2016-cı ilin “Multikulturalizm ili” elan edilməsinin səbəbi nədir? |
Müəllif: Admin | Bölmə: Xəbərlər | Vaxt: 11-01-2016, 20:46 | Şərh sayı: (0) | Baxılıb: 799
2016-cı ilin “Multikulturalizm ili” elan edilməsinin səbəbi nədir?
Prezident İlham Əliyev 2016-cı ili Azərbaycanda “Multikulturalizm ili” elan edib. Bu barədə dövlət başçısı Nazirlər Kabinetinin 2015-ci ilin sosial-iqtisadi inkişafının yekunlarına həsr olunan iclasında məlumat verib. 2016-cı ildə Bakıda bir neçə mötəbər tədbirin, o cümlədən BMT-nin Sivilizasiyalar Alyansının VII Qlobal Forumunun keçiriləcəyini bildirən prezident İlham Əliyev, ölkəmizin tolerantlıq ənənələrinə, mədəniyyətlər və sivilizasiyalararası dəyərlərə mühüm töhfələr verdiyini nəzərə alaraq, 2016-cı ili Azərbaycanda “Multikulturalizm ili” elan edib.
Məlumat üçün qeyd edək ki, multikulturalizm - eyni bir ölkədə yaşayan müxtəlif xalqların nümayəndələrinin mədəniyyət hüquqlarını tanıyan humanist dünyagörüşü və ona uyğun olan siyasətdir.
Bəs, görəsən, hazırda ölkənin gündəmində iqtisadi böhranla bağlı problemlərin olduğu dövrdə bu ilin “Multikulturalizm ili” elan olunması hansı zərurətdən doğur? Ümumiyyətlə, hökumətin multikulturalizm siyasətinə xüsusi önəm verməsinin səbəbi nədir?
Musavat.com-un suallarını cavablandıran politoloq Qabil Hüseynli bildirdi ki, multikulturalizm Azərbaycan üçün vacib siyasətdir: “Çünki, Azərbaycan çoxmillətli, çoxdinli bir ölkədir. Azərbaycanda təxminən 20-dən artıq azsaylı xalqların nümayəndələri yaşayır. Bu xalqların bir qismi İslam dininin şiə məzhəbinə, bir qismi isə İslam dininin sünni məzhəbinə qulluq edir. Bundan başqa ölkədə xristianlığın provaslav xəttinə, eləcə də iudizm dininə xidmət edən çoxsaylı yəhudilər var. Həmçinin, ölkədən getməmiş erməni Qriqoryan məzhəbinə qulluq edən və azərbaycanlılarla müəyyən qohumluq əlaqələrinə malik ermənilər də var. Göründüyü kimi, Azərbaycan mozaik bir ölkədir. Burada çoxlu millətlərin və xalqların nümayəndələri, müxtəlif dinlərin daşıyıcıları var. Bunlar həm də müxtəlif sivilizasiyaların Azərbaycanda mövcud olduğunu göstərir. Multikulturalizm isə bütövlükdə millətlərarası, dinlərarası münasibətləri tənzimləyən bir elm sahəsidir. Azərbaycanda multikulturalizm sahəsində xeyli təcrübə toplanıb. Azərbaycan xalqının əsas hissəsi olan türk etnosunun digər etnoslara tolerant, dostcasına münasibət bəsləməsi sayəsində etnik və dini zəmində qarşıdurma olmayıb. Bu səbəbdən Azərbaycanda millətlərarası, dinlərarası tolerantlığın, xoşgörünün olduğunu söyləmək mümkündür. Bununla bağlı, Azərbaycanda başqa dövlətlərə nümunə olacaq bir təcrübə toplanıb. Dövlətin xüsusi qurumları bu işlə ciddi şəkildə məşğul olur”.
Politoloq bildirdi ki, mövcud siyasətə əsasən, ölkədə azsaylı xalqların milli mədəniyyətinin inkişafına şərait yaradılır: “Bununla bağlı prezident fərmanı da var. Talış xalqının yaşadığı bölgə olan Lənkəranda böyük bir universitet fəaliyyət göstərir, orada talış dilinin filologiyasını öyrənən fakültə var. Bu şəhərdə həmçinin Dövlət Dram Teatrı, folklor ansamblı var. Eyni şeyləri ləzgilərin yaşadığı bölgələr haqqında da demək olar. Millətin öz varlığını qorumasının yollarından biri onun dilinin, mədəniyyətinin qorunub saxlanılmasıdır ki, bu da Azərbaycan dövləti tərəfindən təmin olunur. Bütün xalqların nümayəndələri Azərbaycan vətəndaşlarıdır. Buna görə də biz onların mədəniyyətlərinin qorunması üçün hər cür şərait yaradırıq. Bu dünyada mövcud olan tolerantlıq nümunələrindən biridir”.
Azərbaycan Demokrat Partiyasının sədri Sərdar Cəlaloğlu isə bildirdi ki, Azərbaycanda multikulturalizmin heç bir əlaməti yoxdur: “Bu, adətən müxtəlif dini konfesiyasların kifayət qədər önəmli olduğu ölkələrdə nəzərdə tutulur. O ölkələrdə ki, əhalinin böyük bir hissəsi xristiandır, digər böyük bir hissəsi isə müsəlmandır və ya digər dinlərin nümayəndəsidir. Belə olduğu halda, həmin ölkələrdə multikulturalizmdən söhbət gedə bilər”.
Partiya sədrinin sözlərinə görə, Azərbaycan monomillət bir respublikadır: “Bizdə demək olar ki, elə bir fərqli dinlər yoxdur. Əhalinin 99 faizi müsəlmandır. Yalnız bir faiz xristian, yəhudi və digər dinlərə məxsus insanlardır. Ona görə də, Azərbaycanda multikulturalizm nə deməkdir, mən bunu başa düşə bilmirəm. Ümumiyyətlə, multikulturalizm nə deməkdir, bu, hələ Azərbaycanda tam başa düşülmür. Bu ili multikulturalizm ili elan edilməsinə gəldikdəsə, ölkədə bu cür ağır böhran var, ciddi hadisələr gözlənilir. Belə bir vaxtda hökumətin bu cür məsələlərə diqqət verməsi yanlışdır. Biz daha çox bizi gözləyən problemlərdən qurtulmaq üçün ciddi addımlar atmalıyıq”.
Oxşar Xəbərlər:
İnformasiya
Qonaq qrupunda olanlar istifadəçilər bu xəbərə şərh əlavə edə bilməz.
Qonaq qrupunda olanlar istifadəçilər bu xəbərə şərh əlavə edə bilməz.
Şərhlər