Erməni ailəsi niyə üçüncü ölkəyə təhvil verilmədi? |
Müəllif: Admin | Bölmə: Xəbərlər | Vaxt: 2-02-2016, 17:51 | Şərh sayı: (0) | Baxılıb: 220
[center]
[/center]
Gevorkyanlar ailəsinin düşmən ölkəyə təhvil verilməsi doğru addımdırmı? Ər-arvad artıq həbs edilib; Vaan Martirosyan və onun ailəsi də geri qaytarıla bilərmi? Müzəffər Baxış: “Azərbaycan dövləti həmin şəxsi öz ölkəsinə qaytarmalı deyildi”
2010-cu ilin yanvarında Naxçıvan ərazisinə keçən, 2014-cü ilin dekabrında Ermənistan tərəfinə təhvil verilən erməni ailəsi düşmən ölkədə həbs edilib. Məhkəmənin qərarı ilə Yeqişe Gevorkyan 5 il, arvadı Ruzanna Gevorkyan isə 3 il müddətinə həbs cəzasına məhkum olunublar. Onların hər ikisi bir illik sınaq müddəti ilə şərti azadlığa buraxılıblar.
Erməni ailəsinin öz ölkələrinə qaytarılması Azərbaycanda birmənalı qarşılanmayıb. Belə ki, qanunvericilikdə öz ölkələrindən hansısa bir səbəbə görə qaçan bu tipli şəxs və ya şəxslər üçüncü ölkəyə təhvil verilə bilərlər. Azərbaycan tərəfinin belə bir addım atması müəmma doğurur.
Bu məsələ ötən il sentyabrın 17-də öz müraciətləri əsasında ölkəmizə pənah gətirən Ermənistan “Milli Azadlıq Hərəkatı” təşkilatının rəhbəri Vaan Martirosyan və onun ailəsi ilə bağlı vəziyyəti də yenidən gündəmə gətirib. Belə iddialar səsləndirilir ki, bu erməni ailəsi də geri qaytarıla bilər.
Hüquqşünas Müzəffər Baxış Azərbaycan tərəfinin erməni ailəsini geri qaytarmaqda doğru addım atmadığını bildirdi: “İnsanların müraciətlərindən asılıdır. Əgər müraciətlərində Ermənistana qaytarılacaqları təqdirdə, işgəncələrə və qanunsuz həbsə məruz qala biləcəklərini göstəriblərsə, Azərbaycan dövləti həmin şəxsi öz ölkəsinə qaytarmalı deyildi. Bu, beynəlxalq hüquq normasıdır. Azərbaycan da bu normalara tərəf çıxıb. Erməni ailəsinin Azərbaycandan sığınacaq istəyərkən, öz ölkələrinə qaytarılacaqları təqdirdə, işgəncələrə məruz qalıb-qalmayacaqları barədə hər hansı bir məlumat verdiklərini dəqiq bilmirəm. Əgər məlumat veriblərsə, Azərbaycan da buna məhəl qoymayıbsa, o zaman beynəlxalq hüquq normalarını kobud şəkildə pozub. Azərbaycanın tərəfdar çıxdığı beynəlxalq hüquq normalarında bunlar aydın şəkildə qeyd olunub. 1984-cü il 10 dekabrda qəbul edilmiş Konvensiyaya, Azərbaycan Konstitusiyasına görə, həmin şəxslər öz ölkələrinə təhvil verilə bilməzlər. Amma təəssüflər olsun ki, Azərbaycan bu Konvensiyanın müdəalarını dəfələrlə pozub. İran, Çeçenistan və digər ölkələri qeyd edə bilərəm. Mən dəqiq bilirəm ki, İrandan ölkəmizə pənah gətirən, orada işgəncələrə məruz qalan şəxsləri Azərbaycan geri qaytarıb. Hakimiyyət beynəlxalq hüquq normalarına əməl etmir. Passiv mənafeyini müdafiə etmək üçün belə qanunsuzluqlara tez-tez yol verir. Bunlar qəbul edilməzdir”.
Hüquqşünas hazırda ölkəmizə sığınan Vaan Martirosyan və onun ailəsinin geri qaytarılma ehtimallarından da söz açdı: “Hər cür hərəkətlər gözləmək mümkündür. Hər hansı bir hərəkət edəndə ən pis nəticəsini fikirləşmək lazımdır. Bir dövlətin müstəqilliyini göstərən amillərdən biri də tərəf çıxdığı beynəlxalq hüquq normalarına əməl edilməsidir. Açığı deyə bilmərəm ki, Azərbaycan tərəfi Vaan Martirosyan və onun ailəsini təhvil verəcək, ya yox... Həmin şəxs qaytarılacağı təqdirdə, təzyiqlərə məruz qalacağını deyirsə, Ermənistan və digər dövlətə hansı münasibətdən asılı olmayaraq, onu təhvil vermək düzgün deyil”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər