“ƏDV-nin yenidən tətbiqi medianın durumunu fəlakət həddinə gətirəcək” |
Müəllif: Admin | Bölmə: Xəbərlər | Vaxt: 26-01-2016, 22:04 | Şərh sayı: (0) | Baxılıb: 271
“ƏDV-nin yenidən tətbiqi medianın durumunu fəlakət həddinə gətirəcək”
Ələsgər Süleymanov: “Qəzetin öz mövcudluğunu qoruması sual altındadır”; Şahbaz Xuduoğlu: “Faktiki, ikiqat vergi qüvvəyə minib və bu, krizis yaradır” Xanhüseyn Əliyev: “Qanunda ziddiyyətlər var”
Yanvarın 1-dən ölkəyə gətirilən çap məhsullarına, o cümlədən qəzet kağızına əlavə dəyər vergisi (ƏDV) tətbiq edilir. Bu vergi növü bir neçə dəfə aradan qaldırılsa da, təzədən tətbiq olunmağa başlayıb. Belə ki, ilk dəfə çap məhsulları üzərindən ƏDV-nin götürülməsi 2000-ci ilə təsadüf edir. Həmin vaxt qəzet rəhbərlərinin dövlət başçısı Heydər Əliyevlə görüşündə mətbuatın problemləri müzakirə edilmiş və ƏDV ləğv olunmuşdu. 2007-ci ildə, prezident İlham Əliyevin dövründə məsələ gündəmə gəlsə də, bir müddət sonra ƏDV təzədən götürülmüşdü.
2016-cı ildə isə məsələ növbəti dəfə aktuallaşıb. Bildirilir ki, Vergilər Məcəlləsinə son dəyişikliklərdən sonra ƏDV-nin ləğvini nəzərdə tutan maddə qüvvədən düşüb və çap məhsulları əlavə dəyər vergisinə cəlb edilib. Bu isə o deməkdir ki, ölkəyə gətirilən qəzet kağızının üstünə əlavə 18 faiz vergi gələcək.
“Yeni Müsavat” xatırladır ki, daha öncə Azərbaycan Respublikasının ərazisinə gətirilən, ƏDV-dən zad olunan malların siyahısında “Qrup 48" bölümündə ”qəzet kağızı, rulonlarda və ya vərəq şəklində", eləcə də “çap olunmuş kitab, qəzet və jurnallar” bəndi yer alıb. Qeyd etdiyimiz kimi, çap məhsullarının, o cümlədən qəzet kağızının ƏDV-dən azad edilməsi də Nazirlər Kabinetinin qərarına əsasən, yanvar ayından etibarən qüvvəyə minib. Devalvasiya dönəmində qəzetlər, eləcə də nəşriyyatlar üçün ciddi maliyyə krizisi yaradacaq bu dəyişiklik, gözlənildiyi kimi, sözügedən sektorlarda həyəcan təbili çalınmasına səbəb olub.
“Qaya” yayım firmasının rəhbəri Xanhüseyn Əliyev məsələ ilə bağlı qəzetimizə bunları bildirdi: “Vergi Məcəlləsində göstərilir ki, yerli qəzet və jurnallar ƏDV-dən azaddır. İdxal olunan bütün xarici qəzet və jurnallar ƏDV-yə cəlb edilib. Bu, ölkəyə gətirilən qəzet kağızına da aiddir. 2005-ci ildə Nazirlər Kabinetinin 11 saylı qərarı ilə bu məhsullar ƏDV-dən azad olunmuşdu. Qanunda ziddiyyət var. Həmin qərar ləğv edilməyə-edilməyə, çap məhsullarından 18 faiz ƏDV tutulur. Burada Vergi Məcəlləsi ilə ziddiyyət var. Biz məsələ ilə bağlı Nazirlər Kabinetində, Mətbuat Şurasında olmuşuq. Müzakirələr gedir. Üçüncü dəfədir belə bir addım atılır, çap məhsullarına ƏDV tətbiq edilir”.
“Yeni Müsavat” qəzetinin baş direktoru Ələsgər Süleymanov bildirdi ki, son qiymət artımı, devalvasiya qəzet kağızının və çap xərclərinin artırılmasına gətirib çıxarıb: “Onsuz da bunun yükünü daşımaqda çətinlik çəkən qəzetlər tezliklə ikinci zərbəni də aldı. Çap məhsullarının - qəzet kağızının ƏDV-dən azad olunmasının ləğvi fəlakətli vəziyyət yaratdı. Onsuz da qəzetlər son dövrlər mövcudluğunu qoruyub saxlamaq üçün ciddi mücadilə aparırdı. Amma verginin yenidən tətbiqi çap xərclərini avtomatik artıracaq və yükümüzün üstünə əlavə yük qoyacaq. Düşünürəm ki, dövlət rəsmiləri bu məsələni bir daha müzakirəyə çıxarıb, qərarla bağlı mətbuatın xeyrinə düzəlişlər etməlidirlər. Əks halda, mətbuatın öz mövcudluğunu qoruyub saxlaması sual altında qalacaq”.
“Qanun” nəşrlər evinin rəhbəri Şahbaz Xuduoğlu da bu qərarın rəhbəri olduğu nəşrlər evinin fəaliyyətinə ciddi təsir edəcəyini düşünür. Onun sözlərinə görə, Vergi Məcəlləsinin 164.2 maddəsində göstərilib ki, idxalın həmin maddədə göstərilməyən digər növləri müvafiq icra orqanları tərəfindən vergidən azad oluna bilər: “Vergiyə cəlb olunan məhsulların siyahısında isə çap məhsulları yer almamışdı. Daha sonradan isə bu, əsas götürülərək Nazirlər Kabineti qərar verib, ƏDV-dən azad olunan malların siyahısında qəzet kağızı daxil olmaqla, çap məhsullarını daxil etmişdi. Bu qərar 2004-cü ilin 30 dekabrında qəbul olunub. Amma Vergi Məcəlləsindəki bu maddə yanvarın 1-dən qüvvədən düşdü, avtomatik olaraq, vergidən azad olunan malların siyahısı da ləğv olundu. Bura buğda, əlil arabaları, pərakəndə üçün nəzərdə tutulan uşaq qidası, külək enerjili elektrik qurğuları və sair məhsullar daxil idi. Vergi Məcəlləsinə yeni dəyişikliyə əsasən, artıq ƏDV-dən birbaşa azad olunmanı da məcəllə özü müəyyən edir. Hansı məhsul vergidən azaddırsa, bu, məcəllənin özündə qeyd olunur. Bu dəyişiklik 2016-cı il yanvarın 1-dən qüvvəyə minib. Bu, gömrük işində də böyük əngəl yaradıb. Gömrük Komitəsi daha öncə Nazirlər Kabinetinin qərarını əsas tutaraq fəaliyyət göstərib”.
Müsahibimiz dedi ki, onsuz da bu günə qədər satışdan 18 faiz vergi tutulurdu. Onun sözlərinə görə, son dəyişikliklə faktiki ikiqat vergi qüvvəyə minib və bu, krizis yaradır. Ş.Xuduoğlu nəticədə xaricdə nəşr olunan kitabların da gömrükdə qaldığını vurğuladı: “Təbii ki, bu, qiymətlərə yüz faiz təsir edəcək. Hələ mən devalvasiyanı nəzərə almıram. Amma 18 faizlik vergi birbaşa satış qiymətlərini qaldıracaq”.
Vergilər Nazirliyindən isə “Yeni Müsavat”a məsələ ilə bağlı bildirilib ki, qəzet kağızının ƏDV-dən azad edilməsi gündəmdə deyil: “”Azərbaycan Respublikasının Vergi Məcəlləsində dəyişikliklər edilməsi barədə" Azərbaycan Respublikasının 20 oktyabr 2015-ci il tarixli Qanunu ilə Vergi Məcəlləsinin 164.2-ci maddəsi ləğv edilərək Azərbaycan Respublikasının ərazisinə gətirilən və təyinatı üzrə idxalda əlavə dəyər vergisindən azad olunan mallar Vergi Məcəlləsinin 164.1.19-164.1.25-ci maddələri ilə müəyyən olunub. Həmin maddələrdə qəzet kağızının idxalının ƏDV-dən azad edilməsi nəzərdə tutulmayıb".
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər