Avropa Şurasından Azərbaycana qarşı ikili mövqe |
Müəllif: Admin | Bölmə: Xəbərlər | Vaxt: 27-01-2016, 12:41 | Şərh sayı: (0) | Baxılıb: 244
Avropa Şurasından Azərbaycana qarşı ikili mövqe
AŞ PA-nın qış sessiyasında Ermənistanı işğalçı kimi tanıyan Qarabağ qətnaməsi keçmədi - həmsədrlərin çağırışı “bəhrəsini” verdi; Sərsəng su anbarı ilə bağlı sənəd isə “balans” xətrinə qəbul edildi Zahid Oruc: “Bunu ermənilərin deyil, Qərbin aktivinə yazmaq lazımdır”
AŞ PA-nın qış sessiyasının ikinci iş günündə britaniyalı parlamentar Robert Valterin hazırladığı “Dağlıq Qarabağ və Azərbaycanın işğal olunmuş digər ərazilərində zorakılıq hallarının artması” adlı hesabat qəbul olunmayıb. Plenar iclasda gözlənildiyi kimi, Azərbaycanla bağlı iki sənəd müzakirəyə çıxarılıb.
Bunlardan biri Robert Valterin hazırladığı, digəri isə Sosial məsələlər komitəsi adından Bosniya və Herseqovinadan olanı parlamentar Militsa Markoviçin hazırladığı “Azərbaycanın sərhədyanı rayonlarının sakinlərinin qəsdən içməli sudan məhrum edilməsi” adlı hesabatları olub. APA -nın məlumatına görə, məruzəçi Valterin deputat mandatının vaxtı bitdiyindən, o, hazırda assambleyada təmsil olunmur və hesabatı prosedura uyğun olaraq komitənin sədri, Sosialist qrupunun üzvü, danimarkalı Mogen Yensen təqdim edib.
Erməni tərəfi gözlənildiyi kimi, bu hesabatın təsdiqlənməsinə müqavimət göstərib və sənədin baxılması üçün yenidən komitəyə qaytarılmasını istəyib. Onların əsas arqumentləri məruzəçi R. Valterin assambleyada olmaması, hesabatı hazırlayarkən onun Ermənistan və Dağlıq Qarabağa səfər etməməsi və sənədin bir tərəfin mövqeyini əks etdirməsidir. Eyni zamanda ermənilər və onların assambleyadakı tərəfdarları ATƏT -in Minsk Qrupunun bu yaxınlarda verdikləri bəyanatı xatırladaraq hesabatın assambleyada müzakirə edilməsinə öz etirazlarını bildiriblər.
Sonra xanım Militsa Markoviç “Azərbaycanın sərhədyanı rayonlarının sakinlərinin qəsdən içməli sudan məhrum edilməsi” adlı məruzəsini təqdim edib. İspaniyalı deputat Yordi Çukla AŞ PA məruzəçilərinin Ermənistana və Dağlıq Qarabağa buraxılmamasının yolverilməz olduğunu vurğulayıb: “Biz burada Dağlıq Qarabağın öz müqəddəratını təyin etməsi ilə bağlı danışmırıq. Burada spesifik mövzudan - şiddətin artması mövzusundan, onun siyasi, sosial nəticələrindən danışırıq. Bu müzakirədə əsas mövzu orada yaşayan insanların sudan məhrum edilməsidir. Bəzən suyun Afrikada, Orta Asiyada müharibə səbəbi olmasından danışırıq. Şəxsən deməliyəm ki, Minsk Qrupunun məktubunu alanda çox təəccübləndim. Bu məktubun zarafat və ya saxta bir məktub olduğunu fikirləşdim. Bu, AŞ PA -nın səylərini nəzərə almayan bir məktubdur”.
Deputatların çıxışlarından sonra söz alan məruzəçi Militsa Markoviç ermənilərin arqumentlərinə cavab verərək, onların hesabatda “Dağlıq Qarabağın işğal edilməsi” termininə etirazlarının əsassız olduğunu bildirib və Azərbaycan ərazilərinin işğal edilməsi faktı ilə bağlı AŞ PA tərəfindən qətnamə qəbul olunduğunu deyib. Müzakirələrin yekununda qətnamə layihəsi səsə qoyulub və lehinə 66, əleyhinə 70 nəfər olmaqla keçməyib. Militsa Markoviçin müəllifi olduğu “Azərbaycanın sərhədyanı rayonlarının sakinlərinin qəsdlə içməli sudan məhrum edilməsi” adlı məruzəsi isə 98 deputat lehinə, 71 deputat əleyhinə olmaqla qəbul edilib.
Təbii ki, beynəlxalq təşkilatlarda qəbul olunan hər bir sənəd Azərbaycanın uğurudur. Ancaq ölkəmiz üçün “Dağlıq Qarabağ və Azərbaycanın işğal olunmuş digər ərazilərində zorakılıq hallarının artması” adlı qətnamənin qəbulu daha çox əhəmiyyət kəsb edirdi. Çünki bu sənəddə işğal olunmuş Azərbaycan ərazilərinin azad edilməsi zərurətindən bəhs edilirdi ki, bu da BMT Təhlükəsizlik Şurasının qətnamələrinin növbəti dəfə təsdiqi, Ermənistanın təcavüzkarlığının bəyan olunması demək idi. Elə Ermənistan da bu sənədin qəbul olunmaması üçün çox çalışmışdı. Üstəlik, sessiya ərəfəsində ATƏT-in Minsk Qrupunun həmsədrləri qətnamə layihəsinə görə AŞ PA-ya etiraz bəyanatı yaydı və bununla da işğalçıya bəraət qazandıran mövqe nümayiş etdirdi.
Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Zahid Oruc “Yeni Müsavat”a AŞ PA-dakı müzakirələrin yekunlarını şərh edərkən bunları bildirdi: “Avropa Şurasının növbəti antierməni qətnaməsini qəbul etməməsi Azərbaycanın siyasi və hərbi mövqelərinin bundan sonrakı güclənmiş dövrdə idarəolunmaz səviyyəyə gəlib çatmasına olan ehtiyatdan irəli gəlir. Doğrudur, nümayəndə heyətimiz və avroparlamentarilərin mənsub olduğu ölkələrdəki diplomatik nümayəndəliklərimizin hamısı bu məsələ üzrə qüvvələrini səfərbər etməyə çalışmışdılar. Lakin ən təsirli dayağımızı yenə də əvvəlki illərdə qazandığımız deputatlar oldu. Ona görə də Avropa Şurası Minsk üçlüyünün sifarişini çox asanlıqla yerinə yetirərək Azərbaycanı danışıqlar masasına əyləşdirmək üçün təzyiq etdilər”.
Z.Oruca görə, qətnamənin qəbul olunmamasını ermənilərin deyil, Qərbin aktivinə yazmaq lazımdır: “Çünki Bern danışıqları faktiki olaraq sülh prosesinin ortadan qalxdığını ortaya qoydu və təsadüfi deyil ki, Rusiya İranın Qarabağ danışıqlarına potensial namizdəliyini yetişdirmək üçün fəal addımlara başlayıb”.
Belə yanaşmalar var ki, ermənilərin təbliğatı, yaxud Minsk Qrupunun təsiri ilə yanaşı, Azərbaycanın siyasi məhbuslarla bağlı addım atmaması, çağırışları dəyərləndirib bəzi şəxsləri azad etməməsi də AŞ PA-dakı nəticəyə təsir göstərib. Bu yanaşma ilə razılaşmaq olarmı?
Z.Oruc bu arqumenti qəbul etmir: “Söhbət məhbuslar və ya daxili məsələlərlə bağlı deyil. Hətta burada Amerika-Azərbaycan münasibətlərinin mənfi izlərini də axtarmağa dəyməz. Əslində son qərar şuranın əvvəlki qərarlarından geri çəkilməsi sayıla bilər, lakin indi Qərb hər vəchlə rəsmi Bakını regionla bağlı planlarına qaytarmaq istəyir və belə görünür ki, Strasbursqda hələ də köhnə dövrün geoplitikası üzərində qərarlar verilir. Halbuki indi çox böyük entuziazmla beynəlxalq siyasi-iqtisadi həyata qayıdan İran Cənubi Qafqazın geopolotikasını dəyişdirmək üçün fəal hazırlıqlara başlayıb və avropalılar yaxın zamanlarda ona şahidi olacaqlar ki, Tehran Bakıya yeni Qarabağ planı ilə təşrif buyurub. Bax, onda avroparlamentarilərin davranışları və hazırkı qrup, yaxud konspirativ maraqları dəyişəcək”.
Sessiyanın iştirakçısı, deputat Fazil Mustafa qəzetimizə dedi ki, məsələnin siyasi məhbuslarla hər hansı əlaqəsi yoxdur: “Sırf ermənilərin dəstəklənməsi faktoru ilə bağlı olduğunu dəqiq söyləmək olar”.
Politoloq Elxan Şahinoğlu isə bildirdi ki, əslində bu sənədlərin qəbulu belə, Dağlıq Qarabağ ətrafında situiasiyanı dəyişmir: “Ona qalsa, AŞPA-dan da güclü 4 BMT qətnaməsi var, ancaq bu sənədlərin varlığı belə mövcud duruma təsir etmir. Əsas böyük dövlətlərin Ermənistana təsir imkanlarını hərəkətə gətirməsidir ki, o yoxdur”. Ekspert qeyd etdi ki, Volterin məruzəsinin qəbul olunmamasının ilk səbəbi həmsədrlərin AŞ PA-ya təzyiqidir: “Ancaq qətnamənin qəbul olunmamasının ikinci səbəbi də var, bu da Azərbaycan XİN-in yarıtmaz fəaliyyətidir. Ermənistanın xarici işlər naziri və müavini az qala Avropa ölkələrinin hər birinin xarici işlər nazirinə şəxsən zəng edərək, AŞ PA-da qətnamələrin qəbul olunmaması üçün deputatlarına təsir etməyə çağırdı, üstəgəl, Avropadakı erməni lobbisi də təzyiqlərini artırdı. Bəs bizim XİN bu müddətdə nə etdi? Qətnamələrin taleyi yalnız bu sənədləri hazırlayan azərbaycanlı bir neçə deputatın işi oldu, lobbiçiliklə yalnız bir neçə nəfər məşğul oldu, onlara Avropa ölkələrindəki səfirlərimizdən ciddi dəstək verilmədi, hətta səfirlərimizdən biri açıq deyibmiş ki, ”mən bu haqda xarici işlər nazirindən təlimat almamışam, ona görə də sizə kömək edə bilmərəm". Elə bil ki, səfirin “kömək edə bilmərəm” ifadəsi xalqa və dövlətə deyil, deputatın özünə lazımdır. Bu XİN-lə və bu cür düçüncəli səfirlərlə uzağa gedə bilmərik".
Dəfələrlə cəhd göstərsək də, XİN-in mətbuat xidmətindən məsələyə münasibət öyrənə bilmədik.
musavat.com
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər