etmədi, qan və maddi yardım üçün müraciət etmədi. Ordu rəhbərliyi də deyir ki, hələlik əlavə köməyə ehtiyac yoxdur. Çünki bu, böyük müharibə deyildi və Azərbaycan əvvəlcədən irimiqyaslı hücum əməliyyatları planlaşdırmamışdı. Bu, sadəcə, Azərbaycanın Ordusunun Ermənistan silahlı birləşmələrinin təxribatlarına qarşı taktiki hərəkətləri idi.
Ermənistan tərəfində isə tam fərqli mənzərə müşahidə olunur. Orada tam hazırlıq əmri verilib. Könüllülər yığır, onları içirdib cəbhəyə göndərirlər. Bundan əlavə, ordu üçün maddi yardım, ianələr toplanır. Bu, onu göstərir ki, hazırda erməni tərəfi yaralı haldadırlar. Biz də bilirik ki, yaralı ilan çox təhlükəli olur, ona görə də onun başını əzirlər. İndi ermənilər yaralı ilan kimidirlər...
Böyük ehtimalla onlar əldən verdiklərini qaytarmaq üçün yenidən hücuma keçə bilərlər. Çünki bu, siyasi baxımdan Sarkiyan-Ohanyan hakimiyyətinin məğlubiyyətidir. Lakin məlumdur ki, onlar hücuma keçsələr, daha böyük itkilərə məruz qalacaqlar".
Cəbhədəki gərginliyin yaranmasında Rusiyanın əli olması ilə bağlı səslənən fikirlərə gəlincə, ekspert buna o qədər də inanmır: "Çünki Rusiya ilə Azərbaycan arasında elə bir məsələ yox idi ki, masa arxasında həll olunmasın və buna görə xüsusi mesaj göndərməyə də ehtiyac yox idi. Azərbaycan və Rusiyanın dövlət başçıları arasında münasibətlər yüksək səviyyədədir. Ona görə də bu gərginlik Rusiyaya lazım deyildi. Azərbaycanın atəşkəs elan etməsi isə göstərir ki, o, Rusiyanın maraqlarını həmişə nəzərə alır".
Qeyd: Analoji mövzularla bağlı geniş məlumatları aşağıdakı resurslardan da əldə etmək mümkündür:
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər